BBC-ის წამყვანმა ბავშვების გარყვნა აღიარა

BBC-ის სპორტულმა კომენტატორმა სტუარტ ჰოლმა ბავშვების გარყვნაში საკუთარი ბრალეულობა აღიარა. ამის შესახებ BBC News-ი იტყობინება.

83 წლის ჰოლს ბრალს დებენ 9-დან 16 წლამდე 13 ბავშვზე თავდასხმაში. აღსანიშნავია, რომ ეს გოგონები მისი მეგობრების ქალიშვილები იყვნენ. ზოგ გოგონას ჟურნალისტი მკერდზე ავლებდა ხელს, ზოგსაც ტუჩებში კოცნიდა. ხსენებული დანაშაულები წამყვანმა 1967-1986 წლებში ჩაიდინა.

გარდა ამისა, სტუარტ ჰოლს 1976 წელს 22 წლის ქალის გაუპატიურებაში ედებოდა ბრალი, თუმცა დაზარალებულმა ჩვენების მიცემაზე უარი განაცხადა.

როგორც მოსალოდნელია, ჰოლს განაჩენს 17 ივნისს გამოუტანენ. მისი ადვოკატი ითხოვს, რომ გადაწყვეტილების მიღებისას გაითვალისწინონ ის, რომ დამნაშავემ დანაშაული აღიარა, მოინანია და ბოდიში მოიხადა.

Sky News-ის ინფორმაციით, ადრე ჰოლი უარყოფდა ბრალდებებს. წამყვანს ბრალი 2012 წლის იანვარში წაუყენეს. მას შემდეგ, კორპორაცია ”ბი-ბი-სი"-მ დაზარალებულებს მიუსამძიმრა და ყველანაირი კონტრაქტი გაწყვიტა ჟურნალისტთან. 

ჰოლი კორპორაციის რადიოსადგურზე სპორტულ კომენტატორად 1959 წლიდან მუშაობდა. 2012 წელს მას ბრიტანეთის იმპერიის ორდენი გადასცეს ტელევიზიასა და რადიოს განვითარებაში შეტანილი წვლილისთვის.

მომზადებულია BBC News-ის მიხედვით.