23
მაისიდღის ზოგადი ასტროლოგიური პროგნოზი
ალბათ, შეგინიშნავთ თბილისის ქუჩებში ტაქსის მძღოლი ქალბატონები. მარი დორეული ერთ-ერთი პირველი ქალია, ვინც ამ კაცურ საქმეს ხელი მოჰკიდა და უკვე 7 წელია, მგზავრებს ემსახურება.
მყავს შვილი, რომელსაც მარტო ვზრდი, ამიტომაც გადავწყვიტე, ამ კაცური საქმისთვის მომეკიდა ხელი: ფულიც მექნებოდა და დროც დამრჩებოდა ჩემი შვილისთვის. ჩემი ახლობელი მუშაობდა ერთ-ერთ ტაქსოპარკში და იქ მივედი. დირექტორს ეგონა, ვატყუებდი, მეუბნებოდა, სად გაქვს დამაგრებული ფარული კამერა, მითხარიო. ერთი კვირა რომ ვიარე, დარწმუნდა, არ ვატყუებდი და მომცა მანქანაც და გასაღებიც. მას შემდეგ 7 წელი გავიდა. ჩასხდომისას ჯერ უკვირთ, მერე დაძაბულები არიან. როცა დარწმუნდებიან, რომ კარგად ვატარებ - მშვიდდებიან, უკვე აინტერესებთ ჩემი ოჯახური მდგომარეობა, ხანდახან ყავაზეც მპატიჟებენ, რაზეც თავაზიან უარს ვამბობ.
- ცნობილ ადამიანებს თუ უმგზავრიათ თქვენთან?
- კი. მანანა ბერიკაშვილი წავიყვანე ერთხელ, ნანული სარაჯიშვილმაც იმგზავრა, სოლოლაკში მივიყვანე. ერთხელ მეგობრებთან ერთად ჩამიჯდა მანქანაში ფეხბურთელი არჩილ არველაძე, ძალიან გაუკვირდა, ქალი რომ დაინახა საჭესთან. მითხრა, უცხოეთში ხშირად შემხვედრია ქალი-მძღოლი, საქართველოში კი პირველად ვხედავო. ერთხელ, ღამით, მამაკაცი ჩამიჯდა, ნუცუბიძის ქუჩაზე წავიყვანე, რატომღაც ყველას პატარა ვგონივარ, თუმცა 34 წლის ვარ. მკითხა - შვილო, მართვას სწავლობო? ვუპასუხე - ხვალ ექსკურსიაზე მივდივარ, მამა შინ ნასვამი დაბრუნდა, ფული არ მომცა, ამიტომ გასაღები მოვპარე და ვცდილობ, ტაქსაობით შევაგროვო ეს თანხა - მეთქი. 50-ლარიანი დამიდო კაცმა სავარძელზე, აიღე და სახლში წადიო. ვინც წარმატებას საკუთარი შრომის ფასად აღწევს, მას არაფერი უკვირს. არც მე მეგონა ბავშვობაში, რომ ამ საქმეს მოვკიდებდი ხელს, მაგრამ ხვალ რა მოხდება, არავინ იცის...
პროფესიით ბიოლოგი ვარ, თბილისის ივანე ჯავახიშვილის სახელობის უნივერსიტეტი მაქვს დამთავრებული. შემიძლია საკუთარი პროფესიით სამსახურის პოვნა, მაგრამ 200-300 ლარი მექნება ხელფასი, ეს თანხა ოჯახს კი არა, ერთ ადამიანს არ ეყოფა.
- მანქანის ნაწილებში კარგად ერკვევით?
- 13 წლიდან ვმართავ მანქანას და ნაწილებშიც კარგად ვერკვევი. უმნიშვნელო დაზიანებას მე თვითონ ვუმკლავდები. ერთხელ მგზავრთან სანაძლეო დავდე: 5 წუთში უნდა გამომეცვალა საბურავი. მე კი 3 წუთში შევძელი ამის გაკეთება და 100 დოლარი მოვიგე. კანონმორჩილი მძღოლი ვარ, არ ვარღვევ მოძრაობის წესებს. ხომ შეიძლება სხვამაც დაარღვიოს ამ დროს და ზედმეტი თავის ტკივილი რად მინდა? ერთხელ აეროპორტში მიმყავდა მგზავრი, გამაჩერა პატრულმა და მიმტკიცებდა, წითელზე გაიარეო. 50 ლარით დამაჯარიმა. ავტოსაგზაო შემთხვევაც მქონდა, ერთხელ მთვრალი მძღოლი დამეჯახა, ორივე მანქანა ჯართში ჩავაბარეთ.
ესაუბრა თამარ ბოჭორიშვილი
ყოველკვირეული გაზეთი "ყველა სიახლე"
(გამოდის ოთხშაბათობით)
