Georgian Journal-ი დღეს დიპლომატებისთვის წვეულებას გამართავს. ელჩებთან ერთად სასტუმრო "თბილისი მარიოტში" დაგეგმილ საღამოზე მიწვეულ სტუმრებს შორის იქნებიან საერთაშორისო ორგანიზაციების, სამთავრობო და არასამთავრობო სექტორის წარმომადგენლები, საზოგადოებისთვის ცნობილი სახეები და ჟურნალისტები.
ყოველწლიური ღონისძიების ფარგლებში ტრადიციული დაჯილდოება გაიმართება, სადაც სხვადასხვა ნომინაციებში გამარჯვებულ დიპლომატებს გამოავლენენ. ნომინაციებს შორის იქნება ყველაზე კომუნიკაბელური ელჩი, ყველაზე სპორტული ელჩი და ა.შ. სტუმრებისთვის დადებითი განწყობის შესაქმნელად მოეწყობა სახალისო კონკურსები, ამასთან საღამო გაფორმებული იქნება ცოცხალი მუსიკით.
Georgian Journal-ის მთავარი რედაქტორის, გენო ჯოხაძის განცხადებით, ღონისძიების მთავარი მიზანი დიპლომატებსა და მედიის წარმომადგენლებს შორის ურთიერთობების განვითარების ხელშეწყობაა. ინგლისურენოვანი ჟურნალის ორგანიზებით, ელჩებისთვის წვეულება წელს უკვე მეორედ გაიმართება.
Georgian Journal "მედია პალიტრის" ჰოლდინგში შემავალი ყოველკვირეული გამოცემაა. ახალი ამბების, თანამედროვე პოლიტიკის, ეკონომიკის, ბიზნესის, საზოგადოებისა თუ სხვა ზოგადი მიმართულებების გარდა, გაზეთში დიდი ადგილი ეთმობა ქართული ტრადიციების აღწერასა და ისტორიულ რუბრიკებს, რომლის მიზანია უცხოელებს მაქსიმალურად მიეწოდოთ ინფორმაცია საქართველოს, მისი კულტურისა და ტრადიციების შესახებ.