11
ივლისიდღის ზოგადი ასტროლოგიური პროგნოზი
"ხელისუფლებაში ყოფნა დიდი ტვირთი და პასუხისმგებლობაა", - ამბობს პარლამენტარი გია ცაგარეიშვილი და იმასაც აღიარებს, რომ წინა ხელისუფლების წევრებთან თანაცხოვრება უჭირს. როდის კარგავს წონასწორობას, რა აღიზიანებს ყველაზე მეტად, როგორ რეაგირებს კრიტიკაზე, რა ვერ ისწავლა დღემდე და რის გამოა ბედნიერი? - ამ ყველაფერს მის მიერ დასრულებული წინადადებებიდან შეიტყობთ.
- დაბადების თარიღი...
- ...1969 წლის 7 მარტი.
- ბავშვობაში მინდოდა გამოვსულიყავი...
- ...გამომძიებელი.
- ჩემს წარმატებაში ყველაზე დიდი წვლილი მიუძღვის...
- ...ჩემს მეუღლეს, რომელიც გვერდიდან ერთი წუთითაც არ მომშორებია. 10 წლის მანძილზე არაერთი განსაცდელიც გვქონდა, მაგრამ რთული დღეები ერთმანეთის თანადგომით გადავიტანეთ.
- ბედნიერი ვარ, რომ...
- ...ჩემს ხალხს ვემსახურები, რომ ამის საშუალება მაქვს.
- თვისება, რომელიც ჩემში ყველაზე მეტად მომწონს...
- ...გულწრფელობა გახლავთ.
- ეს თვისება პოლიტიკაში...
- ...ყოველთვის არ ამართლებს, მაგრამ მიმაჩნია, რომ ადამიანები ამას გრძნობენ და აფასებენ. პოლიტიკურ საქმიანობაში გულწრფელობა ის იარაღია, რომლის წყალობითაც აუცილებლად გაიმარჯვებ - ეს საკუთარ თავზე გამოვცადე.
- თვისება, რომელიც არ მომწონს და ვცდილობ, გამოვასწორო...
- ...სიფიცხეა. ხომ იცით, იმერელი ვარ (იღიმის)... ძნელია ემოციები მოთოკო, როცა შენგან 10 მეტრში სხედან ადამიანები, რომლებიც დამნაშავეები არიან (ჩემი აზრით!) და მე მათთან კოაბიტაცია უნდა მოვახდინო. ისინი კანონებს ყოველდღე არღვევდნენ. ჰოდა, ეს უნდა ეპატიოთ? ვაღიარებ, დამნაშავეებთან თანაცხოვრება ძალიან მიჭირს.
- ცხოვრებას თავიდან რომ ვიწყებდე...
- ...ალბათ შეცდომებს აღარ დავუშვებდი. ბევრი შეცდომა დამიშვია თუ არა? ბევრი - არა, მაგრამ საკმარისად. ჩემი შეცდომები მხოლოდ პოლიტიკას კი არა, ადამიანურ ურთიერთობებსაც უკავშირდება.
- როცა მარტო ვარ...
- ...ვცდილობ, რაც შეიძლება მეტი წიგნი წავიკითხო.
- დაშვებულ შეცდომებს...
- ...ვინანიებ.
- ვერაფრით ვისწავლე...
- ...რა ვიცი, რა გითხრათ (პაუზის შემდეგ)... ღალატი? არა, ღალატი არც უნდა ისწავლო და მგონი, არც ისწავლება, ეს ადამიანის ქვენა გრძნობაა. ვერაფრით ვისწავლე უკან დახევა. ძალიან მიზანდასახული და პრინციპული ვარ. გზაზე რა საფრთხეც უნდა შემხვედროდა, ბავშვობიდან დღემდე, ჩემი სიჯიუტე ყოველთვის წინსვლისკენ მიბიძგებდა. ამის გამო მინანია თუ არა? ზოგჯერ მინანია კიდეც, მაგრამ დროთა განმავლობაში ეს სინანული სხვა გრძნობაში ტრანსფორმირდებოდა.
- ცრუმორწმუნე არ ვარ, მაგრამ....
- ...როგორც ადამიანების უმეტესობას, ზოგჯერ ყურადღება უმნიშვნელო დეტალისთვის მიმიქცევია; ხეზე სამჯერ დამიკაკუნებია.
- დათმობა შემიძლია თუ...
- ...დამარწმუნებ, რომ შენ უფრო მართალი ხარ, ვიდრე - მე.
- როცა მომავალზე ვფიქრობ...
- ...ძალიან ვნერვიულობ. ხელისუფლებაში ყოფნა დიდი პასუხისმგებლობაა. ვნერვიულობ, როცა საქმე ისე ვერ კეთდება, როგორც ვისურვებდი. ადამიანები გამუდმებით პრობლემებზე მელაპარაკებიან, მე კი შეძლებისდაგვარად ვცდილობ, ყველას დავეხმარო. ქართველები ცოტა სულსწრაფებიც ვართ; ზოგჯერ ადამიანებს არ ესმით, რომ რაღაცის გაკეთება არ შეგიძლია.
- ადამიანები ხელისუფლებაში მოხვედრისთვის იმიტომ იბრძვიან, რომ...
- ...ადამიანი სრულყოფილებისთვის იბრძვის! ზოგს ჰგონია, რომ სრულყოფილებას პოლიტიკაში მიაღწევს, არადა, ეს მახეა. სულმდაბალი თუ ხარ, სრულყოფილებას ვერსად და ვერასდროს მიაღწევ.
- ჩემთვის ხელისუფლებაში ყოფნა....
- ....დიდი ტვირთი და პასუხისმგებლობა გახლავთ. თუ წესიერი ადამიანი ხარ და ქვეყანა გიყვარს, ეს რთული საქმე სულაც არ არის; თუ საკუთარი ხალხი არ გიყვარს, შეიძლება ხელისუფლებაში ყოფნა განსაცდელიც კი იყოს შენთვის. ზუსტად ვიცი, მე ეს არ მემუქრება. შეიძლება შემეშალოს, მაგრამ დანაშაულს შეგნებულად არ ჩავიდენ. მერწმუნეთ, პოლიტიკაში ამ განცდით მოვედი.
- არავისთან ვსაუბრობ...
- ...არსებობს თემები, რომლებზეც ოჯახის გარეთ არავისთან ვლაპარაკობ და არსებობს თემები, რომლებიც სამეგობროს იქით არ უნდა გავიდეს. ახლა "თავისუფალი დემოკრატების" სათათბირო ოთახში ვიმყოფებით. ჰოდა, არის თემები, რომლებიც ამ ოთახის გარეთ არ გადის, მაგრამ ისიც ვიცი, რომ პოლიტიკოსის ცხოვრება შუშასავით გამჭვირვალე უნდა იყოს და მიმაჩნია, რომ ჩემი ცხოვრება სწორედ ასეთია. მე საზოგადოებისთვის დასამალი არაფერი მაქვს.
- როცა ჩემი მისამართით კრიტიკას ვისმენ...
- ...ვერ ვიტყვი, რომ ამას ყურადღებას არ ვაქცევ. კრიტიკა ყოველთვის მტკივნეულია. ვფიქრობ, კრიტიკას ან კრიტიკითვე უნდა უპასუხო, ან არგუმენტით, ან საზოგადოების წინაშე უბრალოდ, ბოდიში მოიხადო.
- კრიტიკის შედეგად ერთი საფეხურით მაღლა...
- ...ავსულვარ. ჩემზე ამბობდნენ: სააკაშვილმა, ადეიშვილმა, მერაბიშვილმა იყიდაო. ბოლოს აღმოჩნდა, რომ გაყიდული არ ვიყავი.
- რჩევებს ყველაზე ხშირად მაძლევს...
- ...მეუღლე. ის ჩემს გამოსვლებს ხშირად ადევნებს თვალს. სამოსს ყოველთვის თავად ვიძენ. ჩაცმისას რჩევებს იშვიათად მაძლევს.
- მის ჩაცმულობაში...
- ...არც მე ვერევი.
- მიყვარს, როცა...
- ...სარკის წინ დგას და ტრიალებს. ქალი სარკის წინ, მამაკაცისთვის დიდი გამოწვევაა. ყოველთვის მეკითხება, - მიხდება? ეს კარგია, მამაკაცს ღირსებას სძენს. ეკას ყოველთვის მოხდენილად აცვია. მას საყიდლებზე არ დავყვები, მაგრამ ჩემს გემოვნებას ენდობა, განსაკუთრებით - სუნამოებში.
- სიყვარული ეს...
- ...ცხოვრებაა. არსებობდე და არ გიყვარდეს, ჩემთვის წარმოუდგენელია.
- როცა შეყვარებული ვარ...
- ...ვიდრე მომავალ მეუღლეს გავიცნობდი, გატაცებები მქონდა. მერე ეკას შევხვდი და ბოლო 22 წელია, მასზე შეყვარებული ვარ. სიყვარული ცხოვრებაზე წარმოდგენას ცვლის. მერე შვილები ჩნდებიან და პასუხისმგებლობა გიასმაგდება. როცა თავად ხდები მშობელი, დედ-მამისადმი დამოკიდებულებაც გეცვლება; სხვაგვარად უყურებ ყველაფერ იმას, რასაც ისინი შენთვის წლების მანძილზე აკეთებდნენ.
- ვოცნებობ...
- ...დაწყნარებულ საზოგადოებაზე, ქვეყანაზე. ჩვენი დაკარგული ტერიტორიების დაბრუნება ბევრი ქართველის ოცნებაა და დღე არ გავა, ამაზე მეც არ ვიფიქრო.
- ამ წუთში ძალიან მინდა ვიყო...
- ...უახლოეს მეგობრებსა და ოჯახის წევრებთან ერთად, რომელიმე კარგ ქალაქში. ახლა მივხვდი, დასვენება მომნატრებია (იცინის).
- წონასწორობიდან ჩემი გამოყვანა შეუძლია...
- ...მატყუარა, ფლიდ ადამიანებს. როგორ ვრეაგირებ? - იმ სიფიცხესთან მივდივართ, რომელზეც ინტერვიუს დასაწყისში ვლაპარაკობდით.
- ყოველთვის შეუძლია კარგ ხასიათზე დამაყენოს...
- ...კარგმა წიგნმა, ფილმმა, მუსიკამ, მეგობრებმა.
- მეზარება...
- ...არც კი ვიცი, რა მეზარება - ეს ჩემი თვისება ნამდვილად არ არის. ზოგადად, მეზარება იმის კეთება, რაც არ მინდა გავაკეთო, მაგრამ სავალდებულოა.
- არ მჩვევია...
- ...ღალატი.
- არ მრცხვენია...
- ...წარსულის.
- ვერავინ მაიძულებს...
- ...გავურიგდე უსამართლობას და საკუთარ პრინციპებს ვუღალატო.
- არ მეგონა თუ...
- ...იმ სიცრუეს, რომელსაც სააკაშვილის მმართველობა ერქვა, 9 წლის მანძილზე ავიტანდით.
- როცა ამბობენ, პოლიტიკა ბინძური საქმეაო...
- ...არ ვეთანხმები. ბინძური ადამიანისთვის ყველაფერი ბინძურია.
- როცა საჯაროდ მაქებენ...
- ....უხერხულ მდგომარეობაში ვვარდები.
- მსაყვედურობენ...
- ...ჩემი გულფიცხობის გამო. ჩემი მეუღლე ხშირად მიმეორებს: თავი შეიკავე, ნუ უპასუხებ, "გაატარე". არადა, როგორია, "გაატარო"?
- ჩემი ცხოვრების ყველაზე დიდი ტკივილი...
- ...მამისა და მეგობრების დაკარგვაა. ღმერთმა ყველა ნათელში ამყოფოს.
- ვუფრთხილდები...
- ...ადამიანებს, ურთიერთობებს. ეს ყველაზე მნიშვნელოვანია, რაც კი ცხოვრების მანძილზე შემიძენია.
- დაბოლოს, გეტყვით...
- ...იმედიანად იყავით.
თამუნა კვინიკაძე
(გამოდის ხუთშაბათობით)
