25
მაისიდღის ზოგადი ასტროლოგიური პროგნოზი
22-23 ივნისს საქართველოში საერთაშორისო მუსიკალური ფესტივალი "ოაზისი" გაიმართება. როგორც "ამბები.გე"-ს ფესტივალის ორგანიზატორებმა აცნობეს, საქართველოს რუსული ჯგუფი "მუმი ტროლი" ეწვევა.
მუსიკალურ ფესტივალთან დაკავშირებით დღეს კაფე "ლაუნჯ ქიუში" პრესკონფერენცია გაიმართა, რომელზეც ფესტივალის მთავარი სტუმრები და ჰედლაინერი გახდა ცნობილი. საერთაშორისო ფესტივალი "ოაზისი" კომპანიების "ემ ეს ივენთსისა" და "ლაიფ კონცერტის" ორგანიზებით ჩატარდება.
ორი დღის განმავლობაში მცხეთის თეატრონის მიმდებარე ტერიტორიაზე კონცერტებს ცნობილი ევროპული ჯგუფები "ჯაკუზი" (გერმანია), "ჯუვენილს" (საფრანგეთი), "ჰუმეიდჰუ" (დანია) და "ლაუდსფიქერსი" (საქართველო) გამართავენ.
კომპანია "ემ ეს ივენთსის" გენერალური დირექტორის, მაკო საბანაძის განცხადებით, ფესტივალის განმავლობაში მსმენელებს გემოვნებით შერჩეულ მუსიკასთან ერთად, შესაძლებლობა მიეცემათ ოჯახის წევრებთან ერთად დაუვიწყარი დრო გაატარონ.
ფესტივალის ფარგლებში მცხეთის "თეატრონთან" სპორტული ღონისძიებები, ხელნაკეთი ნივთების გამოფენა, კვების ობიექტები განლაგდება. იქვე განთავსდება კენპინგის ზონა.
კომპანია "ლაივ კონცერტის" გენერალური დირექტორი კირილ ხიმიჩევსი ფესტივალისათვის სპეციალურად ჩამოვიდა საქართველოში.
მისი თქმით, "ოაზისი" საქართველოში მცხოვრები გემოვნებიანი მსმენელისათვის სპეციალურად მომზადდა, იდეა კი შარშან ზემფირას კონცერტზე სტუმრობისას გაუჩნდა, როდესაც იგი ცნობილი რუსი მომღერლის ტურ-მენეჯერი იყო და მასთან ერთად ეწვია საქართველოს. მაკო საბანაძემ მას მცხეთა დაათვალირებინა და "ოაზისის" ანუ მცხეთის "თეატრონის" ნახვისთანავე იდეაც გაჩნდა.
ფესტივალის ბილეთების გაყიდვა 15 მაისიდან დაიწყება. გაყიდვაში მხოლოდ 8000 ბილეთი იქნება, რომლთაგან პირველ 1000 ბილეთს მსურველები 19 ლარად შეიძენენ. ბილეთების ყიდვა შესაძლებელია ინტერნეტით, ფესტივალის ოფიციალურ გვერდზე WWW.OASIS-FESTIVAL.GE, ასევე "საქართველოს ფოსტის" პრესის ჯიხურებში და "საქართველოს ბანკის" სწრაფი გადახდის (EXPRESS PAY) აპარატებიდან.
გიორგი ბერიძე
