5
ივნისიდღის ზოგადი ასტროლოგიური პროგნოზი
საზეიმო და სადღესასწაულო დღეებში, როგორც წესი, პრობლემებზე არ საუბრობენ, მაგრამ მე არ შემიძლია გვერდი ავუარო ჩვენი ქვეყნის დიდ სატკივარს, - ამის შესახებ შინაგან საქმეთა მინისტრმა, ირაკლი ღარიბაშვილმა კარალეთში, პოლიციელის დღისადმი მიძღვნილ ღონისძიებაზე სიტყვით გამოსვლისას განაცხადა.
ღარიბაშვილის თქმით, ბედნიერია, რომ ამ დღესასწაულისადმი მიძღვნილ პირველ ღონისძიებას კარალეთში ხვდება, იმ ისტორიულ ადგილზე, რომელიც XI-XII საუკუნეებში შიდა ქართლის პოლიტიკური ცენტრი იყო.
"სწორედ ამ ადგილას, კარალეთში, აქ იდგა ჩვენი მეფე დავით აღმაშენებელი 1110 წელს და სწორედ აქედან იგერიებდა მტრის შემოსევებს. ყოველივე ამას იმიტომ შეგახსნებთ, რომ წამითაც არ უნდა დავივიწყოთ რა სტრატეგიული მნიშვნელობა ჰქონდა ამ ადგილს ერთიანი ძლიერი საქართველოსთვის.
საქართველოს შინაგან საქმეთა სამინისტროს, როგორც ერთ-ერთ მნიშვნელოვან სამართალდამცავ ორგანოს, მისი სტრუქტურული ერთეულის, სპეციალური და სანაგებო ღონისძიებათა ცენტრის განსაკუთრებულ დავალებათა დეპარტამენტის, შიდა ქართლის სამხარეო დანაყოფის პირად შემადგენლობას განსაკუთრებული მისია გაკისრიათ - ჩვენი ტერიტორიის ერთ-ერთი ულამაზესი ნაწილის, ცხინვალის რეგიონის ადმინისტრაციულ საზღვარზე საზოგადოებრივი წესრიგის დაცვა, აქ მცხოვრები მოსახლეობის უსაფრთხოების უზრუნველყოფა.
საზეიმო და სადღესასწაულო დღეებში, როგორც წესი, პრობლემებზე არ საუბრობენ, მაგრამ მე არ შემიძლია გვერდი ავუარო ჩვენი ქვეყნის დიდ სატკივარს. სულ რაღაც რამოდენიმე კილომეტრში მდებარეობს ცხინვალის რეგიონი. ოკუპირებული ტერიტორია, ეს არის ჩვენთვის ძალიან დიდი პრობლემა. ჩვენი სატკივარი, რომელიც გონივრული, თანმიმდევრული, მაღალ პროფესიული, მხოლოდ და მხოლოდ მშვიდობიანი, კეთილმეზობლური მიდგომით უნდა მოგვარდეს", - განაცხადა ღარიბაშვილმა.
მანვე პატივი მიაგო იმ რიგითი ოფიცრებისა და სამოქალაქო პირთა ხსოვნას, რომლებიც სამსახურებრივი მოვალეობის შესრულებისას და ტერიტორიული მთლიანობისთვის ბრძოლას შეეწირნენ და "ისინი ჩვენი ქვეყნის გმირები არიან".
"მე მინდა კიდევ ერთხელ მადლობა გადაგიხადოთ იმ თავდადებისთვის, რომლითაც ემსახურებით ჩვენს ქვეყანას. მჯერა, რომ ჩვენ კვლავაც ღირსეულად განვაგრძობთ სამსახურს და თუ საჭირო გახდება, სიცოცხლეს არ დავიშურებთ ჩვენი ქვეყნის საკეთილდღეოდ. ჩემი და არა მარტო ჩემი, ჩვენი უდიდესი სურვილია, უახლოეს მომავალში ჩვენს უწყებას აქ, ამ ადგილზე არ დასჭირდეს სამსახურეობრივი მოვალეობის შესრულება და საერთაშორისო სამართლით აღიარებული ტერიტორიების ფარგლებში, საქართველოს ყველა მოქალაქემ, მათ შორის ცხინვალის რეგიონის მკვიდრთაც, კვლავ ერთად გააგრძელონ მეგობრული, ძმური თანაცხოვრება", - დასძინა ღარიბაშვილმა.
