20
ივნისიდღის ზოგადი ასტროლოგიური პროგნოზი
ექსპერტები დავით კირვალიძის გადადგომის პოლიტიკურ მიზეზებს გამორიცხავენ და მიიჩნევენ, რომ ეს ფაქტი ვახტანგ ხმალაძესთან მის ნათესაობას არ უკავშირდება.
როგორც "ინტერპრესნიუსს" პოლიტოლოგმა სოსო ცისკარიშვილმა განუცხადა, ვახტანგ ხმალაძის და მისი ოჯახის წევრების კორუფციულ სქემებთან დაკავშირება შეუძლებელია.
"ეს ძალიან არათავსებადი თემებია. დავით კირვალიძემ უპირველეს ყოვლისა, ზნეობრივი ნაბიჯი გადადგა და ამით პრაქტიკულად დაადასტურა საკუთარი მაღალი მოქალაქეობრივი პასუხისმგებლობა. ეს ამ ოჯახისთვის გასაკვირი არ არის. ამდენად, გამიჭირდება, როგორმე დავაკავშირო საპრეზიდენტო არჩევნებში ვახტანგ ხმალაძის შესაძლო მონაწილეობა სოფლის მეურნეობის სამინისტროში მიმდინარე პროცესებთან. ვფიქრობ, შენარჩუნებულია სრულად ის ავტორიტეტი, რომელიც ვახტანგ ხმალაძესა და მისი ოჯახის წევრებს აქვთ. საგამოძიებო მოქმედებებიც მიგვანიშნებს იმის აუცილებლობაზე, რომ ამ ეტაპზე მინისტრის უფლებამოსილება შეჩერებულიყო", - განაცხადა სოსო ცისკარიშვილმა.
კითხვას, შესაძლოა თუ არა ამ ფაქტმა ხელი შეუშალოს ვახტანგ ხმალაძის საპრეზიდენტო კანდიდატად დასახელებას, სოსო ცისკარიშვილმა უპასუხა, რომ მისი ინფორმაციით, ვახტანგ ხმალაძის საპრეზიდენტო კანდიდატობის პერსპექტივა არ დასტურდება.
"ეს მას შემდეგ, რაც მიღებულია გადაწყვეტილება, რომ მომავალ პრეზიდენტს აირჩევს არა პარლამენტი, არამედ – საქართველოს მოსახლეობა", - აღნიშნა ცისკარიშვილმა.
დავით კირვალიძის გადადგომის პოლიტიკურ მიზეზებს სრულად გამორიცხავს რამაზ საყავრელიძეც. პოლიტოლოგის თქმით, ვახტანგ ხმალაძე პრეზიდენტობის შესაძლო კანდიდატად პრემიერ-მინისტრმა დაასახელა და მასვე შეეძლო, გადაწყვეტილება შეეცვალა.
"შიგნით ბრძოლა რა საჭიროა, როდესაც ამ საკითხში გადამწყვეტი ხმა პრემიერს ეკუთვნის. ამავდროულად, თანამდებობის დატოვება არ მომხდარა ისე, რომ ოდნავ მაინც შებღალულიყო დავით კირვალიძის ღირსება. ოპონენტებიც კი დადებითად აფასებენ იმ ნაბიჯს, რომელიც კირვალიძემ გადადგა. ამ კონტექსტში, ვერსია, რომ ამ ყველაფრის მიღმა იყო პოლიტიკური ჩანაფიქრი, ქმედითი არ არის. თავი რომ დავანებოთ იმას, რომ ვახტანგ ხმალაძე არ არის ისეთი ტიპის პიროვნება, რომ თანამდებობის გამო სირთულეები შეექმნა ვინმესთვის და სულ არ იყო საჭირო ასეთი ჩახლართული კომბინაცია", - აღნიშნა საყვარელიძემ.
მომხდარის პოლიტიკურ მოტივებს ვერ ხედავს გია ხუხაშვილი. როგორც მთავრობის მრჩეველმა "ინტერპრესნიუსს" განუცხადა, ეს არადამაჯერებელია თუნდაც იმიტომ, რომ დავით კირვალიძის გადაყენების საკითხი მთავრობას არ დაუსვამს და კირვალიძემ პოლიტიკური პასუხისმგებლობა საკუთარი ნებით აიღო.
"ეს ძალიან ღირსეული ნაბიჯია. დავით კირვალიძე არც გათავისუფლებულა. მას საკითხის გარკვევამდე უფლებამოსილება შეუჩერდა. აქედან გამომდინარე, შორსმიმავალი დასკვნების გაკეთება ჩემი აზრით არასწორია. თუ საუბარია იმაზე, რომ ეს რაღაცნაირად აზიანებს ვახტანგ ხმალაძეს, ესეც გაუგებარია. როგორ შეიძლება პასუხისმგებლობები ასე გადადიოდეს. საქართველოში ყველა ყველას ნათესავი და ახლობელია. არ ვფიქრობ, რომ ეს დამაჯერებელი არგუმენტია. ვახტანგ ხმალაძის წესიერებასა და პატიოსნებაში ეჭვი არავის ეპარება. რაც შეეხება საპრეზიდენტო კანდიდატად მის განხილვას, ბოლო პერიოდში, ვფიქრობ, სხვა კანდიდატებიც წამოვიდნენ და არც ყოფილა საბოლოო გადაწყვეტილება მიღებული, რომ ხმალაძე იქნებოდა კოალიციის საპრეზიდენტო კანდიდატი. თუ ეს ასე არ მოხდა, ამისთვის კოალიციას სხვა მოტივები ექნება, რაც კირვალიძის თემას ნამდვილად არ დაუკავშირდება ", - განაცხადა ხუხაშვილმა.
დავით კირვალიძის გადადგომის შესაძლო პოლიტიკურ მიზეზებზე კონსტიტუციონალისტმა ვახტანგ ძაბირაძემ "ინტერპრესნნიუსთან" ინტერვიუში გუშინ ისაუბრა.
"კირვალიძის გათავისუფლება პოლიტიკურ ელფერს იმის გამოც იძენს, რომ იგი "ქართული ოცნების" პრეზიდენტობის ერთ-ერთი სავარაუდო კანდიდატის, ვახტანგ ხმალაძის სიძეა. ამიტომ, ვახტანგ ხმალაძე პრეზიდენტობის კანდიდატი ვეღარ იქნება.
არ გამოვრიცხავ, ვიღაცამ დროზე ადრე იაქტიურა, რომ ვახტანგ ხმალაძის კანდიდატურა "ქართული ოცნების" პრეზიდენტობის სავარაუდო კანდიდატთა შორის აღარ განიხილებოდეს. ამას არ გამოვრიცხავ იმის გამო, რომ პრეზიდენტობის კანდიდატთა დასახელების დრო მოახლოებულია. სხვა მხრივ, არანაირად არ შემაქვს ეჭვი იმაში, რომ ის რაც გაკეთდა სოფლის მეურნეობის სამინისტროში, სპეციალურად გაკეთდა, ამას ნამდვილად არ ვამბობ", - აღანიშნა ძაბირაძემ.
