29
მაისიდღის ზოგადი ასტროლოგიური პროგნოზი
ამჯერად, "დეტექტორის" რესპონდენტად სერიალის - "ჩემი ცოლის დაქალები" მსახიობი, ანი ტყებუჩავა შევარჩიეთ, რომლის გმირის - ნინას ოჯახის გადარჩენაზე "აჯანყებული" ქართველი დიასახლისები ზრუნავენ: სავარაუდოდ, დასანგრევად განწირული ოჯახის დაცვას სერიალის სცენარის შეცვლის მოთხოვნით ცდილობენ...
- ანი, უჩვეულო სიტუაციაში აღმოჩენილი იბნევი თუ გარემოსთან ადაპტირებას მალევე ახერხებ?
- საერთოდ, არასდროს ვიბნევი. ვიდრე სიტუაციაში გავერკვევი, ვფიქრობ და ვცდილობ, ემოციები შევიკავო. ასე რომ, "ფარული კამერის" მახეში ჩემი გაბმა მომგებიანი არ იქნებოდა.
- ვთქვათ, ერთ დილას იღვიძებ და დედამიწაზე მარტოდმარტო ხარ...
- თავდაპირველად, პანიკაში ჩავვარდები. ცოტათი რომ დავწყნარდები, ახლომახლო ყველაფერს დავათვალიერებ და დავფიქრდები, - ხალხი სად მოვძებნო? მერე კი იმედია, გამეღვიძება.
- პრესიდან ან ტელევიზიიდან შენ შესახებ რაიმე მოულოდნელი ან უჩვეულო ინფორმაცია თუ შეგიტყვია?
- ისეთი - არა, სიმართლეს რომ არ შეესაბამებოდეს. მომავალში ამის "იმედი" მაქვს, რადგან ჟურნალისტები გამწარებულები მუშაობენ: ისეთი რაღაცები წამიკითხავს, კითხვასაც და პასუხსაც თავად რომ წერენ. მაგალითად: ესა თუ ის მსახიობი უმაკიაჟოდ რატომ არის? კარგი იქნებოდა, ცოტა პომადა წაესვაო და ა.შ. დიალოგი საკუთარ თავთან აქვთ (იცინის). მსგავსი რაღაცები ჩემთვის სასაცილოა.
- ვთქვათ, საინფორმაციო გამოშვებაში აცხადებენ, რომ ანი ტყებუჩავამ ბიძინა ივანიშვილისა და ეკა ხვედელიძის ოჯახურ თანაცხოვრებას ბზარი გაუჩინა...
- ძალიან ბევრს ვიცინებ, სხვა რა უნდა ვქნა? პირადად არც ერთს არ ვიცნობ.
- "ჩემი ცოლის დაქალებში" შენი გმირის - ნინას ოჯახის გადარჩენისთვის მებრძოლ დიასახლისებზე რას ფიქრობ?
- ძალიან საყვარლები არიან. ამ ამბავზე მეცინება. მგონი, ერთადერთი ქალი ვარ, ვისაც მოსწონს, რომ ნინას ქმარი ღალატობს: ჩემი როლის შესრულება ახლა უფრო მეტად საინტერესო გახდა... დიასახლისებს თანადგომისთვის დიდ მადლობას ვუხდი.
- დიასახლისებმა მასობრივ აქციაში მონაწილეობა რომ გთხოვონ, უარს ეტყვი?
- (იცინის) ნინას დაურეკონ და მას სთხოვონ, მე - არა.
- მელანქოლიური ფიქრები თუ გეძალება ხოლმე?
- მაგ ასაკიდან გამოვედი. ადამიანი ცოტა დაბნეული და "არეული" თინეიჯერობისას, გარდატეხის ასაკში არის ხოლმე.
- ვთქვათ, სიკვდილმისჯილი ხარ. სიცოცხლის ბოლო წუთებში რას იტყოდი ან ვის ნახვას ისურვებდი?
- ალბათ, მოძღვრის ნახვას ვისურვებდი...
- ვთქვათ, ავტომობილის მართვისას, გიგი უგულავას მეუღლე თავისი ავტომობილით უკნიდან მსუბუქად დაგეჯახა, შემდეგ საჭე სწრაფად დაატრიალა, შუა თითი გიჩვენა და წავიდა...
- ეს ჯანმრთელი ადამიანის საქციელი არ არის. ასე რომ, სერიოზული რეაქცია არ მექნება. ალბათ, ძალიან ბევრს ვიცინებ!
- ადამიანების თავხედობა შენში აგრესიას არ იწვევს?
- პირადად მე, ისე არ ვიქცევი, რომ ჩემ მიმართ ვინმეს თავხედობა ადეკვატური იყოს, არაადეკვატური საქციელი კი მაოცებს. როგორ შეიძლება, ყველა გიჟის საქციელზე სერიოზული რეაქცია მქონდეს?..
- ანი, უჩინმაჩინი რომ იყო, რას მოიმოქმედებდი?
- რამდენიმე ადამიანის სახლში მივიდოდი და გავარკვევდი, სინამდვილეში რას ლაპარაკობენ: მაღალ თანამდებობაზე დანიშნული პოლიტიკოსების "შიდა სამზარეულო" ძალიან მაინტერესებს. შევიტყობდი, პოლიტიკის მიღმა როგორები არიან. მიმაჩნია, რომ პოლიტიკა რთული საქმეა და ამ სფეროში გარევას საყვარელ ადამიანებს ნამდვილად არ ვუსურვებ.
ეთო ყორღანაშვილი
(გამოდის ხუთშაბათობით)
