27
მაისიდღის ზოგადი ასტროლოგიური პროგნოზი
"ევროვიზიიდან" დაბრუნებული ნოდიკო ტატიშვილი და სოფო გელოვანი კონკურსზე მიღწეულ შედეგს - მეთხუთმეტე პოზიციას დადებითად აფასებენ. მათთვის ყველაზე მთავარი გულშემატკივრების დიდი სიყვარული და იმ ჟურნალისტების სიმპათიაა, რომლებმაც წყვილს მედიის ჯილდო არგუნეს და საუკეთესო ხუთეულში მოხვედრასაც უწინასწარმეტყველებდნენ, თუმცა, მათდა გასაკვირად, მოვლენები სხვაგვარად წარიმართა... "ევროვიზიის" წლევანდელ კონკურსს არა მარტო სოფო და ნოდიკო, არამედ გასული წლების მონაწილეებიც აფასებენ.
ნოდიკო ტატიშვილი:
- შედეგით ბევრად უფრო კმაყოფილი ვიქნებოდი, პირველ ადგილზე ან სამეულში რომ გავსულიყავით, როგორც ამას გვიწინასწარმეტყველებდნენ, მაგრამ არა უშავს, ასეთი რაღაცებიც ხდება. მე და სოფომ ძალ-ღონე არ დავიშურეთ, რათა ჩვენი ქვეყანა გვესახელებინა. მიხარია, რომ ეს ქართველებმაც დაინახეს და აღნიშნეს კიდეც. საერთოდ, "ევროვიზია" ძალიან მაგარი კონკურსია და იქ მოხვედრას ყველა ჩემს კოლეგას ვუსურვებ. ის ემოციები თუ გამოცდილება, რაც იქ მივიღე, მთელი ცხოვრება გამყვება! მეთხუთმეტე ადგილზე გასვლას არც ჩვენ ველოდით, არც - დელეგაცია და შედეგით ყველანი გაკვირვებულები ვიყავით. მიუხედავად ამისა, არ ვფიქრობ, რომ საქართველო დამარცხდა, რადგანაც ჩვენს გამოსვლას არაჩვეულებრივი გამოხმაურება და შეფასება ჰქონდა. აკრედიტებულმა 5 ათასამდე ჟურნალისტმა ჩვენ მიმართ უდიდესი სიმპათია გამოხატა და ბევრი ფანიც შევიძინეთ. სასიამოვნო იყო კრიტიკოსების შეფასებებიც, რომლებმაც დაწერეს, რომ ქართული დუეტი აუცილებლად უნდა მოხვედრილიყო მოწინავე პოზიციაზე!
- როგორ მიმდინარეობდა სამზადისი კონკურსისთვის?
- მთელი ორი კვირა საოცრად დატვირთული დღის რეჟიმი გვქონდა: ყოველდღე პრესკონფერენცია იმართებოდა, ჟურნალისტებს დღეში რამდენიმე ათეულ ინტერვიუს ვაძლევდით, ფოტოსესიები გვქონდა და არაერთ გამოცემაში იბეჭდებოდა. რაც შეეხება მოსამზადებელ პერიოდს, 15 000-კაციან აუდიტორიაში დღეში ორ-ორი რეპეტიცია გვქონდა, - ანუ ეს რეპეტიცია კი არა, ფაქტობრივად, კონცერტი იყო, რომელსაც მაყურებელი ესწრებოდა და იმ დღეებში რეპეტიციაზე დასასწრები ბილეთებიც იყიდებოდა. ჩვენზე პროფესიონალები ზრუნავდნენ და მართლაც, რომ თან გადაგვყვნენ; მათგან სითბო, სიყვარული და ყურადღება არ მოგვკლებია.
- როგორ ფიქრობთ, რა განაპირობებს იმას, რომ ჩვენი მეზობელი ქვეყნები "ევროვიზიაზე" მოწინავე პოზიციების დაკავებას ხშირად ახერხებენ?
- აზერბაიჯანს დიდი ფულადი რესურსი აქვს, რუსეთი კი მსოფლიოში ყველაზე დიდი ქვეყანაა. ჩვენ ბევრი ფული რომ გვქონოდა, შეიძლებოდა, საზღვარგარეთ გაგვეგზავნა და ამ თანხით ჩვენი ემიგრანტები დაგვიმესიჯებდნენ. "ევროვიზიაზე" ასეც ხდება: ვისაც ბევრი ფული აქვს, თავის დიასპორებს უგზავნის და ისინიც ამესიჯებენ. ვერ ვიტყვი, რომ ეს ჩაწყობაა, რადგან ბუნებრივია, ყველა ქვეყანა წინა პოზიციაზე მოხვედრას ცდილობს... სამაგიეროდ, რაც მოვიპოვეთ, წესიერი, პატიოსანი შრომით და ყველანაირი წესების დაცვით შევძელით. გვიკვირდა კიდეც, რომ ასეთი მინიმალური დანახარჯით ამხელა აჟიოტაჟი გამოვიწვიეთ: ქუჩაში აბსოლუტურად უცხო ადამიანები ჩვენს სიმღერას მღეროდნენ და საქართველოს დროშებს აფრიალებდნენ. შვედეთში გულშემატკივარი ნამდვილად არ მოგვკლებია.
სოფო გელოვანი:
- ძალიან კმაყოფილები და ბედნიერები ვართ იმით, რომ "ევროვიზიაში" ვმონაწილეობდით. ვფიქრობ, ჩვენი ქვეყანა ღირსეულად წარვადგინეთ. იმ დროის განმავლობაში, რაც იქ ვიყავით, გამოკითხვებში ერთ-ერთ ფავორიტებად მივიჩნეოდით: ბუკმეკერებით დაწყებული, ჟურნალისტებითა და მონაწილეებით დამთავრებული, ყველას ეგონა, რომ საუკეთესო ხუთეულში მოვხვდებოდით. მოდიოდნენ და გამარჯვებას გვილოცავდნენ, რაც ჩვენთვის შოკის მომგვრელი იყო. ჟურნალისტებმა თავიანთი პრიზი მთავარ კონცერტამდე რამდენიმე საათით ადრე გადმოგვცეს... რა თქმა უნდა, უფრო მეტის გაკეთება გვინდოდა, მაგრამ "ევროვიზიაზე" პოლიტიკაც დიდ როლს თამაშობს. თანაც - ჩემთვის, როგორც მომღერლისთვის, ყველაზე მნიშვნელოვანი ის არის, რომ გულშემატკივრებისგან უამრავი დადებითი მესიჯი და შეფასება მომდის.
- როგორი ურთიერთობა გქონდათ კონკურსანტებთან? ვისთან დამეგობრდით?
- ძლიერი კონკურენტები გვყავდა. "ევროვიზიაზე" ფაქტობრივად, ყველა ქვეყანა იმ მომღერალს უშვებს, ვისაც თავისი საქმის პროფესიონალ და ღირსეულ წარმომადგენლად მიიჩნევს. გული დაგვწყდა, როდესაც ფინალში ისრაელის წარმომადგენელი გოგონა ვერ მოხვდა. ფინალს ბევრი კარგი მონაწილე გამოეთიშა, რაც იმას ადასტურებს, რომ "ევროვიზია" მაინც არაპროგნოზირებადი კონკურსია. მინდა აღვნიშნო, რომ ბუკმეკერების პროგნოზი მხოლოდ ჩვენს შემთხვევაში არ გამართლდა და დაიწერა კიდეც, რომ ფავორიტებში, საუკეთესო ხუთეულში მოვიაზრებოდით. დელეგაციის წევრებისგან, ჟურნალისტებისგან დადებითი ემოციები მოდიოდა; გვეუბნებოდნენ: თბილისსა და ბათუმში უნდა ჩამოვიდეთო. მინდა, მადლობა გადავუხადო იმ ადამიანებს, რომლებიც ჩვენზე ზრუნავდნენ და მათაც, ვინც "ფეისბუკით" "ესემესებს" გვიგზავნიდა და გვამხნევებდა, ჩვენთვის ეს სტიმულის მომცემი იყო. "ევროვიზიაში" მონაწილეობით დიდი სკოლა გავიარეთ და უდიდესი სიამოვნება მივიღეთ. სხვათა შორის, მე და ნოდიკოს ევროპის სხვადასხვა ქვეყანაში კონცერტები გვექნება, ტურნეებს ჩავატარებთ.
ანრი ჯოხაძე:
- ჩემი აზრით, მნიშვნელობა არა აქვს, ნოდიკო და სოფო რომელ ადგილზე გავიდნენ, მთავარია, მაყურებლის წინაშე ღირსეულად წარდგნენ და ბევრ მათგანს მოაწონეს თავი...
- "ფეისბუკზე" თქვენი პოსტი ვნახე - "ევროვიზიაზე" დანიის გამარჯვებით დიდი თანხა მოვიგეო, - ხუმრობდით თუ ეს ამბავი სიმართლეს შეეფერება?
- კი, სიმართლეა! ონლაინ-ტოტალიზატორში დაახლოებით 10 ათასი ევრო მოვიგე და ძალიან გახარებული ვარ! სხვათა შორის, ქართულ საიტებზე ვეძებდი, რომ ფსონი გამეკეთებინა, მაგრამ ვერაფერი ვნახე, ინგლისური ტოტალიზატორი აღმოვაჩინე და გამიმართლა კიდეც. თანხა რამდენიმე დღეში გადმომერიცხება.
- გილოცავთ! რაში დახარჯავთ მოგებულ ფულს? კიდევ რაიმე ახალ და საინტერესო კლიპს შემოგვთავაზებთ?
- ახალ კლიპებს ამის გარეშეც გთავაზობთ - ისეთი გააქტიურებული ვარ, მგელს ვგავარ. ახლა საქართველოს ეროვნულ ჰიმნზე ვმუშაობ, რომელიც 26 მაისს გაჟღერდება.
სოფო ხალვაში:
- ყოველთვის ვამბობდი, რომ "ევროვიზიის" კონკურსის შეფასება ძალიან რთულია, ვინაიდან მომღერლების ბედს იქ პროფესიონალი ადამიანები არ წყვეტენ. ნოდიკო და სოფო ნახევარფინალსა და ფინალშიც ძალიან კარგად წარდგნენ. დანიის წარმომადგენელი გოგონას სიმღერაც მომეწონა, თანამედროვე ელემენტებით იყო გაკეთებული და ეტყობოდა, რომ თავისი მუსიკალური ხედვა ჰქონდა ისევე, როგორც შარშანდელ გამარჯვებულს, რომელსაც ვერავის შევადარებ. სხვათა შორის, მას წელსაც ფანტასტიკური საფინალო გამოსვლა ჰქონდა.
- როგორ ფიქრობთ, ჩვენი მხრიდან რა უნდა გაკეთებულიყო, რომ საქართველო, როგორც უწინასწარმეტყველებდნენ, ხუთეულში მოხვედრილიყო?
- რთული საკითხია, "ევროვიზიაზე" ყოველთვის რაღაც ახალი, სულ სხვადასხვა სტილის სიმღერა იმარჯვებს. მაგალითად, შარშანდელ გამარჯვებულს წელს ბევრმა მიჰბაძა, იგივე ელემენტები გაიმეორეს, მაგრამ ეს უკვე მოძველებული გამოდგა. ალბათ, უნდა გაკეთდეს რაღაც ისეთი, რაც ჯერჯერობით არ არსებობს და ევროპისთვის საინტერესო სიახლე იქნება. ჩვენმა დუეტმა ყველაფერი მაქსიმალურად კარგად გააკეთა ვოკალური თვალსაზრისით, ყველაფერი უმაღლეს დონეზე გამართული იყო და მათ ნამდვილად მისალოცად აქვთ საქმე. ჩემი აზრით, ეს კონკურსი მაინც პოლიტიკურია. ბევრი ქვეყანაა ჩართული და როდესაც ხმის მიცემის შედეგებს ვადევნებ თვალს, ჩანს, რომ უმეტესად მაინც მეზობელ ქვეყნებს უჭერენ მხარს. სოფო და ნოდიკო უდავოდ იმსახურებდნენ ბევრად წინა პოზიციას, თუმცა, მე მაინც კმაყოფილი ვარ და მათ სამომავლოდ უფრო მეტ წარმატებას ვუსურვებ!
თამთა დადეშელი
(გამოდის ხუთშაბათობით)
