11
ივნისიდღის ზოგადი ასტროლოგიური პროგნოზი
მომღერალი სოფო ნიჟარაძე ჟურნალ "რეიტინგს" სასამართლოში უჩივის. როგორც დღეს გამართულ პრესკონფერენციაზე სოფო ნიჟარაძემ განაცხადა, ჟურნალში დაიბეჭდა მისი პირადი ცხოვრების შესახებ სტატია, სადაც არც ერთი სიტყვა სიმართლეს არ შეესაბამება.
"სამწუხაროდ, ამ ბოლო დროს გახშირდა მსგავსი სტატიები. სწორედ იმიტომ, რომ აქამდე ხმას არ ვიღებდი, თავს გავიდნენ მსგავსი ჟურნალები, სრულიად სიცრუეს ავრცელებენ და ეს სიცრუე გახდა მათი უმთავრესი საშუალება ჟურნალის გასაყიდად. ყველა ეპიზოდი, რაც ამ ჟურნალის მიერ დაბეჭდილ სტატიაში არის აღწერილი, არის სიცრუე და არც ერთი სიტყვა სიმართლეს არ შეესაბამება. მე მაქვს ჩემი სიმართლე და სწორედ ამ სიმართლის დასამტკიცებლად მივდივარ სასამართლოში", - განაცხადა სოფო ნიჟარაძემ.
მომღერლის უფლებებს ადვოკატი გოგიტა გაბაიძე დაიცავს. გოგიტა გაბაიძის თქმით, სარჩელი უახლოეს დღეებში მომზადდება. მისივე თქმით, სასარჩელო მოთხოვნა იქნება, რომ იგივე ფორმით მოხდეს უარყოფა და ბოდიშის მოხდა. ასევე კიდევ ერთი სასარჩელო მოთხოვნა მორალური ზიანის ანაზღაურება იქნება, რომლის ოდენობაც გაბაიძის თქმით, შეთანხმების შედეგად დადგინდება. სოფო ნიჟარაძის განცხადებით, ის მორალური ზიანისთვის განკუთვნილ თანხას ქველმოქმედებას მოახმარს.
"2013 წლის 25 მარტს ჟურნალ "რეიტიგში" გამოქვეყნდა შეურაცხმყოფელი და ცილისმწამებლური სტატია, რომელიც სოფო ნიჟარაძეს ეხებოდა. ჟურნალისტმა გვარად მელაძემ გაავრცელა ცნობები, რომელიც ყოველგვარ მტკიცებულებს მოკლებულია. ჟურნალისტის აღნიშნული საქციელი გაცდა ყოველგვარ სამართლებრივ ჩარჩოს. დღეს ვიმყოფებოდი რეიტინგის რედაქტორთან მანანა ღოღობერიძესთან, მინდოდა, რომ ეს საკითხი მოგვარებულიყო სასამართლოს გარეშე და ჟურნალისტს გაეკეთებინა ის, რასაც კანონმდებლობა ითვალისწინებს, რომ იგივე ფორმით უარეყო აღნიშნული ჭორები და ამავე დროს მომხდარიყო ზარალის ანაზღაურებაც. მაგრამ "რეიტინგმა" განაცხადა, რომ ისინი რაღაც ფორმით დაბეჭდავენ და უარყოფენ, მაგრამ ბოდიშს ვერ მოიხდიან, რადგან ასეთი რამ ხშირად ხდება. სხვა ჟურნალისტებსაც დაუბეჭდავთ თურმე სტატიები და სოფო ნიჟარაძეს ამასთან დაკავშირებით არანაირი რეაგირება არ გაუკეთებია", - განაცხადა გოგიტა გაბაიძემ.
"რეიტინგი" მზად იყო სოფო ნიჟარაძის სტატიის შესახებ ჟურნალში განმარტება გაეკეთებინა, - განუცხადა "ამბები.გე"-ს "რეიტინგის" მთავარმა რედაქტორმა მანანა ღოღობერიძემ. მისი თქმით, სოფო ნიჟარაძის შესახებ სტატია დაიბეჭდა რუბრიკაში "ჭორი და მართალი", სადაც შესაძლებელია იყოს როგორც ჭორი, ისე სიმართლე.
"მასალა, რომელიც დაიბეჭდა ჟურნალ "რეიტინგში" სოფო ნიჟარაძის შესახებ, გავიდა რუბრიკაში "ჭორი და მართალი". ამ რუბრიკაში შესაძლებელია მოხვდეს, როგორც ჭორი, ასევე სიმართლე, მაგრამ არავითარ შემთხვევაში ჩვენ არ ვამტკიცებთ, რომ ეს არის ფაქტები. ჩვენ გვქონდა დილით შეხვედრა სოფო ნიჟარაძის ადვოკატთან. ჩვენ მას ვუთხარით, რომ თანახმა ვიყავით ეს განმარტება გაგვეკეთებინა ჟურნალში და აგვეხსნა საზოგადოებისთვის, რომ ეს არ არის ფაქტები და ეს შეიძლება იყოს როგორც ჭორი, ისე სიმართლე. მან თქვა, რომ მოიფიქრებდა სოფოსთან ერთად, თუმცა მოფიქრების ნაცვლად პირდაპირ პრესკონფერენცია გამართეს და აღნიშნეს, რომ უჩივიან რეიტინგს, რაც რა თქმა უნდა, მათი უფლებაა", - განაცხადა ღოღობერიძემ.
მისივე თქმით, რაც "რეიტინგში" იწერება საზოგადოებისთვის ძალიან საინტერესოა.
"აუცილებლად მინდა ისიც ვთქვა, რომ ამბები, რაც აქ იწერება, არის საზოგადოებისთვის ძალიან საინტერესო, ფართოდ განხილვადი. ამ ამბებს თქვენ ქალაქში, რეგიონში და ყველგან მოისმენთ. ისეთ მედიაგამოცემას, როგორიც არის "რეიტინგი", რომელიც აბსოლუტურად დამოუკიდებელია, არ აქვს უფლება, გვერდი აუაროს ამ ყველაფერს და არ გააშუქოს", - აღნიშნა ჟურნალის მთავარმა რედაქტორმა.
ნიჟარაძის სარჩელი ჟურნალ "რეიტინგის" წინააღმდეგ თბილისის საქალაქო სასამართლოში უახლოეს დღეებში შევა.
იხილეთ ბმული: "სკანდალური ფაქტები სოფო ნიჟარაძის ცხოვრებიდან"
