ვისბადენის კინოფესტივალზე ქართულმა ფილმმა მთავარი პრიზი მიიღო

ვისბადენის კინოფესტივალ go East-ზე ნანა ექვთიმიშვილისა და სიმონ გროსის ფილმმა "გრძელი ნათელი დღეები" მთავარი პრიზი (The ŠKODA Film Award) მიიღო.

როგორც "ამბები.გე"-ს საქართველოს კინემატოგრაფიის ეროვნული ცენტრის საზოგადოებასთან ურთიერთობის სამსახურის მენეჯერმა ნინია ახვლედიანმა განუცხადა, ვისბადენის კინოფესტივალი go East 10 აპრილს გაიხსნა და 16 აპრილს დაიხურა, სადაც მთავარი პრიზი ქართულმა კოპროდუქციამ "გრძელი ნათელი დღეები" მთავარი პრიზი The ŠKODA Film Award და ჯილდოდ 10 000 ევრო მიიღო.

ბერლინალეს და ჰონგკონგის ფესტივალების შემდეგ, ეს ფილმისთვის მორიგი გამარჯვებაა. ქართული ნამუშევარი, რომელიც თბილისში მძიმე 90-იანი წლების ფონზე თინეიჯერების ცხოვრებას ასახავს, საფესტივალო ცხოვრებას აგრძელებს.

ვისბადენის კინოფესტივალზე go East ასევე გამოვლინდა ორი გამარჯვებული ქართული კინოპროექტი, რომლებიც ნომინირებული იყო რობერტ ბოშის ფონდის 2013 წლის პროგრამაში კოპროდუქციის პრიზზე Coproduction Prize.

ეროვნული კინოცენტრის და ბოშის ფონდის ერთობლივი ტრენინგის შედეგად, ამ ნომინაციაში ახალგაზრდა რეჟისორის და ანიმატორის, დათო კიკნაველიძის და პროდიუსერის, ლელა აქიაშვილის ანიმაციური ფილმის პროექტი "ჯინო" და სალომე ჯაშის ფილმის პროექტი, პირობითი სათაურით - "სადგური" გამოვლინდა.

გერმანული მხრიდან პროექტის პროდიუსერია ურტე ფინკი. ქართული პროექტები ჟიურიმ საუკეთესოებად აღიარა და Robert Bosch Schtiftung  Prize-ით დაჯილდოვდა.

თითოეულმა პროექტის ავტორმა ფილმის გადასაღებად ბოშის ფონდისგან 70 000 ევრო მოიპოვეს.

2012 წელს ისინი მონაწილეობდნენ საქართველოს ეროვნული კინოცენტრისა და რობერტ ბოშის ფონდის მიერ ორგანიზებულ უორქშოფში "Project Marke თბილისი".

უორქშოფში მონაწილეობის შედეგად, დათო კიკნაველიძის შემოქმედებით გუნდს შეუერთდა ახალგაზრდა გერმანელი კოპროდიუსერი ანე-კატრინ ლივერენსი და გერმანელი ხმის რეჟისორი და კომპოზიტორი მარიან მენტრუპი.

რობერტ ბოშის კოპროდუქციის პროექტი ქართული განაცხადებისათვის 2011 წელს მოლაპარაკებების შედეგად გაიხსნა. ტრენინგი და უორქშოფი თბილისში ორჯერ, 2011-2012 წლებში ჩატარდა.

2011 წელს კოპროდუქციის პრიზზე ნომინირებული იყო დოკუმენტური ფილმის პროექტი "მადონა" ( ავტორები: ნათია გულიაშვილი, ნინო გოგუა).

გიორგი ბერიძე