24
მაისიდღის ზოგადი ასტროლოგიური პროგნოზი
რუბრიკა სტილის სტუმარია მსახიობი ნინო მუმლაძე, რომელიც მაყურებელმა სერიალ "ჩიფსების თაობიდან" გაიცნო. ნინო იქ მოკრძალებული გოგონას როლს თამაშობდა, ამჯერად კი პოპულარულ სერიალ "ჩემი ცოლის დაქალებში" სტომატოლოგის როლს ასრულებს.
- ჩაცმის როგორ სტილს ანიჭებ უპირატესობას?
- მირჩევნია, სადად და გემოვნებით მეცვას. ყველა ადამიანს უნდა ჰქონდეს თავისი ინდივიდუალური სტილი, მაგრამ ვცდილობ, სხვებისგან რადიკალურად არ გამოვირჩეოდე. უცხოელი დიზაინერებიდან გამოვარჩევ ჯონ გალიანოს - უხეშ ტყავსა და ცისფერი შიფონის ნაჭერს ისე კარგად უხამებს ერთმანეთს, რომ გაოგნებული ვრჩები. აქვს უცნაური კოლექცია, მაგრამ თითოეული კოსტიუმი ხელოვნების ნიმუშია. სამოსს საქართველოში ვიძენ, სერიალისთვის კი თამუნა ხიზანიშვილი გვაცმევს.
- სამოსის შერჩევისას უფრო მეტად რის წარმოჩენას ცდილობ?
- ვცდილობ, ხაზი გავუსვა მკერდს და ვულგარულადაც არ გამოვიყურებოდე. დეკოლტირებულ სამოსთან ერთად მუხლამდე კაბას ვიცვამ. მაღაზიებში მცნობენ, სიხარულით მხვდებიან და სამოსის არჩევაში მეხმარებიან. ტაქსის მძღოლები კი ხანდახან მგზავრობის საფასურს არ მახდევინებენ. ბუნებრივია, სასიამოვნოა ეს ყველაფერი.
- ოჯახის წევრები როგორ შეხვდნენ შენს თამამ როლს ახალ სერიალში?
- ერთი-ორჯერ მქონდა სერიალში კოცნის სცენა და ერთხელაც ზეწარშემოხვეულმა გავიარე, ეს არის თამამი სცენა? სხვებს უფრო თამამი სცენები ჰქონიათ, მაგრამ ხალხს რატომღაც ჩემზე აქვს რეაქცია. ჩემი ოჯახის წევრები ხელოვანები არიან და ასეთი რამ არ უკვირთ.
- თაყვანისმცემლები ყველაზე ხშირად რით გასაჩუქრებენ?
- თუ ადამიანი არ მომწონს, მისგან არც საჩუქარს მივიღებ. ყოფილა შემთხვევა, მოუტანიათ ყვავილები, სუნამო, მაგრამ თავიდანვე ვახვედრებ ადამიანს, რომ მასთან ურთიერთობა არ მსურს და დრო ტყუილად არ დაკარგოს.
- როგორც ვიცი, ცოტა ხნის წინ ერთ ფეხბურთელზე იყავი შეყვარებული...
- ნამდვილად იყო ერთი ბიჭი, რომელიც ჩემს გაცნობას თვეების განმავლობაში ცდილობდა. რომ გავიცანი, მეც მომეწონა, ვხვდებოდით ერთმანეთს, მაგრამ მივხვდი, რომ ერთმანეთისგან განსხვავებული ადამიანები ვიყავით და დავშორდით.
- წონას როგორ ინარჩუნებ?
- სამწუხაროდ, არასპორტული ადამიანი ვარ და სისტემატიურად ვარჯიშს ვერ ვახერხებ. ამიტომ ვცდილობ, ჯანსაღად და სწორად ვიკვებო. "რეალ ტივიზე" დილის გადაცემის წამყვანად რომ ვმუშაობდი, ძალიან მოვიმატე წონაში და დიეტოლოგმა ელენე გიორგაძემ თავის კლინიკაში მისვლა შემომთავაზა. ჩავიტარე გამოკვლევები და საგრძნობლად დავიკელი. ზოგ მამაკაცს კი მოსწონს მრგვალი ფორმების მქონე ქალები (იცინის), მაგრამ პირადად მე მინდა უფრო გამხდარი ვიყო.
- როგორ მაკიაჟს ანიჭებ უპირატესობას?
- საეთერო მაკიაჟს პროფესიონალი ვიზაჟისტები მიკეთებენ. ბავშვობიდან სცენაზე ვარ და მაკიაჟის გაკეთება დამოუკიდებლადაც შემიძლია. მაკიაჟის და სამოსის შესაბამისი აქსესუარების გარეშე სახლიდან არ გავდივარ. სამოსი და გარემო ერთმანეთს უნდა შეეხამებოდეს.
- სოლარიუმში ხშირად დადიხარ?
- ღია ფერის კანი მაქვს და მიმაჩნია, რომ ჩემს გარეგნობას გარუჯვა არც უხდება. თუ ზღვაზე ვარ, სიამოვნებით ვეფიცხები მზეს, მაგრამ სოლარიუმში არასდროს ვყოფილვარ. ჩემი ჯანმრთელობა ყველაფერს მირჩევნა.
- რას ურჩევ ქართველ ქალებს?
- აუცილებელი არ არის, ყველა მონიკა ბელუჩის ჰგავდეს. მთავარია, ქალმა საკუთარ თავში იპოვოს ის მარცვალი, რითაც სხვებისგან განსხვავდება. თუ ჩვენ გვეყვარება საკუთარი თავი, სხვებსაც შევუყვარდებით.
ესაუბრა თამარ ბოჭორიშვილი
ყოველკვირეული გაზეთი "ყველა სიახლე"
(გამოდის ოთხშაბათობით)
