სკანდალური მარკ ჯეიკობსი 50 წლისაა

ძნელი დასაჯერებელია, მაგრამ მარკ ჯეიკობსი, ერთ-ერთი ყველაზე პოპულარული და ნიჭიერი დიზაინერი, 50 წლის გახდა. ალბათ ღირს გავიხსენოთ მისი ყველაზე კაშკაშა იმიჯი ბოლო ორი ათწლეულის განმავლობაში, რითაც საზოგადოებას აოგნებდა, და გადავხედოთ გარკვეულ დეტალებს მისი ცხოვრებიდან.

მარკ ჯეიკობსი საკუთარი ბრენდებისა და ასევე ფრანგული მოდის სახლის "ლუი ვიტონის" კრეატიული დირექტორია, მაგრამ მისი ნიჭი არ შემოიფარგლება მხოლოდ ფეშენ-ინდუსტრიით. ის არის ასევე დიეტური "კოკა-კოლას" კრეატიული დირექტორი და კინოშიც თამაშობს.

არადა, ღარიბულ ებრაულ ოჯახში დაბადებული მარკ ჯეიკობსი მოდის სამყაროში სულ სხვა გზით შევიდა - ერთ-ერთ ბუტიკში გამყიდველად მუშაობდა. მერე კი უმაღლესი განათლება მიიღო მოდის სფეროში და სულ მალე აალაპარაკა საზოგადოება საკუთარ პერსონაზე.

მოდის სფეროში რომ გამოჩნდა, მაშინ მარკი სხვანაირი იყო - ტანსრული, სათვალიანი, კულულებიანი. მაშინ ამბობდა, იმდენს ვმუშაობ, მაინც ვერავინ მხედავს და რა აზრი აქვს საკუთარ გარეგნობაზე ზრუნვასო? ყველაფერი 2006 წელს შეიცვალა - მოულოდნელად გარდაისახა, მისდია დიეტებს, დაიწყო ვარჯიში, მიატოვა ყავის სმა, ამოიღო რაციონიდან შაქარი, პურ-ფუნთუშეული. მერე კი, როცა იმ შედეგს მიაღწია, რასაც ახლა ვხედავთ, არ დაიზარა, ეს ყველასთვის ეჩვენებინა და გაეზიარებინა. ამას მოჰყვა ფოტოები შიშველი ტორსით და კიდევ უფრო ეპატაჟური გამოსვლები - მაქმანებიანი კაბებით თუ კუბოკრული ქვედატანებით.

თავის შექმნილ სამოსზე მარკი ამბობს, რომ მისი ტანსაცმელი არ არის სექსუალური, მაგრამ შექმნილია სიამოვნებისთვის. მის კოლექციებში მრავლად არის არა მხოლოდ ტანსაცმელი, არამედ ჩანთებიც და ფეხსაცმელიც. ჯეიკობსის სამოსს სიამოვნებით ირგებს უამრავი ცნობილი ადამიანი, მათ შორის სტილის ერთ-ერთ თანამედროვე დედოფლად აღიარებული მიშელ ობამა.

რაც შეეხება პირად ცხოვრებას, მარკი ამითაც აოგნებს საზოგადოებას - ის გულახდილი გეია, 2009 წელს ლორენცო მარტონეზე იქორწინა, თუმცა ერთ წელიწადში დაშორდა. დღესდღეობით კი მის გვერდით ყოველთვის არის რომელიმე მორიგი "მზეჭაბუკი".

ELLE

ჟურნალი "რეიტინგი"

(გამოდის ორშაბათობით)