22
ივნისიდღის ზოგადი ასტროლოგიური პროგნოზი
მადრიდის "რეალის" ფეხბურთელის, კრიშტიანო რონალდოს საცოლე ირინა შეიკმა ჟურნალ Hello-ს გულახდილი ინტერვიუ მისცა და ისაუბრა, თუ როგორი უნდა იყოს მისი აზრით ოჯახში ურთიერთობები. შეიკმა საკუთარი სილამაზის საიდუმლოც გაამხილა. მკითხველისთვის მოულოდნელი აღმოჩნდა, რომ მოდელი დილაობით ჰამბურგერებს მიირთმევს.
"ხშირად მეკითხებიან, როგორ ვჭამ ჰამბურგერებს?! მოდელები ხომ მხოლოდ ვაშლებით იკვებებიან! შემიძლია გითხრათ, რომ ეს ტყუილია. გენების წყალობით სიმსუქნისკენ მიდრეკილება არ მაქვს, ამიტომ ზოგჯერ თავს უფლებას ვაძლევ, რაიმე მსუყე ვჭამო. თუმცა მიზეზი მხოლოდ ეს არ არის. დილით ადგიმისთანავე სარბენად პარკში მივდივარ, გარდა ამისა, დაკავებული ვარ კრივით, ტანვარჯიშით და ზოგადად აქტიური ცხოვრებით ვცხოვრობ. ნიუ-იორკში მიღებულია, რომ ყველა სპრორტითაა დაკავებული. ასე რომ, "ფასტ-ფუდი" მიყვარს, თუმცა ბალანსს არასდროს ვივიწყებ. თუ კვირას პილმენებს ან ჰამბურგერებს ვჭამ, მხოლოდ იმიტომ, რომ დანარჩენი ექვსი დღის განმავლობაში საკუთარი სხეულის სილამაზეზე ვზრუნავ", - განუცხადა ჟურნალს ირინა შეიკმა.
მოდელის თქმით, ყოველთვის სურდა, რომ რაიმე განსაკუთრებულის ნაწილი ყოფილიყო. მან სურვილი აისრულა: რუსეთის პატარა ქალაქის მკვიდრი მსოფლიოში ცნობილი მოდელი გახდა და მისი ფოტოები მოდის წამყვანი ჟურნალების გვერდებს ამშვენებს, მრავალი სარეკლამო კონტრაქტი აქვს გაფორმებული და პლანეტის ერთ-ერთი ყველაზე ცნობილი ფეხბურთელის საცოლეა. მართალია, საყვარელ მამაკაცთან იმდენ დროს ვერ ატარებს, რამდენიც სურს, თუმცა ურთიერთობაში ყოველთვის ცდილობს კომპრომისზე წავიდეს. მისი თქმით, იძულებულია კარიერას იმ დროის ნაწილი შესწიროს, რომლის გატარებაც საყვარელი მამაკაცის გვერდით შეუძლია.
"ძნელია, ერთდროულად წარმატებული კარიერა და პირადი ცხოვრება გქონდეს, მაგრამ მჯერა, რომ თუ რაიმე მთელი გულით გსურს, ყველაფერი შესაძლებელია, - ამბობს ირინა. - როდესაც გვერდით გყავს ადამიანი, რომელიც გავსებს და ვისთანაც თავს კომფორტულად გრძნობ, ისეთი ნაბიჯების გადადგმა გინდება, რაც, ერთი შეხედვით, დაუჯერებელია. ამასთან, არ მივიჩნევ, რომ ქალმა მუშაობას თავი უნდა დაანებოს, როგორც კი მის ცხოვრებაში მამაკაცი გამოჩნდება, პირიქით, ყველაფერი დაბალანსებული უნდა იყოს. თუ ერთ-ერთი მიზეზი, რის გამოც ბრწყინავთ, თქვენი კარიერაა, მაშინ მისი მიტოვება, ან ვინმესთვის მსხვერპლად შეწირვა დანაშაულია".
მიუხედავად ამისა, მოდელი ცდილობს შორსმიმავალი გეგმები არ დასახოს. მისი თქმით, ცხოვრება ლატარეაა და არავინ იცის, რა მოხდება.
"ფუჭი იმედებით არასდროს მიცხოვრია, უბრალოდ ვცდილობდი გამომეყენებინა ყველა შესაძლებლობა, რომელსაც ცხოვრება მაძლევდა. ამან გაამართლა. მომავალშიც ასე გავაგრძელებ ცხოვრებას. ვისურვებდი, ხუთი წლის შემდეგ მყავდეს ოჯახი, შვილები, სახლი... ვნახოთ, აქედან რა გამოვა", - აღნიშნა მოდელმა.
მომზადებულია Hello-ს მიხედვით.
