შიდა ქართლის გუბერნატორი ადასტურებს, რომ ქართველებს ცხინვალის ხელისუფლება ჯარიმის სანაცვლოდ ათავისუფლებს

შიდა ქართლის გუბერნატორი ზურაბ ჩხეიძე ადასტურებს, რომ ქართველებს ოკუპირებული ცხინვალის დე ფაქტო ხელისუფლება ჯარიმის გადახდის შემდეგ ათავისუფლებს.

როგორც "ინტერპრესნიუსს" ზურაბ ჩხეიძემ განუცხადა, ჯარიმა ყველა დაკავებული ქართველის ოჯახმა გადაიხადა და აღნიშნულის შესახებ ინფორმაციას გუბერნატორის ადმინისტრაციას მოსახლეობა აწვდის.

"ბოლო რამდენიმე თვეში ასეთმა ფაქტებმა ძალიან ინტენსიური სახე მიიღო. ადამიანების გატაცება ხდება იმ ადგილებიდან, საიდანაც ადრე მსგავს ფაქტს ადგილი არ ჰქონია. ისინი მიყავთ ცხინვალში, ასამართლებენ საზღვრის უკანონო გადაკვეთისთვის, ახდევინებენ ჯარიმას და შემდეგ გადმოსცემენ ქართულ მხარეს. ეს ცნობილია ყველასთვის, პირველ რიგში იმ ოჯახებისთვის, რომლის წევრებიც დააკავეს. სამწუხაროდ, გუბერნატორის ადმინისტრაცია ამაში არ არის ჩართული, ჩვენ ინფორმაციას უშუალოდ ამ ოჯახებიდან ვიღებთ. რამდენიმე ოჯახმა, რომელთაც ვესაუბრე, დაადასტურა, რომ ცხინვალის სასამართლოს გამოაქვს გადაწყვეტილება, რის საფუძველზეც ახდევინებენ თანხას. ვის უხდიან და სად იხდიან თანხას, ამის თქმა გამიჭირდება. ყველა სხვადასხვა თანხას ახდევინებენ, დაახლოებით 2000 რუბლამდე. დღე არ გავა, რომ მოსაზღვრე სოფლებიდან ადამიანები არ გაიტაცონ",-განაცხადა ჩხეიძემ.

დაკავებული ქართველების ჯარიმის სანაცვლოდ გათავისუფლების შესახებ ინფორმაცია საქართველოს შინაგან საქმეთა სამინისტროშიც აქვთ. სამინისტროში აცხადებენ, რომ ცხინვალის რეგიონის წარმომადგენლების მიერ თანხის გამოძალვის ფაქტები არსებობს.

"ბოლო პერიოდში თანხის გამოძალვის ფაქტებს ადგილი აქვს, 2000 რუბლზეა საუბარი. ამ თემასთან დაკავშირებით შსს-ს საინფორმაცო ანალიტიკური დეპარტამენტი აქტიურად მუშაობს. ამ საკითხზე მეტს ვერაფერს გეტყვით",- აცხადებს შსს-ს საზოგადოებასთან ურთიერთობის სამსახურის ხელმძღვანელი ნინო გიორგობიანი.

ამასთან, შს სამინისტროში არ აკეთებენ კომენტარს, გადაიხადეს თუ არა თანხა იმ პირებმა, რომელთა გათავისუფლების შესახებაც ინფორმაციასაც შინაგან საქმეთა სამინისტრო ავრცელებს.

გათავისუფლების სანაცვლოდ ქართველების მიერ ჯარიმის გადახდის შესახებ "ინტერპრესნიუსს" ცხინვალთან ახლომდებარე სოფელ მეჯვრისხევში მცხოვრებლებმა აცნობეს.

მათივე ინფორმაციით, ფულად ჯარიმებს დაკავებული ქართველების ოჯახის წევრები ან ცხინვალში მცხოვრები მათი ნათესავები იხდიან. ჯარიმის რაოდენობა დაახლოებით 2 000 რუსულ რუბლს შეადგენს.

"ინტერპრესნიუსის" წყარო ირწმუნება, რომ თანხა ცხინვალის რეგიონის დე ფაქტო ხელისუფლების ბიუჯეტში ირიცხება.

ამასთან, აპრილის თვეში ოკუპირებული ცხინვალის რეგიონის დე ფაქტო ხელისუფლებამ 10-მდე მოქალაქე გაათავისუფლა. მათი მიმართ წაყენებული ბრალდება იყო "საზღვრის უკანონო გადაკვეთა".

"ინტერპრესნიუსი"