1
ივნისიდღის ზოგადი ასტროლოგიური პროგნოზი
პარლამენტის თავმჯდომარე დავით უსუფაშვილი აცხადებს, რომ "ერთხელ და სამუდამოდ უნდა დავიჯეროთ, რომ ძალადობით პრობლემები არ გვარდება და მოძალადე საბოლოო ჯამში მარცხდება".
ასე გამოეხმაურა დავით უსუფაშვილი 17 მაისს, რუსთაველის გამზირზე განვითარებულ მოვლენებს და აღნიშნა, რომ ეს დღე ძალიან მძიმე იყო და ამ დღიდან ყველამ დასკვნები უნდა გამოიტანოს.
"მაშინ გვექნება სახელმწიფო და მაშინ იგრძნობენ ჩვენი მოქალაქეები თავს დაცულად და თავისუფლად, როდესაც კანონის წინაშე იქნება თანასწორობა. კანონის წინაშე ყველას თანაბარი უფლება აქვს, მიუხედავად პოლიტიკური შეხედულებისა, კანის ფერის, ეთნიკური წარმომავლობის, რელიგიური აღმსარებლობის, მათ შორის რელიგიური ატრიბუტიკის ქონის თუ არქონის. სასულიერო პირებს, კანონმდებლობით გარკვეული პრივილეგიები და განსხვავებული რეჟიმი აქვთ მინიჭებული. მაგალითად, აღსარების საიდუმლოების გათქმა კანონით დაუშვებელია და სასულიერო პირს ვერავინ დაკითხავს მოწმედ იმ საქმეში, რაც ცნობილი მისი საეკლესიო მოვალეობის შერულების დროს გახდა. მაგრამ არც ერთი კანონი არ ამბობს იმას, რომ ვინმე არის თავისუფალი თუ დააზიანებს სხვა პირის ქონებას, გატეხავს მინას, ვიდეო კამერას ან ვიღაცას რაღაცას ჩაარტყამს. ასეთი იმუნიტეტი არავის გააჩნია, მათ შორის არც ერთი რელიგიის და პროფესიის წარმომადგენელს. აღნიშნულთან დაკავშირებით თავად სასულიერო პირებმა განაცხადეს, რომ თუკი ვინმემ გადაამეტა და არსებობს პრობლემა, მზად არიან პასუხი აგონ. თუკი ვინმემ რაიმე ემოციების გამო სხვაზე აყოლის თუ საკითხის ვერგარკვევის გამო კანონი დაარღვია, მაშინ ყველა ასეთმა პირმა პასუხი უნდა აგოს, - განუცხადა ჟურნალისტს დავით უსუფაშვილმა.
პარლამეტის თავმჯდომარემ აღნიშნა, რომ ადამიანებს სულ რამდენიმე თვის წინ ეკრძალებოდათ სხვა მიზნებით შეკრება, მიტინგის მოწყობა, ამა თუ იმ პირის გვერდით დგომა და მისი მხარდაჭერა და მაშინაც არსებობდა განცდა, რომ მათ სახელმწიფო ვერ იცავდა.
17 მაისს განვითარებულ მოვლენებს პარლამენტის 2 კომიტეტის ერთობლივ სხდომაზე მთავარი პროკურორის მოადგილე შოთა რეხვიაშვილი გამოეხმაურა.
"ვნახავთ კონკრეტულ პირებს, რომლებიც ჩადენილი დანაშაულის გამო ადეკვატურ პასუხს აგებენ", - აღნიშნა მთავარი პროკურორის მოადგილემ.
მან აღნიშნა, რომ 17 მაისის მოვლენებთან დაკავშირებით გამოძიება მიმდინარეობს.
