30
მარტიდღის ზოგადი ასტროლოგიური პროგნოზი
სამღვდელოება, რიგითი მოქალაქე, მინისტრი თუ პრემიერ-მინისტრი - კანონის წინაშე ყველა თანასწორია, -ამის შესახებ თავდაცვის მინისტრმა ირაკლი ალასანიამ ლატვიის რესპუბლიკაში ვიზიტის ფარგლებში, ევროკავშირის სახლში განაცხადა, სადაც თბილისში 17 მაისს განვითარებულ მოვლენებზე კითხვა დაუსვეს.
თავდაცვის სამინისტროს ინფორმაციით, ირაკლი ალასანიამ ლატვიის სეიმის ეროვნული უშიშროების კომიტეტის თავმჯდომარესთან, ვალდის ზატლერსთან ერთად საჯარო განხილვაში მიიღო მონაწილეობა.
დისკუსიის თემები შეეხებოდა საქართველოს უსაფრთხოებისა და თავდაცვის პოლიტიკას, ნატო-ში ინტეგრაციასა და რუსეთის ფედერაციასთან ურთიერთობებს. თავდაცვის მინისტრმა საჯარო განხილვაში მონაწილეებს საქართველოს თავდაცვის სფეროში მიმდინარე რეფორმებიც გააცნო.
ევროკავშირის სახლში შეხვედრა კითხვა-პასუხის რეჟიმში გაგრძელდა. დისკუსიაში მონაწილეებმა საქართველოს თავდაცვის უწყების ხელმძღვანელს თბილისში 17 მაისს განვითარებულ მოვლენებზე და მასთან დაკავშირებით საქართველოს ხელისუფლებისა და ეკლესიის პოზიციაზე დაუსვეს კითხვები.
"პატრიარქი გმობს ძალადობას. ამ მოვლენების დროს პატრიარქი საქართველოში არ იმყოფებოდა. ეს საკითხი სენსიტიურია ყველაზე ლიბერალურ დემოკრატიებშიც კი. ამ საკითხის მიმართ შეიძლება ორი უკიდურესი დამოკიდებულება არსებობდეს. თუმცა, როცა საქმე ეხება ძალადობას, ეს არა მარტო უნდა დავგმოთ, არამედ მისმა ჩამდენმა პასუხიც უნდა აგოს. პატრიარქმა სწორედ ეს განაცხადა საქართველოში დაბრუნების შემდეგ. ის ქვეყანაში ძალიან პოპულარულია და არაერთხელ გაუერთიანებია ჩვენი საზოგადოება. ვფიქრობ, თავის მხრივ, პატრიარქი პასუხისმგებლობას გრძნობს ქართველი ხალხის წინაშე. საქართველოს მოსახლეობის დიდი ნაწილი 96-97% ხომ სწორედ ეკლესიას ენდობა, რადგან მას შეუძლია, დიდი გავლენა მოახდინოს საზოგადოებაზე. პატრიარქს მხოლოდ პოზიტიური როლი შეუძლია ითამაშოს ამ პროცესებში. რა თქმა უნდა, დემონსტრაციაზე სამღვდელოების წარმომადგენლებიც იმყოფებოდნენ, რომელთა ქცევაც ზღვარს გადავიდა და ეს ტელევიზიებითაც გადაიცა. კანონის წინაშე ყველა თანასწორია - სამღვდელოება, რიგითი მოქალაქე, მინისტრი თუ პრემიერ- მინისტრი. კანონი განურჩევლად ყველას ეხება", - განაცხადა თავდაცვის მინისტრმა, რომლის განცხადებებიც საქართველოს თავდაცვის სამინისტროს პრესსამსახურმა გაავრცელა.
