1
ივნისიდღის ზოგადი ასტროლოგიური პროგნოზი
პოპულარული საავტომობილო მარკების ოფიციალური ქართველი დილერები მანქანებში გაზის აპარატურის ჩაყენებას კატეგორიულად ეწინააღმდეგებიან. ყოველ შემთხვევაში, მათი პოზიცია დაახლოებით ასეთია: "თუ ჩემთან ნაყიდ ავტომობილში გაზი ჩააყენე, დაივიწყე გარანტია, ხელებიც დამიბანიაო".
იმის გათვალისწინებით, რომ ბენზინისა და დიზელის ფასები, დაპირების მიუხედავად, ხელისუფლების შეცვლის პირობებშიც არ შემცირდა, ავტომფლობელებს სხვა გამოსავალი თითქმის აღარაფერი რჩებათ, რომ მანქანა გაზის სისტემაზე გადაიყვანონ. მათ შორის, ამ ნაბიჯს დგამს ბევრი ისეთი მძღოლიც, რომელიც თუნდაც ლუქსის კლასის ავტომობილის საჭესთან ზის და ამაში გასაკვირი, პრინციპში, არც არაფერია - ზედმეტი ხარჯი აბა, ვის რაში სჭირდება?!
ცნობილი ფაქტია, რომ გაზის აპარატურას მანქანებში ლამის ყოველ ფეხის ნაბიჯზე აყენებენ და რაღა თქმა უნდა, ნდობის კოეფიციენტი ბევრი ასეთი სერვისცენტრის მიმართ არცთუ მაღალია.
საკითხის აქტუალურობიდან გამომდინარე, "ალია" დაინტერესდა, რომელ ასეთ სერვისცენტრებს, ან უხეშად რომ ვთქვათ, რომელ გაზის ჩამყენებლებს ენდობიან უფრო მეტად საავტომობილო ბაზრის მსხვილი მოთამაშეები და მათ სწორედ ამის გასარკვევად დავუკავშირდით.
იმის ნაცვლად, რომ ჩვენთვის საინტერესო კითხვაზე მიგვეღო პასუხი, სრულიად განსხვავებული სურათის მომსწრენი გავხდით - ფაქტობრივად, ყველა კომპანია, ანუ პოპულარული მარკების ყველა ოფიციალური დილერი მანქანაში გაზის აპარატურის ჩაყენებისგან თავს ძალიან შორს იჭერს.
თავდაპირველად "ალია" "ტოიოტა ცენტრი თბილისის" ოფისს დაუკავშირდა, სადაც გაყიდვების განყოფილებაში ასეთი პასუხი გაგვცეს:
- არანაირი შეხება გაზის აპარატურის მემონტაჟეებთან არ გვაქვს და შესაბამისად, რეკომენდაციასაც ვერავის გავუწევთ. მიზეზი ის არის, რომ ვერ ვენდობით ვერავის, არ ვიცით, ვინ როგორ და რა აპარატურას აყენებს და რა პრობლემები შეიძლება გაუჩნდეს მანქანას.
- და თუ მაინც ჩააყენა თქვენთან ნაყიდ ავტომობილში კლიენტმა გაზის აპარატურა, ამის მერე რა ხდება?
- მას გარანტია ავტომატურად ეხსნება. კლიენტმა წინასწარვე იცის, რომ, სანამ გარანტიის ვადა არ ამოიწურება, მანქანა სერვისზე ჩვენთან უნდა მოიყვანოს და თუ მან გაზი ჩააყენა, ყველანაირ პასუხისმგებლობას ვიხსნით.
- თუ ყოფილა შემთხვევა, რომ გაზის აპარატურის ჩაყენების გამო კლიენტს პრობლემები შექმნია და დახმარება უთხოვია?
- არა, ასეთი რამ არ ყოფილა.
ამის შემდეგ იმავე კითხვებით "ალია" უკვე საქართველოში "მერსედეს-ბენცის" ოფიციალურ წარმომადგენელს, კომპანია "აკას" დაუკავშირდა, სადაც ზუსტად ანალოგიური პასუხები გაგვცეს:
- ჩვენ ამ საკითხებში არ ვერევით და ვერაფერს გეტყვით. ეს იმიტომ ხდება, რომ გაზის აპარატურის ჩაყენების შემთხვევაში, რთულდება ავტომობილის დიაგნოსტიკა, შეიძლება ქარხნულმა კომპიუტერმა აურიოს და ასე შემდეგ. შესაბამისად, გარანტია კლიენტს ეხსნება.
სამწუხაროდ, ვერაფრით დავუკავშირდით "აუდი ცენტრი თბილისს", "ლაქშერი ქარსს" ("ნისანისა" და "ინფინიტის" წარმომადგენლობა), თუმცა გაგვიმართლა "ომეგა მოტორსის" შემთხვევაში, რომელიც, მოგეხსენებათ, საქართველოში "ბეემვეს" ოფიციალური დილერია. ვესაუბრეთ "ფოლკსვაგენი ცენტრი თბილისის" ოფისს, "ჯი-თი მოტორსს" ("ლენდ როვერისა" და "ფორდის" წარმომადგენლობა) და პასუხები აქაც იდენტური მივიღეთ. კერძოდ, გაზის არც ერთ ჩამყენებელს რეკომენდაცია არავინ გაუწია და გარანტიის გაუქმებაც ყველასთან ავტომატურად ხდება.
აქვე იმასაც დავამატებთ, რომ, თუკი ყველა კომპანიაში გვითხრეს, გაზის აპარატურით აღჭურვილი პრობლემური ავტომობილებით ჩვენთან არავინ მისულაო, "ჯი-თი მოტორსში" გვიპასუხეს, რომ ასეთი შემთხვევები ჰქონიათ "ლენდ როვერის" მოდელებთან მიმართებაში. მაგალითად, მწყობრიდან გამოდის "ვოზდუხამერი", იწყება "პერებოი" და ასე შემდეგ.
მოკლედ, ფაქტი ის არის, რომ გაზის აპარატურის მონტაჟის ბიზნესი დუღს და გადმოდუღს, მაგრამ მსხვილი ავტოდილერები ბიზნესის ამ სეგმენტის წარმომადგენლებს არ ენდობიან.
რა პასუხი ექნებათ თავად გაზის დამონტაჟებაზე მომუშავე კომპანიებს ამ ყველაფერზე, "ალიას" მომდევნო ნომერში მოგიყვებით.
მიხეილ სახვაძე
