რით ამართლებს ნინო მუმლაძე საკუთარი გმირის საქციელს

ნინო მუმლაძეს, რომელიც სერიალში - "ჩემი ცოლის დაქალები" სტომატოლოგი ნათიას როლს ასრულებს, მსახიობობა ბავშვობიდანვე გადაწყვეტილი ჰქონდა. სპექტაკლში პირველად 4 წლის ასაკში მიიღო მონაწილეობა, მანამდე კი "კონცერტებს" შინ მართავდა. შესაბამისად, სასცენო გარეგნობაზე ზრუნვა ადრეული ბავშვობიდანვე დაიწყო, 13 წლისა კი მიხვდა, რომ იმაზეც უნდა ეფიქრა, თუ როგორ გამოიყურება ყოველდღიურად...

მაკიაჟი და სახის კანის მოვლა

- სხვადასხვა ვიზაჟისტთან მაკიაჟის გაკეთება ხშირად მიწევს და უკვე თავადაც ვისწავლე, ჩემს სახეს როგორი მაკიაჟი უხდება. თუ ზაფხულში ზღვაზე ვარ, ძირითადად, უმაკიაჟოდ დავდივარ - იქ ყოფნისას ნამზეურის მიღებაზე უფრო მეტად ვფიქრობ, ვიდრე - ტონალური კრემის წასმაზე...

ჯერჯერობით, სახის კანზე განსაკუთრებული ზრუნვა არ მჭირდება. მთავარია, მაკიაჟის ქვეშ ისეთი საცხი მესვას, რომელიც ჩემი კანის ტიპს შეესაბამება, ძილის წინ მაკიაჟის მოშორება აუცილებელია.

თმის ფერი და ვარცხნილობა

- თმა არასოდეს შემიღებავს. ჯერ ერთი, საღებავი თმის სტრუქტურას არღვევს და მეორეც: ეს ფულისა და დროის ფუჭ ხარჯვად მიმაჩნია. ალბათ, თმას მხოლოდ მაშინ შევიღებავ, როცა ბევრი ჭაღარა მექნება.

ვარცხნილობაზე ექსპერიმენტები ჩამიტარებია, მაგრამ მეუბნებიან, რომ ყველაზე მეტად ბუნებრივი კულულები მიხდება. საერთოდ, ბუნებრიობის მომხრე ვარ, მაგრამ მრავალფეროვნებისთვის, ხანდახან სპეციალური ჩარევებიც საჭიროა. ხუჭუჭა თმა რთულად "დასალაგებელია", მაგრამ ამას დამოუკიდებლად ვახერხებ. ზოგჯერ სალონსაც ვსტუმრობ და სპეციალისტები მეხმარებიან.

სერიალში ისეთი ვარცხნილობა მაქვს, გეგონება, თმა ხელის ერთი მოსმით შევიკარი. სინამდვილეში, ლაქსაც ვიყენებ, ჟელესაც და საკმაოდ ბევრ თმის სამაგრსაც (იცინის).

ვარჯიში და დიეტა

- ამჟამადაც დიეტას ვიცავ. ვინც ჩემს შემოქმედებას თვალყურს ადევნებს, ალბათ ახსოვს, რომ სერიალის - "ჩვენი ოფისი" დასრულების შემდეგ წონაში ძალიან მოვიმატე. შემდეგ "real TV"-ზე წამყვანად ვმუშაობდი. ერთ-ერთ გადაცემაში ელენე გიორგაძე მოვიწვიე. მან მითხრა: სხვებს რჩევებს რომ აძლევ, არ გინდა, ჩემთან, კლინიკაში თავად მოხვიდე და დაგეხმაროო? შემოთავაზებამ გამახარა, რადგანაც წონაში დაკლებას დამოუკიდებლად ვერ ვახერხებდი. ძალიან მკაცრი დიეტა დავიცავი. დაახლოებით 6 თვე დამჭირდა, რათა მიზნისთვის მიმეღწია.

- და საბოლოო ჯამში წონაში რამდენი კილო დაიკელი?

- 20 კილო. დიეტის დაცვა რთული იყო, მაგრამ საამისოდ ნებისყოფა მეყო. ექიმის მითითებას ზუსტად ვასრულებდი. ცეკვა მიყვარს, მაგრამ ვარჯიში - არა. წონაში რომ დავიკელი, სხეულს ფორმაში მოყვანა სჭირდებოდა, ამიტომ შარშან ზაფხულში აუზსა და ტრენაჟორებზე აქტიურად დავდიოდი. ზაფხულის მერე, სხეულის ფორმის შესანარჩუნებლად არავითარი ძალისხმევა არ დამჭირვებია, მაგრამ სერიალში გამოვჩნდი თუ არა, რამდენიმე კილოგრამით ისევ მოვიმატე. ეტყობა, დღის რეჟიმი ამერია და სასწრაფოდ, დიეტას მივმართე. ზედმეტი 3 კილოგრამის მოშორება შედარებით ადვილი აღმოჩნდა, თან - დიეტას ვარჯიშიც მივაშველე.

სამოსი

- მგონი, პირველად ვთამაშობ ისეთ პერსონაჟს, რომლის სამოსიც გარკვეულწილად, ჩემი ჩაცმის სტილს შეესაბამება. საერთოდ, უპირატესობას კონსერვატიულ სტილს ვანიჭებ. ნათიას მსგავსად, ღრმა დეკოლტე მეც მიყვარს. შეიძლება, ხანდახან "დახურული" სამოსიც მეცვას, მაგრამ ასეთ დროს მკვეთრი მაკიაჟი მაქვს გაკეთებული. რაც არ მიყვარს, ეს ძალიან ჭრელი სამოსია.

აქსესუარები, სამკაული...

- მრავალფეროვნება მიყვარს და ვცდილობ, სამოსის შესაფერისი სამკაული გავიკეთო. ზოგადად, საყურე ძალიან მომწონს და ყოველთვის მიკეთია, რასაც ყელსაბამებზე ვერ ვიტყვი. ბეჭედი და სამაჯურიც მიყვარს... თუ წითელი ჩანთა მიჭირავს, წითელ სათვალეს ვიკეთებ. მაქვს შავი და ყავისფერი სათვალეც. ქამარს იშვიათად ვიყენებ - გააჩნია, როგორი კაბა მაცვია.

საქმე

- ვიდრე სერიალში ნათიას როლზე დამამტკიცებდნენ, 5 თვე აბსოლუტურად უმუშევარი ვიყავი. სერიალის გარდა, არსად ვმუშაობ. ეს ცუდია, რადგან ადრე თუ გვიან, ჩემი როლი "ამოიწურება" და სამსახურის ძებნა დამჭირდება.

- როგორ ფიქრობ, ნათიას როლი მალე "ამოიწურება"? სერიალში მის გამოჩენას ტელემაყურებელთა აჟიოტაჟი მოჰყვა...

- იმედი მაქვს, რომ სერიალში კიდევ დიდხანს ვიქნები (იცინის). სიმართლე გითხრათ, რა მოხდება, წინასწარ არ ვიცი, მაგრამ არა მგონია, ნათია დათოს ცოლად გაჰყვეს.

- ნინო, პირველად სერიალში - "ჩვენი ოფისი" ფანატიკოსი და ფემინისტი ნუნუკას როლით გამოჩნდი, "ჩემი ცოლის დაქალებში" მოსიყვარულე ოჯახს "ანგრევ". რომელი როლი უფრო მეტად საინტერესოა?

- იმას, რომ ნუნუკა ფემინისტი იყო, ნათია კი ოჯახს ანგრევს, ჩემთვის, როგორც მსახიობისთვის, მნიშვნელობა არ აქვს, რადგან ნუნუკას როლს მსუბუქი ჟანრის სერიალში ვთამაშობდი, რომელიც მსახიობისგან დიდ ძალისხმევას არ მოითხოვდა; "ჩემი ცოლის დაქალებში" ვის როლს შევასრულებდი, გადამწყვეტი მნიშვნელობა არც ამას ჰქონდა: თავად ეს სერიალი ძალიან საინტერესო და "რეალურია"! ისე ვმუშაობთ, როგორც მხატვრულ ფილმზე. ფაქტობრივად, კინოგადაღებები გვაქვს და კვირაში 2 ფილმს ვუშვებთ. ცხადია, ეს გაცილებით საინტერესოა, ვიდრე "სიტუაციურ კომედიაზე" (როგორიც "ჩვენი ოფისი" იყო) მუშაობა. უფრო მეტ პასუხისმგებლობას ვგრძნობ, ყველა დეტალზე წინასწარ ვფიქრობ, ყოველი სიტყვის თქმისას ბუნებრივი უნდა ვიყო...

- ზოგჯერ პერსონაჟის ლანძღვიდან მისი როლის შემსრულებელი მსახიობის ლანძღვაზე გადადიან...

- ჯერჯერობით, პირადად ჩემთვის არავის უგინებია. ძირითადად, ნათიას წყევლიან. სოციალურ ქსელში ვიღაც წერდა, - დაულპეს ეგ ძუძუებიო! ძალიან ბევრი ვიცინე. სინამდვილეში, ეს ძუძუები ჩემია და არა - ნათიასი, მაგრამ ის ადამიანი ხომ ნათიას წყევლის და არა ნინო მუმლაძეს (იცინის)?! ჯერჯერობით, საქართველოში რეალობის შეგრძნება ისე არ დაუკარგავთ, რომ ვერ მიხვდნენ - ნინო მუმლაძე არაფერ შუაშია! კარგია, რომ ჩემმა გმირმა მაყურებლების ასეთი აჟიოტაჟი გამოიწვია და ნათიას საქციელი ასე აღელვებთ. გარკვეულწილად, ეს ჩემთვის კომპლიმენტია, ე.ი. როლს დამაჯერებლად ვასრულებ.

- ნათიას საქციელს ამართლებ?

- ნათიამ ცოლშვილიან კაცთან გააბა ურთიერთობა, დათოს ოჯახურ მდგომარეობაზე თვალი დახუჭა. ვფიქრობ, ის ემოციებით მოქმედებს და არა - ტვინით, მაგრამ ვერც იმას ვიტყვით, რომ შტერია. ამ შემთხვევაში, გრძნობებს აჰყვა და რეალობას "გაექცა". მისი რომანის შესახებ იმაზე მეტმა ადამიანმა შეიტყო, ვიდრე თავად უნდოდა... თუ დააკვირდებით, თავდაპირველად, ნათიას დათოსთვის ოჯახის დანგრევა არც უფიქრია და ცოლის მიტოვებას არც დათო აპირებდა...

ოჯახი

- ოჯახში 5 ქალი ვართ: მე, ჩემი და, რომელიც ჩემზე 4 წლით უმცროსია (ის რუსული დრამატული თეატრის მსახიობი გახლავთ), მუსიკოსი დედა, დეიდა (საჯარო ბიბლიოთეკის თანამშრომელი) და ბებია, რომელიც ოჯახურ სითბოს წლების განმავლობაში გვინარჩუნებს.

სამწუხაროდ, ბაბუა - 8 წლისას, 12 წლის ასაკში კი მამაც გარდამეცვალა. ჰოდა, მას შემდეგ ქალები ერთად ვცხოვრობთ - ოჯახში "ქალური კოლექტივი" გვაქვს (იცინის).

პირადი ცხოვრება

- რეალურად, ისეთ სიტუაციაში არასდროს აღმოვჩენილვარ, როგორშიც ჩემი გმირია და ალბათ, არც არასდროს აღმოვჩნდები. გამოგიტყდებით და ვიცნობ ცოლიან მამაკაცებს, რომლებსაც ჩემ მიმართ სიმპათიები გამოუხატავთ, მაგრამ ასეთ ადამიანებთან ურთიერთობის დაწყების სურვილი არ მაქვს. თუკი მამაკაცი არ მაინტერესებს, ვცდილობ, საშუალება არ მივცე, რომ დიდხანს მდიოს და "მეპაკლონიკოს". თავიდანვე ვაგრძნობინებ, რომ ჯობია, შემეშვას. იმ გოგონების საქციელი მაღიზიანებს, რომლებიც თაყვანისმცემლებს "წველიან". მიმაჩნია, რომ ეს კარგი ადამიანის საქციელი არ არის.

- შენს პირად ცხოვრებაში რა ხდება? შენს ყურადღებას როგორი ბიჭები იქცევენ?

- ამ ეტაპზე, არაფერი ხდება. ხშირად ისეთი ადამიანი გვიყვარდება, რომელზეც ვერასოდეს ვიფიქრებდით - ეს ჩვენდა უნებურად ხდება. ალბათ, მთავარი ურთიერთობის კარგად აწყობა და ნდობაა...

დასვენება და გართობა

- აქტიური დასვენება მიყვარს. ვცდილობ, შვებულება ზღვაზე, მეგობრებთან ერთად გავატარო და რაც შეიძლება მეტ კლუბში ვიარო. ქალაქგარეთ ხმაურიანი გასვლაც მიყვარს, თუმცა ზოგჯერ ამ ყველაფრით ვიღლები და მირჩევნია, შინ ვიყო, ფილმს ვუყურო, წიგნი წავიკითხო, რაღაც დავხატო, დავწერო... ბოლო რამდენიმე წელია, კულინარიამ გამიტაცა: სხვა ქვეყნების სამზარეულოც მაინტერესებს, კერძებს საკუთარი ფანტაზიითაც ვამზადებ...

ეთო ყორღანაშვილი

ჟურნალი ”გზა”

(გამოდის ხუთშაბათობით)