გოგა ხაჩიძე - "რატომ იხარჯება დღეს თითქმის ორჯერ მეტი ფული ინფრასტრუქტურაში, ვიდრე შარშან და რატომ არაფერი ეტყობა ქვეყანას?"

გარემოს დაცვის ყოფილი მინისტრი, საპარლამენტო უმცირესობის წევრი გოგა ხაჩიძე "ფეისბუქის" საკუთარ გგვერდზე დავით ნარმანიას განცხადებას ეხმაურება, რომელიც მან დღეს გამართულ პრესკონფერენციაზე გააკეთა.

"დავით ნარმანიამ - შარშანდელთან შედარებით, 170%-ით გაიზარდა ინფრასტრუქტურულ პროექტებში გაწეული თანხებიო.

ანუ, შარშანდელთან შედარებით, თითქმის გაორმაგებულად უნდა მიმდინარეობდეს მშენებლობები მთელს ქვეყანაში.

გაორმაგება კი არა გაჩერებულ პროექტებს ვხედავ და რამ გააორმაგა ეს ხარჯები?! მასალა გაძვირდა, თუ მუშა/ხელი?!

არა მართლა მაინტერესებს, ლოგიკა სად არის, რატომ იხარჯება დღეს თითქმის ორჯერ მეტი ფული ინფრასტრუქტურაში, ვიდრე შარშან და რატომ არაფერი ეტყობა ქვეყანას?...", - წერს ხაჩიძე.

საქართველოს რეგიონული განვითარებისა და ინფრასტრუქტურის მინისტრმა დავით ნარმანიამ გაწეული საქმიანობის შედეგები დღეს "საქართველოს მთავრობა ღია მმართველობისთვის" პროგრამის ფარგლებში გამართულ პრესკონფერენციაზე შეაჯამა.

მინისტრის თქმით, ბიუჯეტის ძირითადი ნაწილი საგზაო ინფრასტრუქტურის გაუმჯობესების ღონისძიებებზე დაიხარჯა. პირველი კვარტლის მონაცემებით, ავტომაგისტრალის მშენებლობის მიმართულებით დაფინანსებულია 170%-ით მეტი ღირებულების სამუშაო, ვიდრე გასული წლის ამავე პერიოდში დაფინანსდა.