ბაჩო ახალაია - "ირაკლი ალასანიამ გიგი კალანდაძეს პირდაპირ უთხრა, რომ თუ ჩემს წინააღმდეგ ჩვენებას მისცემდა, იგი საქმეში მოწმის სტატუსით იქნებოდა"

თავდაცვის მინისტრმა ირაკლი ალასანიამ გიგი კალანდაძეს პირდაპირ უთხრა, რომ თუ ბაჩო ახალაიას წინააღმდეგ ჩვენებას მისცემდა, იგი სისხლის სამართლის საქმეში მოწმის სტატუსით იქნებოდა, - ამის შესახებ თავდაცვის ყოფილმა მინისტრმა ბაჩო ახალაიამ თბილისის საქალაქო სასამართლოში მიმდინარე პროცესზე განაცხადა, რომელზეც სამი მოწმე, შეიარაღებული ძალების ყოფილი წარმომადგენლები დაიკითხნენ.

ახალაია ბოდიშს უხდის მასთან ერთად ყველა ბრალდებულს და მათ ოჯახებს. "ბოდიშს ვუხდი ყველა ბრალდებულს და მათ ოჯახებს იმის გამო, რომ ეს ადამიანები მხოლოდ იმიტომ არიან საბრალდებო სკამზე, რომ ჩემთან არიან რაღაცნაირად დაკავშირებული", - აღნიშნა ბაჩო ახალაიამ.

ამასთან, დღევანდელი მოწმეები მან სუსტ მოწმეებად შეაფასა. "ვიფიქრე, თავიდან მაინც მოიყვანდნენ ძლიერ მოწმეებს. თუ სულ ასეთები ჰყავთ, კარგად ყოფილა ჩვენი საქმე. ეს ყველაფერი მაგონებს ასინეთას", - განაცხადა ბაჩო ახალაიამ. მისივე თქმით, დღევანდელ პროცესზე მოწმეებს პროკურორები დაკითხვაში ხელს უშლიდნენ. "დღეს თუ ვინმე საქართველოში ცოცხალი გმირია, ესენი არიან სწორედ ბრალდებულები და ახლა მათ უწევთ თავის მართლება", - აღნიშნა ახალაიამ. მისივე თქმით, ყველა მოწმეს, ვინც ბრალდების მხარეს ჰყავს, სამსახურში დაბრუნებას ჰპირდებიან.

რაც შეეხება პროცესის მიმდინარეობას, პროცესზე დღეს პირველი სამი მოწმე დაიკითხა, რომლებიც სისხლის სამართლის საქმეში დაზარალებულებად არიან ცნობილი. შეიარაღებული ძალების ყოფილი წარმომადგენლების, ბესიკ გოგლიძის, დავით ხარაიშვილისა და ნიკოლოზ ქათამაძის განცხადებით, მეოთხე ქვეით ბრიგადაში მუშაობის დროს ბაჩო ახალაიას, გიგი კალანდაძეს, ზურაბ შამათავას და მათთან ერთად ბრალდებულების მხრიდან მათზე ღირსების შემლახველი მოპყრობა, მათ შორის ფიზიკური ანგარიშსწორება განხორციელდა. კერძოდ, როგორც ყოფილი სამხედროები აცხადებენ, მათ აგინეს, მიაყენეს ფიზიკური შეურაცხყოფა და ბუნტის მცდელობის ბრალდებიდან გამომდინარე ორი დღის განმავლობაში ჩაკეტეს და მთელი ამ პერიოდის მანძილზე აძახებინეს "გაუმარჯოს მეოთხე ბრიგადას".

დაზარალებულების ინფორმაციით, ამის შემდეგ მათ დააწერინეს ახსნა- განმარტებები, რომ ბუნტს აპირებდნენ. ერთ-ერთი მოწმის, ბესიკ გოგლიძის თქმით, მას ფიზიკური შეურაცხყოფა მიაყენა გიგი კალანდაძემ და წელს ზემოთ შიშველი არბენინა. "ამასთან, დამაწერინეს წერილი, რომ გავთავისუფლებულიყავი შეიარაღებული ძალებიდან. ეს წერილი დამაწერინეს მუქარით, თითქოს ბუნტი უნდა მოგვეწყო და თუ ამას არ დავწერდი, ოჯახის წევრებზე ზეწოლით დაგვემუქრნენ. იძულებული ვიყავი, ეს გამეკეთებინა", - აღნიშნა პროცესზე ბესიკ გოგლიძემ.

კიდევ ერთმა დაზარალებულმა, დავით ხარაიშვილმა, ჩვენების მიცემისას განაცხადა, რომ დღევანდელ დაკითხვამდე ორი დღით ადრე იმყოფებოდა პროკურატურაში საკუთარი ჩვენების გადასახედად. მოწმის აღნიშნული განცხადება ბრალდებულების ადვოკატებმა პროკურატურის მხრიდან მოწმეებზე ზემოქმედებად შეაფასეს.

ახალაიას ადვოკატის, დავით დეკანოიძის თქმით, მოწმეები პროკურორებმა მიიყვანეს პროკურატურაში და გააცნეს თავიანთი ჩვენებები, რისი უფლებაც არ ჰქონდათ. პროცესზე დაზარალებულად ცნობილებს შეკითხვები ბაჩო ახალაიამაც დაუსვა. პროცესზე რამდენჯერმე გამოიწვია ხმაური მხარეებს შორის სიტყვიერმა დაპირისპირებამ.

განსახილველ საქმეში ბაჩო ახალაიას, გიგი კალანდაძეს და მათთან ერთად ბრალდებულ ექვს პირს, მათ შორის სასჯელაღსრულების დეპარტამენტის ყოფილ თანამშრომელ გაგა მკურნალიძეს ბრალი ორ ეპიზოდში, ე.წ. სენაკის ეპიზოდში, ასევე ზვიად აბესაძისთვის თავისუფლების უკანონოდ აღკვეთაში ედებათ.

"ინტერპრესნიუსი"