მნიშვნელოვანი ინფორმაცია
1
ივნისიდღის ზოგადი ასტროლოგიური პროგნოზი
ორშაბათი, მთვარის მეშვიდე დღე დაიწყება 11:53-ზე, მთვარე ქალწულს ესტუმრება 07:02-ზე – კარგია მოლაპარაკებების წარმოება. ახალი კავშირების დამყარება. სარეკლამო კამპანიების, კონფერენციების და მსგავსი ღონისძიებების ჩატარება. გამოიყენეთ სიტყვები პარტნიორების, ინვესტორების და სპონსორების დასარწმუნებლად. ბიზნესმენებმა ხელი უნდა შეუწყონ და დააფინანსონ შემოქმედებითი ადამიანები. ბევრმა მუშაობამ შეიძლება გამოიწვიოს გადაღლილობა. უმჯობესია თავი შეიკავოთ დიდი რაოდენობით ქონის, ლორის, ქაშაყის, დამუშავებული ყველის და მსგავსი პროდუქტების მიღებაზე.
მნიშვნელოვანი ინფორმაცია
მკითხველის რჩევით
კვირის კითხვადი სტატიები
თვის კითხვადი სტატიები
ასევე დაგაინტერესებთ
ბიძინა ივანიშვილი - "სეპარატისტული ტერიტორიები შეიძლება დამანგრეველი გამოდგეს რუსეთისთვის"
04:19 / 05-06-2013
"სეპარატისტული ტერიტორიები შეიძლება დამანგრეველი გამოდგეს თავად რუსეთის სახელმწიფოსთვის", - ამის შესახებ საქართველოს პრემიერ-მინისტრმა "პალიტრა TV-ს" გადაცემა "რეზიუმესთვის" მიცემულ ინტერვიუში განაცხადა. როგორც ბიძინა ივანიშვილმა აღნიშნა, რაც რუსეთის მხრიდან საქართველოსთან დაკავშირებით ხდება და ის, რომ საქართველოს ტერიტორიების დიდი ნაწილი ოკუპირებულია, ხელს არ აძლევს რუსეთის ხელისუფლებასა და რუსეთის სახელმწიფოს. "ეს მისთვისაც ძალიან დიდი პრობლემაა. მე მგონი, რომ ისინი ამას აანალიზებენ და უნდა გააკეთონ დასკვნები. ჩვენ, ჩვენი მხრიდან ყველაფერი უნდა გავაკეთოთ იმისთვის, რომ ამ პროცესებს სულ ცოტა, ხელი არ შევუშალოთ. ასეთი სეპარატისტული ტერიტორიები შეიძლება დამანგრეველი გამოდგეს თავად რუსეთის შიდა და გარე უსაფრთხოებისთვის", - მიაჩნია პრემიერ-მინისტრს.
მისივე თქმით, იმისგან დამოუკიდებლად, როგორ მოიქცა სააკაშვილი და მისი ხელისუფლება, არც ერთ შემთხვევაში არ უნდა იფიქროს ვინმემ, რომ რუსეთს ეპატიება ის დიდი აგრესია, რაც მან საქართველოს მიმართ განახორციელა. "მე არ ვაიოლებ რუსეთის როლს და, რა თქმა უნდა, მან საშინელება ჩაიდინა, უდიდესი აგრესია განახორციელა ჩვენი ქვეყნის მიმართ და დამოუკიდებლად იმისა, როგორ მოიქცა სააკაშვილი და მისი ხელისუფლება, არც ერთ შემთხვევაში არ იფიქროს ვინმემ, რომ რუსეთს ეპატიება ის დიდი აგრესია, რაც მან ჩვენი ქვეყნის მიმართ განახორციელა. მე ეს არ მაქვს მხედველობაში. მხედველობაში მაქვს საკუთარი ქვეყნის და საკუთარი მთავრობის ქმედებები, რომელსაც ჩვენ ყველაზე მეტად უნდა მოვთხოვოთ. მესმის, წინა ხელისუფლებასაც გაუჭირდა, იმის წინა ხელისუფლებასაც ჰქონდა პრობლემები რუსეთთან მიმართებაში, მაგრამ ყველაზე უარესი მივიღეთ სწორედ სააკაშვილის ხელისუფლების ქმედების გამო. შესაძლებელია ეს უარესი ისედაც განვითარებულიყო, მაგრამ არ შეიძლება ისტერიული და ემოციური გამონათქვამებით შეურაცხყოფა მივაყენოთ ჩვენს ოპონენტებს... ჩვენ რა თქმა უნდა ბევრი არაფერი გაგვიკეთებია, ბევრი რესურსი არც გვაქვს, რუსეთთან გლობალურად დავალაგოთ ურთიერთობა, მაგრამ ჩვენ გავაკეთეთ ყველაზე მარტივი, ელემენტარული, შევწყვიტეთ სიძულვილისა და სალანძღავი ენა. დიპლომატიურად დავიწყეთ ქმედება", - განაცხადა ივანიშვილმა.
რაც შეეხება საოკუპაციო ხაზის გადმოწევას, მისი თქმით, სურს, დღემდე მიიჩნიოს, რომ ეს გაუგებრობაა და არა ცენტრალური ხელისუფლების სტრატეგია. "მთელი მსოფლიო ფეხზე დადგა, ჩვენ ყველა ფეხზე დავაყენეთ, ძალიან მკვეთრი განცხადებები გაკეთდა, არ უღირს ამხელა სახელმწიფოს ეს იმ სკანდალად, რასაც ის საერთაშორისო თანამეგობრობიდან ზეწოლას მიიღებს", - დასძინა მან. პრემიერი ინტერვიუში შიდა პოლიტიკურ საკითხებსაც შეეხო და განაცხადა, რომ ბოკერიასაც მოუწევს, პასუხი გასცეს გამოძიების კითხვებს. როგორც ივანიშვილმა აღნიშნა, გასულ, 2012 წელს ლობისტებზე ბიუჯეტიდან 16 მილიონზე მეტია დახარჯული და მას გრიფი "საიდუმლო" ედო. მისი თქმით, 200, 300, 400 ათასი ნაღდი ფულითაა აღებული და ეს ყველაფერი გიგა ბოკერიას სამსახურის მეშვეობით არის გაკეთებული.
"დღეს პროკურატურაშია საქმეა გადაცემული და ამ საკითხებთან დაკავშირებით გამოძიება მიმდინარეობს. გიგა ბოკერიას სამსახურიდან არის ეს ყველაფერი გაწერილი და რა თქმა უნდა, მასთან შეკითხვები არსებობს. უფრო მეტს მე არ ვიტყოდი, მას მოუწევს პასუხები გასცეს კითხვებს გამოძიებისთვისაც და საზოგადოებისთვისაც. ჩვენც გვაქვს ლობისტებზე ფული გამოწერილი, ნახეთ, ჩვენს ვებსაიტზე დევს და ყველაფერი გამჭვირვალეა", - აღნიშნა პრემიერმა.
ამ კონტექსტში იგი "ვაშინგტონ პოსტის" ბოლო კრიტიკულ სტატიასაც გამოეხმაურა. მისი თქმით, ჩნდება საფუძვლიანი ეჭვი იმისა, რომ "ვაშინგტონ პოსტი" მხოლოდ სააკაშვილის ლობისტების გამონათქვამების საფუძველზე აკეთებს ასეთ დასკვნებს. "იმ ლობისტების, რომლებიც ჩვენი ბიუჯეტიდან ფინანსდებოდნენ", - დასძინა მან.
ამასთან, პრემიერ-მინისტრს არ ესმის, რაში იღებს ხელფასს უშიშროების საბჭოს მდივანი. ივანიშვილის თქმით, ეროვნული უშიშროების საბჭოს სხდომა 8 თვის განმავლობაში არ გამართულა. "უკვე 8 თვეა, საბჭოს სხდომა არ მოუწვევიათ, რაში იღებენ ხელფასს და რას აკეთებენ. საყვედურები წამოვიდა ჩვენი გუნდიდან - რას აკეთებს უშიშროების საბჭო?! მხოლოდ ვაშინგტონში დადის და ლობისტებს ხვდება?! ბოკერიას ვაშინგტონში ყოფნა უძღოდა წინ "ვაშინგტონ პოსტის" სტატიას. რას აკეთებენ ისინი ქვეყნისთვის, სად დადიან პრეზიდენტი და ბოკერია, არავინ არაფერი ვიცით. რაში იღებენ ჩვენი გადამხდელების ფულს?! სად იყვნენ აქამდე, ვინ დაუშალა ან ვინ შეუშალა ხელი?!", - აცხადებს ივანიშვილი.
პრემიერმა ასევე აღნიშნა, რომ მთავრობა და ჩინოვნიკები მაქსიმალურად უნდა გაემიჯნონ ეკლესიას და ამასთან დაკავშირებით პროცესი კულტურისა და ფინანსთა სამინისტროებში მუშავდება.
"ჩემი დამოკიდებულებაა, რომ ჩინოვნიკები, მთავრობა არ უნდა ჩაერიონ და მაქსიმალურად უნდა გაემიჯნონ ეკლესიას. დაფინანსება, რაც ეკუთვნის ეკლესიას და როგორც ეკუთვნის, არ უნდა იყოს დამოკიდებული ჩინოვნიკების ნება-სურვილზე, ვის რა მანქანა უყიდონ და ა.შ. ეკლესია მაქსიმალურად დამოუკიდებელი უნდა იყოს და ეკლესიის ქმედებებში არ უნდა ჩაერიონ", - მიაჩნია პრემიერს.
რაც შეეხება მოსაზრებას იმის შესახებ, რომ 17 მაისს ეკლესია თავად ჩაერია სახელმწიფოს ფუნქციებში, ივანიშვილის განცხადებით, ეკლესია არ ჩარეულა სახელმწიფოს ფუნქციებში, რადგან აქციაზე რამდენიმე სასულიერო პირი აქტიურობდა.
"როგორც ვიცი, გამოძიება ისევე სთხოვს მათ პასუხს, როგორც სამოქალაქო საზოგადოების წევრებს, რომლებიც კანონს არღვევდნენ. კანონის წინაშე ყველა თანასწორია", - დასძინა პრემიერმა.
ანა გიორგაძე
ყოველკვირეული გაზეთი "ყველა სიახლე"
(გამოდის ოთხშაბათობით)
გააკეთეთ კომენტარი
sponsored by
ContentRoom
რუბრიკის სხვა სიახლეები
დღის ვიდეო
00:00 / 00:00
გიორგი ბაჩიაშვილი - საქართველოს წარმომადგენლებმა, ივანიშვილის დავალებით, მიმართეს ბანდიტურ გზას და მოტაცებით ჩამომიყვანეს საქართველოში
კვირის კითხვადი სტატიები
მნიშვნელოვანი ინფორმაცია
მკითხველის რჩევით
