24
მაისიდღის ზოგადი ასტროლოგიური პროგნოზი
მთავარი პროკურატურა 2008 წლის აგვისტოს ომის გარემოებებს გამოიძიებს. ამას ნაციონალების მხრიდან დიდი აჟიოტაჟი მოჰყვა - ეს ქვეყნის ინტერესებს დააზარალებსო. თუმცა, სხვაგვარად ფიქრობენ პროფესიონალი სამხედროები. კერძოდ, აგვისტოს ომის მონაწილე, ეროვნული გვარდიის 213-ე ბატალიონის ყოფილი მეთაური მაიზერ გელოვანი მიიჩნევს, რომ გამოძიება აუცილებლად უნდა დაიწყოს:
- უკანასკნელი 20 წლის განმავლობაში საქართველოში მომხდარი ყველა ომის მონაწილე ვარ. 2008 წლის აგვისტოს ომის დროს სენაკში ეროვნული გვარდიის 213-ე ბატალიონის მეთაური ვიყავი. ომის წაგების მთავარი მიზეზი არაპროფესიონალიზმია. "ვარდების რევოლუციის" შემდეგ, მიხეილ სააკაშვილის ხელისუფლების ყველაზე დიდი შეცდომა თავდაცვის სამინისტროდან პროფესიონალი კადრების გათავისუფლება იყო. რამდენჯერაც შეიცვალა თავდაცვის მინისტრი, ყველა ახალმა მინისტრმა თავისი ახლობელი და ნათესავი მოიყვანა თანამდებობაზე, შევარდნაძის ხელისუფლების დროინდელი კადრები კი მხოლოდ იმიტომ გაათავისუფლეს, რომ მათ სამხედრო სამსახური რუსეთის ჯარში ჰქონდათ გავლილი. მიხეილ სააკაშვილმა წაგებულ ომში დიდი მსხვერპლისა და ტექნიკა-იარაღის მიტოვება-დაკარგვის გამო დააჯილდოვა გენერლის ჩინით ადამიანები. 2008 წლის აგვისტოს წაგებული ომის შემდეგ ქვეყანას ძალიან ბევრი გენერალი შეემატა. მიმაჩნია, რომ ეს, უბრალოდ, სირცხვილია. მე დღემდე კაპიტანი ვარ ჩინით. ნებისმიერ საქმეს სათავეში საქმის მცოდნე, პროფესიონალი უნდა ჩაუდგეს. ვინ იყო და ან სად იყო გენერალიტეტი ამ ომში, კაცმა არ იცოდა.
- მაშ, ვინ გასცემდა განკარგულებებს?
- არავინ არანაირ განკარგულებას არ გასცემდა. 7 აგვისტოდან ჩემი ბატალიონის ყველა წევრი საბრძოლო მზადყოფნაში იყო. 2008 წლის 11 აგვისტოს მივიღეთ განკარგულება, რომ ბატალიონი უნდა დაგვეშალა. არადა, 2 ათასამდე შეიარაღებული მებრძოლი ბრძოლაში მონაწილეობის ბრძანებას ველოდით. მანამდე რუსებმა სენაკის ბაზა დაბომბეს. დაშლის შემდეგ ნაწილი აჭარაში გადავედით, ცოტა ხნის შემდეგ კი, ხელმძღვანელობის ბრძანებით, კოჯრის ბატალიონში გადმოგვიყვანეს.
ეს ბრძანება ვინ გასცა, არ ვიცი, არ წამიკითხავს. ომში დამარცხების მთავარი მიზეზი ის იყო, რომ ხელმძღვანელი პირები ვერ ფლობდნენ საომარი მოქმედების დროს მართვის სადავეებს. ასევე იყო კომუნიკაციის დეფიციტი დანაყოფებსა და ხელმძღვანელ პირებს შორის. ოდითგანვე ცნობილია, რომ ქართველ მეომრებს მეფეები და მხედართმთავრები ამხნევებდნენ, ჩვენი მებრძოლების მხედართმთავარი კი აგვისტოს ომში გიგი უგულავა იყო. მითხრას ვინმემ, რა გაეგება გიგი უგულავამ ომის? ან უმაღლესი მთავარსარდალი რომ ჰქვია მიხეილ სააკაშვილს, იცის კი სამხედრო და საომარი მოქმედების დროს როგორ მოიქცეს? გენერალურმა პროკურატურამ სასწრაფოდ და აუცილებლად უნდა გამოიძიოს, რატომ წავაგეთ ომი, ყველა ის პირი უნდა დაიკითხოს, ვისაც არც ცოდნა, არც გამოცდილება და არც უფლება ჰქონდა, საბრძოლო მოქმედებების დროს ბრძანება გაეცა ან ჯარისთვის რაიმე გადაწყვეტილება გაეცნო. ყველა ასეთი პირი კანონის მთელი სიმკაცრით უნდა დაისაჯონ. პირველ რიგში, უნდა დაიკითხოს გიგი უგულავა, რომელიც განაკარგულებებს გასცემდა ომის დროს და ამით აშკარად არღვევდა კანონს. ჯარისკაცისთვის გიგი უგულავა იყო ავტორიტეტი თუ დავით კეზერაშვილი?! როგორი უავტორიტეტო ხალხიც ხელმძღვანელობდა აგვისტოს ომს, შედეგიც შესაბამისი მივიღეთ. უგულავას, კეზერაშვილსა და ყველა ნაციონალს პროფესიონალი, ვაჟკაცი და ავტორიტეტული ადამიანები ჭირივით სძულდათ. ყველა მათგანს ერთდროულად უპირატესობისა და არასრულფასოვნების კომპლექსი აწუხებდა...
მაგალითად, გიგი კალანდაძე, რომელსაც წაგებული ომის შემდეგ გენერლობა მიანიჭეს, იმ მე-4 ბრიგადას ხელმძღვანელობდა, რომელმაც ომში ყველაზე მეტი მებრძოლი დაკარგა, ამ ბრიგადის მებრძოლებმა დაყარეს იარაღი და მტერს დიდძალი ძვირად ღირებული ტექნიკა ჩაუგდეს ხელში, ბრიგადის მეთაურმა გიგი კალანდაძემ კი უკანმოუხედავად მოკურცხლა ბრძოლის ველიდან. აი, ამ "გმირობისთვის" უბოძა მიხეილ სააკაშვილმა გიგი კალანდაძეს გენერლობა. დღეს კი გიგი კალანდაძე აგვისტოს ომის გმირად გვევლინება, მას ისევ ის ბინძური ძალა მართავს, ვინც დაუმსახურებლად გადასცა გენერლობა.
დარეჯან ლიპარტელიანი
ყოველკვირეული გაზეთი "ყველა სიახლე"
(გამოდის ოთხშაბათობით)
