ქობულეთში, N2-ე საჯარო სკოლაში 18 მოსწავლე, სავარაუდოდ, ბუნებრივი აირით მოიწამლა

ქობულეთის N2-ე საჯარო სკოლაში 18 მოსწავლე, სავარაუდოდ, ბუნებრივი აირით მოიწამლა.

როგორც "ინტერპრესნიუსს" აჭარის ჯანდაცვის სამინისტროს წარმომადგენელმა მადონა გოგიტიძემ განუცხადა, მოსწავლეები სასწრაფო დახმარების ბრიგადებმა ქობულეთის საავადმყოფოში გადაიყვანეს, თუმცა მათი ჯანმრთელობის მდგომარეობა საგანგაშო არ არის.

მისივე ინფორმაციით, მოსწავლეებს ერთნაირი სიმპტომები აღენიშნებათ - თავბრუსხვევა, გულისრევის შეგრძნება და კიდურების გაციება. მადონა გოგიტიძის თქმით, რამდენიმე ბავშვს საავადმყოფოდან უახლოეს საათებში გაწერენ, მომხდარის მიზეზებს კი გამოძიება დაადგენს.

"სკოლაში ამჟამად პოლიციის, საგანგებო სიტუაციების სამსახურისა და აჭარის ჯანდაცვის სამინისტროს წარმომადგენლები იმყოფებიან. შეწყვეტილია სასწავლო პროცესი. საავადმყოფოში გადაყვანილი ბავშვები არიან ქობულეთის N1 საჯარო სკოლის მოსწავლეები, რომლებიც თავიანთ სკოლაში მიმდინარე სარემონტო სამუშაოების გამო, N2 საჯარო სკოლაში მეორე ცვლაში სწავლობენ", - აღნიშნა მადონა გოგიტიძემ.

მისივე ინფორმაციით, ჰოსპიტალიზებულ ბავშვებს შორის რამდენიმე მე-5 კლასის, ხოლო უმეტესობა მე-7-მე-8 კლასის მოსწავლეა.

"ინტერპრესნიუსი"