დავით მაღრაძე - "პრეზიდენტობა ჩემს საკუთარ სივრცეში არაფერ სასიკეთოს არ მოიტანს"

პოეტი დავით მაღრაძე კოალიცია "ქართული ოცნების" საპრეზიდენტო კანდიდატად მისი კანდიდატურის განხილვას უარყოფს. როგორც მაღრაძემ "ინტერპრესნიუსს" განუცხადა, აღნიშნულთან დაკავშირებით შეთავაზება არც მიუღია და არც ელოდება.

"არაფერი არ ვიცი ამის შესახებ. არავითარი შეთავაზება არ მიმიღია, გაუგებრობას აქვს ადგილი. არც ველოდები ამ შეთავაზებას. სხვა მნიშვნელოვანი საქმეები, ძალიან დატვირთული შემოქმედებითი გრაფიკი მაქვს და არ ვუჩივი ჩემს ბედ-იღბალს. პრეზიდენტობა ჩემს საკუთარ სივრცეში არაფერ სასიკეთოს არ მოიტანს, ამიტომ არ ვფიქრობ ამაზე", - განაცხადა დავით მაღრაძემ.

"ინტერპრესნიუსის" ინფორმაციით, კოალიცია "ქართულ ოცნებაში" პრეზიდენტობის კანდიდატებად ამერიკაში მცხოვრები ქართველი მეცნიერის, გია დვალისა და პოეტ დავით მაღრაძის კანდიდატურებიც განიხილება. აღნიშნულთან დაკავშირებით კონსულტაციები უკვე მიმდინარეობს, საბოლოო გადაწყვეტილება მიღებული არ არის, თუმცა პრემიერ-მინისტრი ორივეს მიმართ დადებითად არის განწყობილი.

ამასთან, კოალიციის პოლიტსაბჭო 11 ან 12 მაისს შეიკრიბება და საბოლოო გადაწყვეტილებას 13 მაისს გამოაცხადებს.

"ინტერპრესნიუსი"