19
ივლისიდღის ზოგადი ასტროლოგიური პროგნოზი
ამ ისტორიის მოკლე შესავალი ასეთია: რუსული დრამატული თეატრის დირექტორმა, საერთაშორისო კულტურული კავშირის "რუსული კლუბის" პრეზიდენტმა ნიკოლაი სვეტნიცკიმ 25-26 აპრილს რუსეთში, ქალაქ ვოლგოგრადში წარსაგზავნად კულტურის წარმომადგენლები შეარჩია. პროექტს ორგანიზებას, რუსეთის პრეზიდენტის ვლადიმერ პუტინის აპარატი უწევს, ხოლო თანაორგანიზატორი "ევრაზიის ინსტიტუტი", კერძოდ, შოთა აფხაიძე რუსეთ-საქართველოს ურთიერთობებისა და კავკასიის რეგიონის უსაფრთხოების ექსპერტია. საქართველოდან 12-მდე მონაწილეა მიწვეული, მათ შორის არიან მომღერლები: ვერიკო ტურაშვილი და თემო საჯაია.
როგორც ჩემმა წყარომ პირად საუბარში აღნიშნა, შესაძლოა, სვეტნიცკისა და ევრაზიის ფონდს შორის დიდი განხეთქილება მოხდეს, რადგან გაურკვეველია, რის მიხედვით შეირჩნენ ვერიკო ტურაშვილი და თემო საჯაია, თუმცა "ქრონიკა" გთავაზობთ მომღერლებთან ექსკლუზიურ ინტერვიუს, საიდანაც ბევრ საინტერესო დეტალს გაიგებთ. შეგახსენებთ, რომ სხვადასხვა საინფორმაციო სააგენტოებში აღნიშნულ საკითხთთან დაკავშირებით დევს ინფორმაცია, თუმცა ისინი პირველი "ქრონიკასთან" საუბრობენ.
ვერიკო ტურაშვილი:
- ვოლგოგრადში კეთდება ეს კონცერტი, სადაც მონაწილეობენ ომის ვეტერანებიც, ამ ადამიანებისთვის ტარდება ეს ღონისძიება. ამ კონცერტის ორგანიზატორია არასამთავრობო სტუდენტური ორგანიზაცია და საქართველოდან მივდივართ მე და თემო საჯაია. ჩვენ გარდა, სხვადასხვა ქვეყნიდან მონაწილეობენ მომღერლები.
- საქართველოდან რა პრინციპით ან რის მიხედვით შეგარჩიეს შენ და თემო საჯაია?
- გრიბოედოვის თეატრის დირექტორი აკეთებს ამ კონცერტს და როდესაც შემომთავაზა ნიკალაიმ, დიდი სიამოვნებით დავთანხმდი. არანაირი კასტინგით არ შევურჩევივართ.
- რამე სპეციალური პროგრამით წარდგებით ამ კონცერტზე თუ?..
- ომის დროს რა სიმღერებიც დაიწერა, ის უნდა შევასრულოთ მხოლოდ.
- ვერიკო, გახსოვს როცა ქეთა თოფურიამ რუს არმიას უმღერა, საქართველოში ამ ყველაფერს როგორი რეაქცია მოჰყვა? დიდი კრიტიკა და რაც ყველაზე მთავარია, ქეთა საქართველოს მოღალატედ გამოაცხადეს. შენ რას იტყვი ამ ყველაფერზე, რამდენად ითვლება ეს ყველაფერი საქართველოს ღალატად?
- გუშინ დამირეკა ერთ-ერთმა ჟურნალისტმა და მითხრა, პუტინის მიწვევით მიდიხარო და ა.შ. მაგრამ მინდა გითხრათ, რომ არც ვიცოდი, ვინ იყო ჩვენი მასპინძელი და ეს ყველაფერი გადავამოწმე. არანაირი პუტინის მიწვევით ჩვენ იქ არ მივდივართ. არასამთავრობო სტუდენტური ორგანიზაციაა, რომელიც ვეტერანებისთვის აკეთებს ამ კონცერტს, მეტი არაფერი.
- თუმცა, როგორც ცნობილია, ამ პროექტს ვლადიმერ პუტინის აპარატი უწევს ორგანიზებას.
- გამომდინარე იქიდან, რომ რუსეთში კეთდება ეს ყველაფერი, ალბათ, რაღაც გარკვეული სტრუქტურები ჩაერთვებიან ამ პროექტში. რაც შეეხება ჩემს რეაქციებს, ძალიან დიდ სისულელედ მიმაჩნია ეს ყველაფერი, იგივე მოღალატეობის თემა და სხვა ამდაგვარი რამ. უამრავი მეგობარი და ნათესავი მყავს რუსეთში და არანაირი პრობლემა არა მაქვს იმათთან, პირიქით, დიდი სიამოვნებით ჩავალ ყოველთვის და ვიმღერებ და ჩვენთვის საყვარელი მომღერლები იქიდანაც ჩამოდიან საქართველოში. რა პრობლემაა.
თემო საჯაია, მომღერალი:
- როგორც კი ინფორმაცია გაჟღერდა, რომ აღნიშნულ კონცერტზე საქართველოდან მიდიან თემო საჯაია და ვერიკო ტურაშვილი, ძალიან ბევრმა ცუდად მიიღო - ისინი პუტინის მიერ ორგანიზებულ კონცერტებში მონაწილეობენო.
მე ქართული მხარეს მიწვევით მივდივარ, მაგრამ, როდესაც ქვეყანაში ასეთი რაღაც ხდება, იქ, რა თქმა უნდა, სახელმწიფო სტრუქტურები საქმის კურსშია, ალბათ. აქედან გამომდინარე, ესეც გადასამოწმებელია.
- მოკლედ რომ მითხრა, რამდენად მნიშვნელოვანია შენთვის იმ ადამიანების აზრი, რომლებიც ამბობენ, რომ, თუ მოსკოვში წახვალ და იმღერებ, შენ საქართველოს მოღალატე ხარ?
- ეს რომ არ იყოს კონკრეტული პროექტი მეორე მსოფლიო ომთან დაკავშირებით, მაშინ დავფიქრდებოდი. არანაირი პოლიტიკა აქ არაფერ შუაშია და აქედან გამომდინარე, ჩემთვის ორი იდიოტის აზრი მნიშვნელოვანი არ არის.
- ვინ არის ეს ორი იდიოტი?
- ის ადამიანები, ვინც ამ ყველაფერს და კერძოდ კი ჩვენ მოღალატეებს გვიწოდებენ. ძალიან მარტივ მაგალითს გეტყვით, ორი ბაბუა დავკარგე იმ ომში და ვინმემ უთხრას ახლა იმათ სულებს, რომ მოღალატეები იყვნენ.
გიორგი საკარული
