"რებრენდირებული" "ნაციონალების" შესახებ ბევრი ცუდი რამ ამოტივტივდება"

ექსპერტი გია ხუხაშვილი ჟურნალისტების ერთ-ერთი ყველაზე ხშირი და სასურველი რესპონდენტია. მისი აქტიურობა და პირდაპირობა ზოგიერთ პოლიტიკურ ოპონენტს აღიზიანებს კიდეც და სხვადასხვა ეპითეტითაც მოიხსენიებენ, რაც მისთვის მხოლოდ ღიმილის მომგვრელია: ბატონი გია ამბობს, რომ ლეგენდები მისი ყოვლისმცოდნეობის შესახებ გადაჭარბებულია. ამჯერად ექსპერტს, პოლიტიკური თემების გარდა, განვლილ გზაზე, ოჯახსა და უახლოეს (მათ შორის, სატელევიზიო) გეგმებზეც ვესაუბრე.

- ქართველ ექსპერტთა შორის, ბოლო დროს თქვენი განსაკუთრებული პოპულარობა რითაა განპირობებული?

- არა მგონია, განსაკუთრებული პოპულარობით ვსარგებლობდე. შემიძლია ყველა დავამშვიდო, რომ ამ ქვეყანაში ჩემზე ბევრად ჭკვიანი ექსპერტებიც არიან, პროფესიონალები კონკრეტულ თემებში. მე, სამწუხაროდ, იმის დროც არ მაქვს, რომ გარკვეულ საკითხებში ცოდნა გავიღრმაო. "ნაციონალები" კი მაშაყირებენ - ყოვლისმცოდნეს მეძახიან (იცინის). თუ ჟურნალისტი რამეს მეკითხება, თავს ვალდებულად ვთვლი, ვუპასუხო, - ეს ელემენტარული ზრდილობის საკითხია. მათთან მე ხომ არ მივდივარ? ამ ყველაფერს საექსპერტო "ბაზარი" აყალიბებს. მერწმუნეთ, თუ რამე არ ვიცი, ამასაც ვაღიარებ ხოლმე. თუმცა სასიამოვნო იყო, როცა 2008 წელს "წლის ექსპერტიც" გავხდი...

- რა რეაქცია გაქვთ, როდესაც ხან ყოვლისმცოდნე ხუხაშვილს გიწოდებენ, ხან - "რუხ კარდინალს"? ამ თემაზე იუმორისტულ გადაცემებშიც ხშირად ხუმრობენ.

- კი, სამიზნედ მაქციეს, მაგრამ ამ ყველაფერზე მხოლოდ მეღიმება. სხვა რა უნდა ვთქვა? სასიამოვნო არ არის, მაგრამ შევეგუე, რომ ასეთ რამეებს მშვიდად უნდა ვუყურო. არ გამოვრიცხავ, რომ ჩემი არსებობა კოალიციის შიგნითაც ბევრს აღიზიანებდეს. თუმცა შეფასებები გადაჭარბებულია. მე არც გადაწყვეტილებებს ვიღებ და არც ისეთი გავლენიანი ვარ, როგორც ამბობენ. სხვათა შორის, ლაშა ნაცვლიშვილმა რაფაელის სურათის რეპროდუქცია მაჩუქა, რომელიც XVI საუკუნეშია დახატული და მასზე ნეტარი ავგუსტინია გამოსახული: თუ კარგად დააკვირდებით, ჩვენ შორის გარკვეულ მსგავსებასაც დაინახავთ (იცინის). ეს, რა თქმა უნდა, ხუმრობით... ლეგენდა ხუხაშვილზე - თითქოს რაღაცების უკან ვდგავარ, დათა ახალაიასთან მოლაპარაკებებს ვაწარმოებდი და ა.შ. - ყველაფერი სისულელეა. თუმცა ამის საფუძველი ჩემთვის გასაგები და მარტივია: მე არა ვარ ხელისუფლების ნაწილი და ამ სისტემის ჭანჭიკად ვერ მხედავენ, რაც ყველას დააწყნარებდა, მაგრამ ამავე დროს, ახლო ურთიერთობა მაქვს პრემიერ-მინისტრთან, რაც ყველას ძაბავს, როგორც შიგნით, ისე - გარეთ.

- თუმცა იმასაც ამბობენ, რომ თუ ადრე, პრემიერის ლამის უპირობო ნდობით სარგებლობდით, ბოლო დროს ეს ნდობა საგრძნობლად შესუსტდა. რა რჩევებს აძლევთ ხოლმე პირადი საუბრების დროს და როგორია დღესდღეობით თქვენი ურთიერთობა - მეგობრული თუ მხოლოდ საქმიანი?

- ალბათ უფრო მეგობრული. რაც შეეხება რჩევებს, ამა თუ იმ თემაზე საუბრისას, ზოგჯერ ის მეკითხება აზრს, მაგრამ უფრო ხშირად რჩევას მე ვთხოვ. ეს სავსებით ბუნებრივია. ზოგჯერ რჩევას ჩემს ცოლსაც ვეკითხები, თუმცა ჩემს ოჯახში ის "რუხი კარდინალი" ნამდვილად არ გახლავთ (იცინის). საერთოდ, გავლენები არ მაინტერესებს, ეს ჩემი თემა არ არის. ყოველთვის ვლაპარაკობ იმას, რასაც ვფიქრობ, საკმაოდ შემტევი ვარ და პოლიტიკური პროცესიდან გამოსვლის შემდეგ, ამიტომ მოვუხადე ბოდიში ყველას, ვისაც ჩემი პირდაპირობით ვაწყენინე. "ქართული ოცნების" პარტიულ პოლიტიკას რაც შეეხება, წარმოდგენა არ მაქვს, რა ხდება, ტელევიზიით ვიგებ ხოლმე. სისტემურ, სახელმწიფოებრივ საკითხებზე კი კომუნიკაცია ნამდვილად მაქვს, არა - საპარლამენტო ელიტასთან, არამედ პირადად პრემიერთან და რამდენიმე სხვა ადამიანთან. ვმსჯელობთ და ვსაუბრობთ ხოლმე, ამაში კი ცუდს ვერაფერს ვხედავ.

- თქვენი პროგნოზები ხშირად მართლდება, ამიტომ ჩნდება კითხვა - ეს "წინასწარმეტყველებაა" თუ უბრალოდ ხუხაშვილის საკითხების გადაწყვეტაში მონაწილეობა?..

- გადაწყვეტილებების მისაღებ მაგიდასთან არ ვზივარ. ვერც იმას ვიტყვი, რომ ჩემი პროგნოზები ხშირად მართლდება. ალბათ დამეთანხმებით, რომ პროგნოზების კეთება მაინცდამაინც სასიამოვნო საქმე არ არის, მაგრამ ზოგჯერ თავს ამის უფლებას ვაძლევ. საერთოდ, გარკვეულ შეფასებებს მოვლენების ლოგიკური გააზრება და გამოცდილება გვკარნახობს.

- როგორ გესახებათ "ერთიანი ნაციონალური მოძრაობის" პოლიტიკური მომავალი?

- დღევანდელ სიტუაციას თუ გადავხედავთ, ნათელია, რომ გარკვეული დროის შემდეგ, "ნაციონალური მოძრაობა" პოლიტიკური რუკიდან გაქრება. ბოლო კვლევები უჩვენებს, რომ მისი რეიტინგი 5-7%-ს არ სცდება. პარტია მალე "გაიფცქვნება", მათ შორის, პარლამენტსა და მის ფრაქციაში მაქსიმუმ 10-12 ადამიანი დარჩება; ისინიც საკუთარ ნაჭუჭში ჩაიკეტებიან. მათ მიმართ მძაფრი შეფასებების გაკეთება აღარ ღირს, ეს წარმავალი პოლიტიკური ძალაა, მათი გადარჩენის შანსს ვეღარ ვხედავ. ცდილობენ, ხალხის ნაწილი ციხის კართან ფარად გამოიყენონ და მათგან ცოცხალი კედელი გაიკეთონ. ასეთი მაგალითი ისტორიაში ბევრია. პარტიის ლიდერების კისერზე ბევრი დანაშაულია და ეს ფაქტია. მშვენივრად ვიცი, რას აკეთებდა მაგალითად, მერაბიშვილი ან უგულავა, კონკრეტული ფაქტებიც მაქვს, მაგრამ პროკურორი არ ვარ და ამაზე საუბარი ჩემს კომპეტენციაში არ შედის. თუ საზოგადოების მთავარი მოთხოვნა სამართლის აღდგენაა, ვერ წარმომიდგენია, როგორ გადაურჩებიან პასუხისმგებლობას. არ გამოვრიცხავ, რომ გარკვეულ დანაშაულებზე პასუხისგებამ სააკაშვილსაც მოუწიოს და რამდენიც უნდა იძახოს, რომ პრეზიდენტის დაკითხვა არ შეიძლება, ძალიან ცდება. შემიძლია მაგალითებიც მოგიყვანო - საფრანგეთის და ისრაელის, სადაც პრეზიდენტები დაიკითხნენ და მიესაჯათ კიდეც. დიდი დისკუსია მოჰყვა ჩემს გამონათქვამს, რომ ახალაიები სისტემის მსხვერპლნი არიან. ახლაც ასე ვთვლი. დანაშაულის დამკვეთი ბევრად უფრო დამნაშავეა, ვიდრე შემსრულებელი. ახალაიები სწორედ შემსრულებლები იყვნენ, სისტემის შემქმნელები, იდეოლოგები კი - სააკაშვილი, მერაბიშვილი, უგულავა, ადეიშვილი და სხვები გახლდნენ. ის, რაც ახალაიების თავს ხდება, მიუხედავად იმისა, რომ დამნაშავეები არიან და უნდა დაისაჯონ, - დრამაა. მესმის ამ ოჯახის დედის მდგომარეობა - მეუღლეც და ორივე შვილიც დიდი სახელმწიფო დანაშაულის თანამონაწილენი ჰყავს და ქალისთვის ეს ძალზე მძიმე ხვედრია.

- "ქართული ოცნების" ნაკლად ერთიანი იდეოლოგიის არარსებობას მიიჩნევენ. რას იტყვით ამის შესახებ?

- მასში შემავალი პოლიტიკური ძალების გამაერთიანებელი - დასახული ამოცანები, პასუხისმგებლობა და სხვა პრიორიტეტებია. როცა ეს პრობლემები მეტ-ნაკლებად გადაწყდება, შესაძლოა, ისინი ერთად ვეღარ დარჩნენ. რაც შეეხება მინუსებს - ეს ბუნებრივია: როდესაც არ არსებობს ერთიანი პოლიტიკური იდეოლოგია, გადაწყვეტილებები ცოტა რთულად მიიღება, რაც რეფორმების პროცესს გარკვეულწილად აფერხებს და ამუხრუჭებს. თუმცა კარგად უნდა გვესმოდეს, რომ ჯერჯერობით მთელი პოლიტიკური პროცესი ერთ ადამიანს მიჰყავს. შეიძლება ვთქვათ, რომ ეს პოლიტიკური პარტიებიც ნომინალური ერთეულები არიან, რადგან მათი რეიტინგი დღეს არაფერს ნიშნავს. ქვეყნისთვის არ არის კარგი, რომ ყველაფერი ერთ ადამიანზეა დამოკიდებული, მაგრამ რეალობაა. უბრალოდ გაგვიმართლა, რომ ეს ადამიანი იმ თვისებების მატარებელი არ არის, ქვეყანაში ავტორიტარულ ტენდენციებს რომ გააძლიერებდა. უახლოეს პერიოდში პოლიტიკური ძალები უნდა მოძლიერდნენ, მით უმეტეს, ბიძინა ივანიშვილი ამბობს, რომ ის პოლიტიკაში დიდხანს დარჩენას არ აპირებს და პოლიტიკური კონკურენციის სივრცე უნდა გაიხსნას იმისათვის, რომ საბოლოო ჯამში, მულტიპარტიული დემოკრატია მივიღოთ, რაც ჩვენი ქვეყნისთვის სასიცოცხლოდ აუცილებელია.

- საინტერესოა თქვენი აზრი ჯანდაცვის მინისტრის მიმართ კობა დავითაშვილის მიერ გამოთქმულ ბრალდებაზე. რამდენად საფუძვლიანად მიგაჩნიათ?

- კორუფციაზე საუბარი, რა თქმა უნდა, პოლიტიკური პოლემიკის ფარგლებს სცილდება, რაც სამწუხაროა. დავით სერგეენკოს კარგად არ ვიცნობ, მაგრამ ჰაბიტუსიდან გამომდინარე, მისი კორუმპირებულობა ვერ წარმომიდგენია. პირადად მე, ასეთ რამეს გამოვრიცხავ, სახეზე შეხედვაც კი საკმარისია, რომ ეს ვერ დაიჯერო. აქედან გამომდინარე, სამწუხაროა, რომ ეს ყველაფერი ასე შორს წავიდა. ვისურვებდი, კობა დავითაშვილს თავისი შეფასებების კორექტირება მოეხდინა, რომ სხვა რამის თქმა უნდოდა და მძიმედ გამოუვიდა. თუმცა ვერ ვატყობ, რომ ის კონფლიქტის შერბილებისკენ იყოს განწყობილი. არ მინდა, 100%-იანი ალბათობით ვთქვა, მაგრამ ეს სერიოზული განხილვის საგანი უნდა გახდეს. "წითელი ხაზი" გადაკვეთილია, რაც სამწუხაროა; თუ უკან დაბრუნება მოხერხდება, კარგია. საერთოდ, კობა ინდივიდუალისტია და პარტიულ პოლიტიკაში დიდხანს ვერასდროს რჩებოდა, ესეც მისი არჩევანია. ასეთი ხასიათი აქვს, რასაც დიდი მინუსებიც ახლავს, როდესაც პოლიტიკურ ძალას მიეკუთვნები და პლუსებიც. პიროვნებაა და თავის აზრს ყოველთვის ღიად გამოთქვამს. ზედმეტად მწვავე კრიტიკაც დასაშვებია, მაგრამ - ბრალდება?.. კობა კრიტიკის ფარგლებს გასცდა და ეს არის ცუდი. უახლოესი დღეები გვიჩვენებს, ის თვითონ დატოვებს ფრაქციას, კოალიცია მიიღებს გადაწყვეტილებას თუ საერთო ენის გამოძებნა მოხერხდება. ვისურვებდი, კობას თავისი პოზიცია განემარტა და "ბოდიშისმაგვარი" მოეხადა. ეს ყველაზე კარგი გადაწყვეტილება იქნებოდა...

- თქვენ შესახებაც ვისაუბროთ. გვიამბეთ, რა გზა გამოიარეთ დღემდე? რა ცხოვრებისეული სირთულეები გადაგილახავთ?

- არცთუ ისე მრავალფეროვანი ცხოვრება მქონდა, როგორც ვიღაცამ შეიძლება იფიქროს. თსუ-ის მექანიკა-მათემატიკის ფაკულტეტი დავამთავრე. მერე ასპირანტურაში ვსწავლობდი და დავიცავი საკანდიდატო დისერტაცია მოსკოვში. თბილისში 1989 წლის 7 აპრილს დავბრუნდი. ვაპირებდი, მუშაობა თსუ-ში დამეწყო, მაგრამ 9 აპრილის შემდეგ ცნობიერება აბსოლუტურად შემეცვალა და ჩემი სპეციალობით ერთი დღეც აღარ მიმუშავია, მთლიანად ეროვნულ მოძრაობაში ჩავები. ზვიად გამსახურდიას პრეზიდენტობის დროს, უზენაეს საბჭოში ვმუშაობდი, პოლიტიკური ორგანიზაცია "ქარტია-91"-ში ვირიცხებოდი; მაშინაც ოპოზიციაში ვიყავი, უფრო სწორად, კრიტიკული გახლდით, - და შევარდნაძის დროსაც. პარტიების წევრი არასდროს ვყოფილვარ. არც ახლა ვარ, ეს უბრალოდ, ერთჯერადი მცდელობა იყო წინასაარჩევნო პერიოდში. უფრო ადრე, საკონსულტაციო ბიზნესი მქონდა, მცირე; მერე, საზოგადოებრივ სექტორში ვმუშაობდი, ბოლო რამდენიმე წელი ერთ-ერთი უმსხვილესი კომპანიის მარკეტინგის სამსახურის ხელმძღვანელი გახლდით და მატერიალური თვალსაზრისით, საკმაოდ კარგადაც ვიყავი. პარალელურად, საზოგადოებრივ მოღვაწეობასაც ვაგრძელებდი, რაც სააკაშვილის ხელისუფლებას ძალიან ძაბავდა და სულ ზღვარზე დავდიოდი: ამ კომპანიის ხელმძღვანელებს ლამის თვეში ერთხელ იბარებდნენ...

- თქვენი მწვავე შეფასებების გამო, ვინმესთან პირადი უთანხმოება თუ გქონიათ?

- ფიზიკური დაპირისპირება - არა, ეს ბოლოს როდის მოხდა, აღარც კი მახსოვს (იცინის). 2005 წლის იანვარში, როდესაც რკინიგზის დირექტორის პოსტი დავტოვე და "შავ სალაროზე" ვისაუბრე, ჩემზე თავდასხმა მოხდა, თუმცა - არაიდენტიფიცირებული. დარწმუნებული ვარ, ჩემი განცხადებების გამო, ხელები ახლაც ბევრს ექავება, თუმცა ჩემთვის ესეც გასაგებია. ჩემი მეუღლე სულ მთხოვს, უფრო კორექტული ვიყო. მისი მიდგომა ცოტა განსხვავებულია: მისი აზრით, შეიძლება, ადამიანს ისე კარგად აუხსნა ყველაფერი, რომ ის გააკეთებინო, რაც გინდა. შესაძლოა, მელანო მართალია და ასე უკეთესი იყოს, მაგრამ ჩემში ეს არ ზის და ამის გამო, "რუხი კარდინალის" გარდა, ხუმრობით, "ოთარაანთ ქვრივსაც" კი მეძახიან ხოლმე. მირჩევნია, ადამიანს პირში მივახალო ის, რასაც იმსახურებს, ვიდრე რევერანსებით ველაპარაკო. ამის დრო არ არის. შესაძლებელია, მისთვის ეს მტკივნეულია და ჩემთვისაც ცუდია, როდესაც მავანს ჩემზე უარყოფითი წარმოდგენა ექმნება, მაგრამ ადრე თუ გვიან, ჩემი ნათქვამი აუცილებლად წაადგება. დაუსჯელი არავინ რჩება.

- ბიძინა ივანიშვილთან თანამშრომლობა კონკრეტულად როდის დაიწყეთ?

- სხვათა შორის, ერთ-ერთი პირველი ვიყავი, ვისაც მან თანამშრომლობა შესთავაზა, სანამ პოლიტიკაში მოსვლის თაობაზე განცხადებას გააკეთებდა. თავიდან უარი ვუთხარი, მერე დიდხანს ვიფიქრე და ბოლოს დავთანხმდი... ვიცოდი, სააკაშვილის ხელისუფლების ბუნება, ის, რომ მოვლენები დრამატულად განვითარდებოდა და მივხვდი, რომ ამ ყველაფრის მიღმა ვერ დავრჩებოდი, - ამას საკუთარ თავს ვერ ვაპატიებდი. ამიტომ გადავწყვიტე, პოლიტიკურ პროცესებში აქტიურად ჩავრთულიყავი. შუალედში, ჩემს მეგობრებთან ერთად, "საქართველოს განვითარების კვლევითი ინსტიტუტი" შევქმენი. ამის გამოც მაშინ დიდი აჟიოტაჟი ატყდა... საბედნიეროდ, ჩემი პოლიტიკური მოღვაწეობა ხანმოკლე აღმოჩნდა. თავიდან, გადაწყვეტილებების მიღების მაგიდასთანაც ვიჯექი და არცთუ უკანასკნელი როლი მქონდა; საკმაოდ აქტიურიც გახლდით. მას შემდეგ, რაც ღვთის წყალობით, ყველაფერი მშვიდობიანად დასრულდა, ჩემი სიტყვა შევასრულე და პოლიტიკა დავტოვე.

- როგორია თქვენი მიკროსამყარო? ვიცი, არ გიყვართ მოგზაურობა, გართობა, თბილისიდან გასვლა. რატომ?

- ფესვებით ვარ თბილისზე გამობმული (იცინის). უცნაურია, მაგრამ მოგზაურობა რატომღაც არ მიყვარს. ძალიან აუცილებელი თუ არ არის, არც თვითმფრინავში ვჯდები და არც ქალაქიდან გავდივარ. გაგეცინებათ და, საარჩევნო ციკლის დროს თბილისიდან ფაქტობრივად, არ გავსულვარ, მაშინ როცა, რეგიონებში მიტინგები იმართებოდა. ზუგდიდში ვიყავი ერთხელ, ისიც - რაღაც შემაშფოთებელი ინფორმაციის პირადად გადასამოწმებლად... თბილისს რომ ვტოვებ, დისკომფორტი მექმნება, ამიტომ დასასვენებლად არასდროს მივდივარ.

- განტვირთვას როგორ ახერხებთ?

- ეს სერიოზული პრობლემაა. როგორც წესი, შაბათ-კვირასაც ვმუშაობ, რადგან უქმად ყოფნა არ შემიძლია. ვცდილობ, ჩემი მინიმალური ენერგიით რაც შეიძლება მეტი გავაკეთო. დინამიკური არ ვარ, მაგრამ საკმაოდ ბევრს ვასწრებ და დღის განმავლობაში რელაქსაციისთვისაც ვიცლი. ვცდილობ, დრო და ენერგია კარგად გავანაწილო. კურორტებზე, დაბადების დღეებზე, კლუბებსა თუ აბანოებში სიარული ჩემთვის უცხოა. თუმცა იმ კატეგორიაში ვარ, ვინც დაბადების დღეზეც კი დათქმულ დროს მიდის, - არ მიყვარს დაგვიანება.

- ოჯახზე რას გვეტყვით? რას საქმიანობს თქვენი ერთადერთი შვილი - ლუკა? რა პრიორიტეტებს მისდევთ მასთან ურთიერთობისას?

- პრიორიტეტები, როგორც წესი, დროთა განმავლობაში იცვლებოდა. ყოველთვის მაღალი რისკის ზონაში ვიყავი და ეს ყველაფერი ჩემი შვილის ისეთ ასაკს დაემთხვა, რომ მასზე სულ "გადაფოფრილი" ვიყავი. საკუთარ თავს ვერ ვაპატიებდი, რომ ჩემ გამო რამე შემთხვეოდა, ამის რისკი კი ყოველთვის იყო. სიმართლე გითხრათ, ჩემი შვილის მიმართ დანაშაულის გრძნობა მაქვს, რადგან მთელი ამ წლების განმავლობაში ჩემი ცხოვრების წესით იცხოვრა. საბედნიეროდ, ახლა ეს პრობლემა აღარ არის და როგორც იქნა, თავისუფლად ყოფნა ეღირსა. ლუკა სამედიცინოზე სწავლობს. მესამე კურსზეა, უკვე "კლინიკაზე გადავიდა" და რამდენიმე დღის წინ საავადმყოფოში მორიგეც იყო. ჩემთვის პრიორიტეტული მისი განათლებაა. რაც უნდა ილაპარაკონ, ვინც მიცნობს, ყველამ კარგად იცის, რომ ჩვენი ოჯახი არასდროს ყოფილა ორიენტირებული მატერიალურ ღირებულებებზე. ჩემი მეუღლეც ასეთია და არც ჩემი შვილია ამისკენ მიდრეკილი.

- როგორც ვიცი, მალე "იმედზე" ვიხილავთ გადაცემას, რომელშიც თქვენც მიიღებთ მონაწილეობას. რა ეტაპზეა სამზადისი?

- რამდენიმე "პილოტი" ჩავწერეთ და ვფიქრობ, უახლოეს პერიოდში ეთერში გავალთ. ეს იქნება განსხვავებული, არასტანდარტული, საკმაოდ საინტერესო გადაცემა, რომელსაც წამყვანი არ ეყოლება. რამდენიმე ადამიანი სხვადასხვა აქტუალურ თემაზე ვისაუბრებთ, ანალიზს გავაკეთებთ და გარკვეულ გადაწყვეტილებებსაც მივიღებთ, რომელსაც შემდგომში, შესაბამის სისტემებს შევთავაზებთ. გადაცემის მთავარი მიზანი საზოგადოებრივი სექტორის გაძლიერებაა. მისი ხმა უნდა ისმოდეს. გადაცემაში რვა, საზოგადოებისთვის პატივსაცემი პიროვნება სხვადასხვა პრობლემაზე იმსჯელებს და ხელისუფლებაში საკუთარი შეხედულების ლობირებას შეეცდება. ეს რეალითი-შოუა: ორი საათი ეთერში ვიქნებით, ორი - ეთერს მიღმა. ამ გადაცემის მეშვეობით, ჩემს მეგობრებთან ერთად შევეცდები, ჩემი "ლეგენდარული გავლენის" "ლეგალიზაცია" მოვახდინო (იღიმის). ესენი იქნებიან - ზაზა შათირიშვილი, რამაზ საყვარელიძე და სხვა ექსპერტები, რომლებიც არც ერთ პოლიტიკურ პარტიას არ ეკუთვნიან.

- გარკვეული ხნის წინ ბრძანეთ, რომ ბიზნესმენები საინტერესო წინადადებებით მოგმართავენ და სკანდალური ინფორმაციის გამომზეურებას, ლამის "ქართული ვიკილიქსის" შექმნას გვპირდებოდით. როდის აპირებთ თქვენს ხელთ არსებული მასალების გამოქვეყნებას?

- ვფიქრობ, ეს მას შემდეგ მოხდება, რაც ამნისტიაზე შევთანხმდებით. ვფიქრობ, ის ინფორმაცია, რაც მაქვს, გარკვეული ბიზნესისთვის საზიანო იქნება იმ მარტივი მიზეზის გამო, რომ თუ ქრთამის ამღები არსებობს, მიმცემიც არსებობს და ფორმალურად, ისიც სასჯელს იმსახურებს... ბიზნესი, რომელიც ხელისუფლებას ემსახურებოდა და მას ქრთამს უხდიდა, ჩემი აზრით, პასუხისმგებლობისგან უნდა გათავისუფლდეს. როცა დავრწმუნდები, რომ ეს ადამიანები არ დაისჯებიან, ბევრ ფაქტს გამოვიტან სამზეოზე. მანამდე, როგორც მოქალაქე, ვფიქრობ, რომ ჩემი მხრიდან ეს არასწორი იქნებოდა. არც ისე ბევრი დრო დარჩა და მერწმუნეთ, "რებრენდირებული" "ნაციონალების" შესახებ ბევრი ცუდი რამ ამოტივტივდება. სინამდვილეში, იდეის უკან სულ სხვა ინტერესი იდგა...

თამთა დადეშელი

ჟურნალი ”გზა”

(გამოდის ხუთშაბათობით)