4
მაისიდღის ზოგადი ასტროლოგიური პროგნოზი
დაივიწყეთ, რომ ვარსებობ, მაგრამ გაიხსენეთ, რომ საქართველოს სჭირდება განათლებული თაობა, - ამის შესახებ საქართველოს პრეზიდენტმა ბათუმში, ტექნოლოგიური უნივერსიტეტისთვის განკუთვნილი შენობის დათვალიერების შემდეგ განაცხადა.
მიხეილ სააკაშვილმა პრემიერ-მინისტრს უნივერსიტეტისთვის სტატუსის დაბრუნებისკენ მოუწოდა და უმაღლესი სასწავლებლის მნიშვნელობაზე გაამახვილა ყურადღება.
"საქართველოს ასეთი სასწავლებელი ჰაერივით სჭირდება. დღეს ჩვენ ვართ კონკურენციაში თანამედროვე ტექნოლოგიებთან. როცა შევქმენით სამხედრო ტექნიკა – "ლაზიკა" და "დიდგორი" და უპილოტო საფრენი აპარატები, სწორედ მაშინ გაგვიჩნდა აზრი, რომ გვჭირდება სახლში გაზრდილი მსოფლიო კლასის ინჟინრები, რადგან ქართველებს თუ მხოლოდ უცხოეთში გავუშვებთ სასწავლებლად, მათგან საუკეთესოებს იქაური უნივერსიტეტი ან ფირმა დაიტოვებს. ჩვენ გვჭირდება, რომ ხალხი აქ იყოს და აქ სწავლობდეს. ამიტომ გაჩნდა აზრი, რომ ეს უნივერსიტეტი გვჭირდება. ჩვენ ავაშენეთ მსოფლიო არქიტექტურული შედევრი, ყველაზე საამაყო შენობა საქართველოში და ყველაზე მაღალი შენობა კავკასიაში, როგორც სიმბოლო იმისა, რომ ყველაზე კარგს ვაძლევთ განათლებას და ყველა რესურსს ვდებთ განათლებაში", - განაცხადა სააკაშვილმა.
პრეზიდენტმა უნივერსიტეტის ბათუმში აშენების მოტივიც განმარტა და აღნიშნა, რომ ის ქალაქის გაცოცხლებისთვის უმნიშვნელოვანესია.
"ჩვენ მივაღწიეთ იმას, რომ სეზონი გახდა 6 თვე, თუმცა დანარჩენი 6 თვე ქალაქი უნდა ცხოვრობდეს. მთელი ინფრასტრუქტურა – კაფეები, პატარა მაღაზიები, ის, რაც ხალხს ასაქმებს, ვიღაცამ უნდა გამოიყენოს. სიცოცხლე უნდა იყოს და ამისთვის აქ ჩამოვა ბევრი უცხოელი სტუდენტი, პროფესორი და ისწავლის ასევე ბევრი ქართველი სტუდენტი. ქალაქის გაცოცხლებისთვის ეს არის სასიცოცხლოდ მნიშვნელოვანი. ქართველი სტუდენტების 80% აქ ისწავლიდა უფასოდ და მიიღებდა უმაღლესი კლასის განათლებას, მათ შორის ისეთი ოჯახების შვილები, ვისაც სწავლის საფასურის გადახდის საშუალება არ აქვს. ამიტომ მე არ მესმის, როგორ შეიძლება ამ შენობაში მერიის განთავსება და უნივერსიტეტის გამოსახლება. რისი სიმბოლოა ეს, როგორ უნდა მოხდეს ამის გამართლება. მსოფლიოს ნებისმიერი მერია ინატრებდა, ასეთი უნივერსიტეტი მის ქალაქში ყოფილიყო. უნივერსიტეტს მოჰყვება განვითარება, პრესტიჟი, ინვესტიცია და ამის მაგივრად მერიამ გაასახლა უნივერსიტეტი და სახლდება თვითონ. მხოლოდ მერია კი არა, მათ შორის დასუფთავების შპს უნდა შესახლდეს ამ ლამაზ შენობაში თავისი ინსტრუმენტებით და მოწყობილობებით. თალიბანიზმის გარდა ამას სამწუხაროდ ვერაფერს ვუწოდებ", - განაცხადა სააკაშვილმა.
პრეზიდენტმა პრემიერ-მინისტრს მოუწოდა, გადახედოს ამ გადაწყვეტილებას, წინააღმდეგ შემთხვევაში, შენობიდან მერიას ოდესმე მაინც გაასახლებენ.
"თუ ის არ გადახედავს, ადრე თუ გვიან მაინც გადავხედავთ, მაინც გავუშვებთ მერიას აქედან და მაინც დავაბრუნებთ აქ უნივერსიტეტს, მაგრამ ამაში დროს დავკარგავთ. ახლა ჯიბრის, ჯინის და სააკაშვილის საწინააღმდეგო ქმედებების დრო არ არის. დაივიწყეთ, რომ ვარსებობ, მაგრამ გაიხსენეთ, რომ საქართველოს სჭირდება განათლებული თაობა, განვითარება და ხვალინდელი დღე. ამ უნივერსიტეტს გადარჩენა სჭირდება და ამ ქალაქისთვის და ჩვენი ქვეყნისთვის ეს სასიცოცხლოდ მნიშვნელოვანია. პრაქტიკულად ყველაფერი, რაც მოვაწყვეთ – ლაბორატორიები, ტექნიკა, ავეჯი, ყველაფერი ჩამოუგლეჯიათ, ჩამოუფხრეწიათ, გაუტანიათ და სადღაც წაუღიათ. შევარდნენ, როგორც დამპყრობლები და წაიღეს ყველაფერი, რაც უნივერსიტეტისთვის იყო გამზადებული. არ ვიცი ამას რა ჰქვია და როგორ შეიძლება XXI საუკუნეში არათუ ხელისუფალი, არამედ ნებისმიერი ადამიანი ამას აკეთებდეს", - აღნიშნა პრეზიდენტმა.
მიხეილ სააკაშვილის თქმით, 8 ათასი კვადრატული მეტრი უნივერსიტეტს მხოლოდ აუდიტორიებისთვის აქვს გამოყოფილი და ყველაფერი გათვლილია იმისთვის, რომ შენობამ სრულფასოვანი საუნივერსიტეტო ცხოვრებით იფუნქციონიროს.
"ეს არის საუნივერსიტეტო შენობა და არანაირად არ არის მორგებული მერიაზე, რადგან აქვს ბევრი სხვა რამ, რაც მერიას საერთოდ არაფერში სჭირდება", - აღნიშნა სააკაშვილმა.
