რისი ეშინია პაპუნა დავითაიას და რისი იმედი აქვს თამარ კორძაიას

მათ სჯერათ საკუთარი შესაძლებლობების, სწამთ იმ პოლიტიკური გუნდის, რომელსაც წარმოადგენენ და იმედი აქვთ, რომ მოახლოებულ შუალედურ არჩევნებში გაიმარჯვებენ... შევეცადე გამერკვია, როგორია "ნაციონალი" პაპუნა დავითაიას და "ქართული ოცნების" წარმომადგენლის, თამარ კორძაიას შეხედულებები, როგორ აფასებენ ქვეყანაში ბოლო დროს განვითარებულ მოვლენებს და რას ემყარება მათი გამარჯვების იმედი.

- რა გაძლევთ არჩევნებში გამარჯვების იმედს?

პაპუნა დავითაია:

- ჩემთვის რეიტინგი არ არის მთავარი, გაცილებით მნიშვნელოვანია ის, რომ საშუალება მეძლევა, საზოგადოებას ქვეყანაში არსებული პრობლემების გადაჭრის ჩემეული ხედვა გავაცნო... გამარჯვების იმედს მაძლევს ის, რომ ოქტომბრის შემდეგ რაღაცები შეიცვალა. ხალხს არარეალურის მოლოდინი გაუქრა და სიტუაციის ობიექტურად შეფასება დაიწყო.

თამარ კორძაია:

- გამარჯვების იმედს მაძლევს ის პოლიტიკური ჯგუფი, რომელსაც მოსახლეობამ ნდობა გამოუცხადა. მიხარია, რომ "ქართული ოცნების" იდეოლოგია იმ ღირებულებებს ემთხვევა, რომლითაც მე ვცხოვრობ. მწამს, რომ ეს გუნდი ხალხს მხოლოდ რეალურ დაპირებებს აძლევს. ამაზე ის ფაქტიც მეტყველებს, რომ არჩევნებამდე მიცემულ დაპირებებს ნაბიჯ-ნაბიჯ ასრულებს.

- რა არის თქვენი მთავარი დაპირება, რომელსაც გამარჯვების შემთხვევაში აუცილებლად შეასრულებთ?

პაპუნა დავითაია:

- თითოეული ჩემი ამომრჩევლის ადვოკატი გავხდები, როგორც ცენტრალურ, ისე ადგილობრივ ხელისუფლებასთან ურთიერთობისას. საკმაოდ დიდხანს ვიმუშავე ცენტრალურ ხელისუფლებასა და პარლამენტში, ამასთან, იურიდიული გამოცდილებაც მაქვს. ე.ი. ერთი მხრივ, ჩემი მთავარი ფუნქცია საზოგადოების პულსზე ხელის დადებაა, მეორე მხრივ კი - ყველანაირად ვეცდები, სახელმწიფო აპარატი და პარლამენტი ეკონომიკის ამუშავებისთვის მოვმართო.

თამარ კორძაია:

- ჩემი მთავარი დაპირება ის არის, რომ ყველა პრობლემის გადაჭრის დროს, ჩემი ამომრჩევლის გვერდით ვიქნები.

- თქვენი ოპონენტის შესაძლებლობებს როგორ შეაფასებთ?

პაპუნა დავითაია:

- არ ვიცი, ვერ შევაფასებ, ეს ჩემი საქმე არ არის. ძალაუფლების მოპოვებისთვის არ ვიბრძვი. მე მხოლოდ პრობლემების გადაჭრის გზებზე ვფიქრობ.

თამარ კორძაია:

- პაპუნა დავითაია არჩევნებში დამარცხებული პოლიტიკური ძალის წარმომადგენელია. ვფიქრობ, რომ მას არც ამ შემთხვევაში აქვს დიდი შანსი.

- ოპონენტთან რაიმე კითხვა თუ გაქვთ?

პაპუნა დავითაია:

- მაქვს. მაინტერესებს, რატომ შეაჩერეს პროექტები, რომლებშიც ათასობით ადამიანი იყო დასაქმებული? რატომ გააუქმეს სოციალური დახმარებები?

თამარ კორძაია:

- მე მაინტერესებს, პაპუნა დავითაიასა და ზოგადად, "ნაციონალურ მოძრაობას" მხოლოდ არჩევნების დროს რატომ ახსენდება ხალხი?

- 19 აპრილს რას უნდა ველოდოთ?

პაპუნა დავითაია:

- 19 აპრილი ძალიან მნიშვნელოვანი თარიღია - ამ დღეს ხელისუფლების გამოფხიზლებას შევეცდებით. "ქართული ოცნების" წარმომადგენლები არჩევნებში მოპოვებული გამარჯვების შემდეგ ეიფორიაში ჩაცვივდნენ და ფიქრობენ, რომ ახლა მათ ყველაფრის გაკეთების უფლება აქვთ: აფერხებენ ქვეყნის ეკონომიკურ განვითარებას, საჯარო სამსახურიდან ათასობით ადამიანს უშვებენ და მათ ადგილებზე თავიანთ ნათესავებს ნიშნავენ. ეს ძალიან ცუდია და თუ ვინმემ არ შეუძახა, შეცდომების დაშვებას კვლავ გააგრძელებენ... ოპოზიცია იმისთვის არის, რომ ხელისუფლებას გზა ურმის გადაბრუნებამდე დაანახვოს.

თამარ კორძაია:

- 19 აპრილი ერთი ჩვეულებრივი თარიღია. ამ დღეს საქართველოს მოსახლეობის მცირე ნაწილს, რომელიც "ნაციონალურ მოძრაობას" გულშემატკივრობს, დაცული ექნება კონსტიტუციით აღიარებული, შეკრებისა და სიტყვის თქმის უფლება. ისინი საჯაროდ გამოხატავენ თავიანთ მოსაზრებებს. თუმცა დარწმუნებული ვარ, რომ მათი აქცია რეზონანსული არ იქნება. ამ პოლიტიკურმა ძალამ 9 წლის განმავლობაში იმდენი შეცდომა დაუშვა, რომ უკვე ბოლომდე გაკოტრებულია და ქართველი ხალხის მხარდაჭერას ვეღარ მოიპოვებს.

- არის თუ არა დღეს ქვეყანაში ნეპოტიზმი?

პაპუნა დავითაია:

- რა თქმა უნდა, არის. ირმა ნადირაშვილმა ღარიბაშვილს კონკრეტული გვარები დაუსახელა იმ ადამიანებისა, რომლებიც შინაგან საქმეთა სამინისტროში ნათესავი მინისტრის წყალობით მოხვდნენ.

თამარ კორძაია:

- ქვეყანაში ნეპოტიზმი საერთოდ არ არის. ადამიანები დღეს მხოლოდ თავიანთი პროფესიონალიზმისა და შესაძლებლობების გათვალისწინებით ინიშნებიან ამა თუ იმ თანამდებობაზე.

- არის თუ არა აუცილებელი პროკურატურასა და შინაგან საქმეთა სამინისტროდან ძველი კადრების გაშვება?

პაპუნა დავითაია:

- ზოგიერთი მინისტრი თავის წარუმატებლობას ძველ კადრებს აბრალებს. პოლიტიკური ნიშნით პროფესიონალი კადრების გათავისუფლება ქვეყნისთვის ძალიან ცუდია. სამოხელეო აპარატის შენარჩუნება აუცილებელია. თუ ხელისუფლების ყოველი შეცვლის შემდეგ უწყებებში საკადრო ცვლილებებს განვახორციელებთ, გამოცდილ, არაკორუმპირებულ აპარატს ვერასდროს შევქმნით.

თამარ კორძაია:

- ეს ძალიან რთული საკითხია. რა თქმა უნდა, პროფესიონალი კადრი სამსახურიდან პოლიტიკური ნიშნით არ უნდა გაუშვა, მაგრამ თუ ის თავის პროფესიონალიზმს ცუდად იყენებს და საქმეს შეგნებულად აფუჭებს, მაშინ ასეთი ადამიანი არც პროკურატურაშია გასაჩერებელი, არც შინაგან საქმეთა სამინისტროსა და არც სხვა რომელიმე უწყებაში. განსაკუთრებული სიფრთხილის გამოჩენაა საჭირო პროკურატურასა და შსს-ში, რომ მავანმა საქმის ობიექტურ გამოძიებას ხელი არ შეუშალოს.

- თქვენი აზრით, რატომ ფერხდება ისეთი საქმეების გამოძიება, როგორიც ვთქვათ, ზურაბ ჟვანიას მკვლელობაა?

პაპუნა დავითაია:

- ეს კითხვა იმას უნდა დაუსვათ, ვისაც არ სჯეროდა, რომ "ნაციონალური მოძრაობის" მმართველობის დროს საქმეებს ობიექტურად იძიებდნენ. "ქართული ოცნება" ხელისუფლებაში მოსვლამდე ხალხს ჰპირდებოდა, რომ ყველა გახმაურებულ საქმეს თავიდან, ობიექტურად გამოიძიებდა. ჰოდა, გამოიძიონ...

თამარ კორძაია:

- ასეთი საქმეების გამოძიება იმიტომ ყოვნდება, რომ დანაშაულში მონაწილე პირები მაქსიმალურად შეეცადნენ კვალის წაშლას. ეს მარტივი საქმე არ არის. თუმცა ვიცი, რომ რამდენიმე გახმაურებული საქმე, მათ შორის ჟვანიას მკვლელობა, დასასრულს უახლოვდება. იმედია, საზოგადოება მალე ყველაფერს გაიგებს.

- რატომ გახდა "ნაციონალებსა" და "ქართულ ოცნებას" შორის უთანხმოების საგანი "საერთო სასამართლოების შესახებ" კანონპროექტი?

პაპუნა დავითაია:

- ამ საკითხთან დაკავშირებით უთანხმოება მხოლოდ "ნაციონალებსა" და "ქართულ ოცნებას" შორის კი არა, "ქართულ ოცნებასა" და ვენეციის კომისიას შორისაც არის. თავიდან ხელისუფლება ამბობდა, რომ სასამართლო რეფორმას მთლიანად ვენეციის კომისიის რეკომენდაციებზე ააგებდა. თუმცა მას შემდეგ, რაც გაირკვა, რომ ვენეციის კომისიის რეკომენდაციები მათ სურვილებს არ ემთხვეოდა, გადაწყვეტილება შეცვალეს. ეს ჩვენს ქვეყანას ძალიან უხერხულ მდგომარეობაში აყენებს.

თამარ კორძაია:

- ეს საკითხი უთანხმოების მიზეზი იმიტომ გახდა, რომ "ნაციონალურ მოძრაობას" იმ ბერკეტების ხელიდან გაშვება არ უნდა, რომლის საშუალებითაც სასამართლოს აკონტროლებს. იყო დრო, როდესაც "ნაციონალები" იუსტიციის საბჭოსა და მთელ სასამართლო კორპუსს თავის ჭკუაზე ატარებდნენ. ახლა სიტუაცია რადიკალურად იცვლება, მოსამართლეები სრულიად თავისუფლდებიან, სასამართლო ხალხს უბრუნდება.

- როგორ ფიქრობთ - საია-სა და აჭარის პოლიციის უფროსის დაპირისპირება უბრალო ინციდენტია თუ "ქართულ ოცნებაში" ფარული დაპირისპირების შედეგი?

პაპუნა დავითაია:

- რაღაც კულუარული ამბები კი მსმენია, მაგრამ... ფაქტია, რომ კოალიცია თანამოაზრეების ერთიან გუნდს არ წარმოადგენს. სხვადასხვა იდეოლოგიისა და მრწამსის ადამიანებს მხოლოდ ერთი საერთო ჰქონდათ - ეს "ნაციონალების" ჩანაცვლების სურვილი იყო. ძალიან ცუდია, რომ ძალაუფლებისთვის ბრძოლას ქვეყნის ინტერესები ეწირება.

თამარ კორძაია:

- არ ვიცი, შეთქმულებების თეორიები ჩემთვის სრულიად მიუღებელია. მოხდა ფაქტი და ეს ყველასთვის ცნობილია. ახალგაზრდა იურისტთა ასოციაციამ პროკურატურაში უკვე შეიტანა საჩივარი. დარწმუნებული ვარ, პროკურატურა თავის დასკვნას უახლოეს მომავალში დადებს.

- სახალხო დამცველის ანგარიშს როგორ შეაფასებთ?

პაპუნა დავითაია:

- როგორც ანტისახელმწიფოებრივ დოკუმენტს. ეს არის დაუსაბუთებელ ეჭვებზე დაყრდნობით დაწერილი ანგარიში, რომელიც ძალიან ცუდად ემთხვევა რუსეთის სპეცსამსახურების ვერსიებს. ნანუაშვილი, რუსული სპეცსამსახურების მსგავსად, ირწმუნება, რომ საქართველოში ტერორისტებს ავარჯიშებენ. თუ ვინმეს ჰგონია, რომ ამ თემების სპეკულირებით მხოლოდ "ნაციონალურ მოძრაობას" დააზიანებს, ძალიან ცდება...

თამარ კორძაია:

- ძალიან კარგი ანგარიშია. სახალხო დამცველი იმისთვის არსებობს, რომ ადამიანის უფლებების დაცვისთვის იზრუნოს. უჩა ნანუაშვილმა თავის ანგარიშში ძალიან სერიოზული საკითხები წამოსწია. ერთ-ერთი მნიშვნელოვანი თემა - ლაფანყურის სპეცოპერაცია გახლდათ.

- იყო თუ არა ლაფანყურის სპეცოპერაცია შეცდომა?

პაპუნა დავითაია:

- ვერ ვიტყვი, იყო თუ არა ეს შეცდომა. ჩვენ ვიხილეთ, რომ საქართველოს ტერიტორიაზე გაურკვეველი სამხედრო დაჯგუფება შემოვიდა. ნებისმიერი სახელმწიფო ვალდებულია, თავის ტერიტორიაზე შეიარაღებული, არაფორმალური დაჯგუფების გადაადგილება აღკვეთოს. სასურველი იყო, სპეცოპერაცია მსხვერპლის გარეშე დასრულებულიყო, მაგრამ ეს ყოველთვის ასე არ ხდება. პროფესიონალების გადასაწყვეტია, როდის უნდა გამოიყენონ ძალა.

თამარ კორძაია:

- ნებისმიერი ოპერაცია, რომელსაც ადამიანების სიცოცხლე ეწირება, შეცდომაა. სპეცოპერაციის შესახებ ახლა ამაზე მეტს ვერ ვიტყვი, რადგან ამ საქმეზე გამოძიება მიმდინარეობს. ერთი რამ ცხადია - გამოძიების შედეგი ძალიან მალე გახდება ცნობილი და ვფიქრობ, ხელისუფლების ყოფილ წარმომადგენლებსა და ახლანდელ პრეზიდენტს ბევრ კითხვაზე მოუწევთ პასუხის გაცემა.

- ვანო მერაბიშვილი ამბობს, რომ ყველაფერს იღონებს რაბათის ციხის გადასარჩენად. როგორ ფიქრობთ - რაბათის ციხე მართლაც გადასარჩენია?

პაპუნა დავითაია:

- თუ გავითვალისწინებთ იმას, რომ ხელისუფლება რაბათის ციხეზე გუმბათის მონგრევას და ტაძრიდან ჯვრისფორმიანი ქვების გამოტანას აპირებს, რაბათის ციხის გადასარჩენად ბრძოლა მოგვიწევს. პრობლემა ის გახლავთ, რომ რაბათი მხოლოდ ერთი შემთხვევა არ არის - "ქართული ოცნება" ჯერ კიდევ ოპოზიციაში იყო, როდესაც ამა თუ იმ შენობა-ნაგებობის დანგრევას იქადებოდა. წესით, ადამიანს ნგრევის ინსტინქტიც აქვს, შენებისაც, "ქართული ოცნება" კი მხოლოდ ნგრევაზე ლაპარაკობს. ხომ შეიძლება, აშენებაზეც იფიქრონ? ცოტა ციხესიმაგრეა აღსადგენი, რაბათს რომ არ მისდგომოდნენ?!

თამარ კორძაია:

- არ ვიცი, რატომ უნდა იბრძოლოს მერაბიშვილმა რაბათის ციხის გადასარჩენად, როდესაც ეს საჭირო არ არის. ალბათ მერაბიშვილი უკვე 19 აპრილის აქციისთვის ემზადება და უნდა, რომ საზოგადოებაში რაც შეიძლება უარყოფითი მუხტი შექმნას. რეალურად, საკითხი ასე დგას: თურქეთის კულტურის სამინისტრომ ქართულ მხარეს სთხოვა, აღდგენილი გუმბათისთვის ისტორიული ტყვიის ფერი დაებრუნებინათ, ხოლო მეჩეთში განთავსებული, ქართული კულტურის ატრიბუტები სხვა ადგილზე გადაეტანათ. თუმცა გადაწყვეტილების ცალმხრივად მიღებას არავინ აპირებს, საქმეში უკვე ჩაერთო საპატრიარქო. თუ მოლაპარაკების პროცესი წარმატებით დასრულდება, ქართულ მხარეს იშხნისა და ოშკის რესტავრაციის პროცესში ჩართვის საშუალება მიეცემა.

- რა შედეგი შეიძლება მოჰყვეს მოსკოვში გამართულ ქართულ-რუსულ ეკონომიკურ ფორუმს?

პაპუნა დავითაია:

- თუ რუსეთ-საქართველოს შორის ეკონომიკური ურთიერთობები ჩამოყალიბდება, ცუდი არ იქნება. რუსეთი ჩვენთვის მართლაც, ძალიან დიდი ბაზარია. თუმცა ეს ქართული სახელმწიფოს ინტერესების ხარჯზე არ უნდა მოხდეს. იმედი მაქვს, რომ ეს ამბავი მხოლოდ ეკონომიკურ აქტივობად დარჩება და სანაცვლოდ რომელიმე ტერიტორიას ან სახელმწიფო ინტერესების დათმობას არ მოგვთხოვენ.

თამარ კორძაია:

- ეკონომიკური ფორუმების მიზანი - ინვესტიციების მოზიდვა და ეკონომიკური საქმიანობის ხელშეწყობაა და ვფიქრობ, რომ შედეგიც მხოლოდ ეს იქნება. ქართული პროდუქციის რუსეთის ბაზარზე დაბრუნება ქართული ოჯახების კეთილდღეობაზე პირდაპირ აისახება. იმედი მაქვს, რომ ჩვენი ქვეყანა ასეთ ფორუმებს მხოლოდ რუსეთში კი არა, სხვა ქვეყნებშიც წარმატებით ჩაატარებს.

ხათუნა ბახტურიძე

ჟურნალი ”გზა”

(გამოდის ხუთშაბათობით)