ნათია დუმბაძე გაბუტულ ქმარს ყოველთვის პირველი ურიგდება

მომღერალმა ნათია დუმბაძემ ბიზნესს მოჰკიდა ხელი, შეიძინა სოლარიუმის აპარატი, მეგობრის სილამაზის სალონში დადგა და გარდა იმისა, რომ თავად სარგებლობს, ეს საქმე შემოსავლის წყაროდაც აქცია. როგორც წესი, ქალები საკუთარ გარეგნობაზე ზრუნვას ზაფხულსთვის იწყებენ, ნათია კი უკვე შეუდგა ამ საქმეს და სპორტკომპლექსში დიდ დროს ატარებს.

სასიკვდილო დიეტა

- 11 საათზე გაღვიძების შემდეგ, მივირთმევ მსუბუქ საუზმეს, ვჭამ მხოლოდ მოხარშულს, მაგალითად მოხარშულ კვერცხს, ან მივირთმევ ჩაის, შემდეგ მივდივარ ერთ-ერთ სპორტულ კომპლექსში და სამი საათი ვვარჯიშობ. ვიწყებ ტრენაჟორებით, შემდეგ შევდივარ საუნაში, იქიდან გადავინაცვლებ აუზზე და ბოლოს ისეთი დაღლილი გამოვდივარ, ფეხზე ძლივს ვდგავარ (იცინის). მთელი ცხოვრება ვვარჯიშობდი, მაგრამ ბოლო პერიოდში წონის მატების გამო გავაქტიურდი. მოგეხსენებათ, ახალი წლის "მსუყე დღეების" შემდეგ ეს პრობლემა ბევრს გვაწუხებს, ამიტომ ყოველი წლის მარტში ფორმაში ჩასადგომად ვიწყებ ზრუნვას, რათა ზაფხულს კარგ ფორმაში შევხვდე. ორსულობის შემდეგ 25 კილო დავიკელი, ახლა 8 კილოს დაკლება მინდა, ამიტომ ვარჯიშთან ერთად დიეტასაც ვიცავ. მზა დიეტაზე არ ვარ, თავად უკეთ ვიცი, რა არის საჭირო, ამიტომ ჩემ მიერ მოგონილ დიეტას ვიცავ, რომელსაც ჩემი მეგობრები "სასიკვდილოს" უწოდებენ (იღიმის). დღეში ორჯერ ძირითადად მოხარშულ საკვებს მივირთმევ. შეიძლება მთელი დღე მხოლოდ ჩაიზე ვიყო და არაფერი ვჭამო, ალბათ ამიტომ დაარქვეს ჩემმა მეგობრებმა ასეთი სახელი. ჩემი სამეგობრო ძირითადად სულ დიეტაზეა, ხშირად მეჩხუბებიან, შენ რად გინდა დიეტა, ტყუილად იტანჯავ თავსო, მაგრამ მომწონს გამხდარი ქალები და თან თავს კარგად ვგრძნობ მაშინ, როცა საცურაო კოსტიუმში კარგად გამოვიყურები. როგორც წესი, გაზაფხულზე იმდენს ვიკლებ, რომ ზაფხულში, რაც უნდა ვჭამო, აღარ ვიმატებ. რაც შეეხება სხვა მხრივ თავის მოვლას, სილამაზის სალონში მანიკიურ-პედიკიურის გასაკეთებლად ორ კვირაში ერთხელ მივდივარ. იქიდან გამომდინარე, რომ ბუნებრივად ხვეული თმა მაქვს, ხშირად არ ვისწორებ და თვითონ ვიკეთებ ვარცხნილობას. რაზეც უარს ვერ ვამბობ, სოლარიუმია, მუდმივად გარუჯული ვარ, მით უმეტეს, რომ ახლა სოლარიუმის აპარატი ვიყიდე, ჩემი მეგობრის სილამაზის სალონში დავდგი და გარდა იმისა, რომ თავად ვსარგებლობ, შემოსავლის წყაროდაც ვაქციე, შეიძლება ითქვას, რომ პატარა ბიზნესი მაქვს, ახლა აქციების დაგეგმვით ვარ დაკავებული.

შოპინგი

...ვგიჟდები, ვგიჟდები შოპინგზე. მაქსიმალურად ვცდილობ, საზღვარგარეთ შევიძინო სამოსი. თუ ევროპაში ვერ ვახერხებ წასვლას, მანქანით გადავდივარ ტრაპზონში, სადაც მაქვს ამოჩემებული და საყვარელი სავაჭრო ცენტრი და იქ ვიძენ საჭირო ნივთებს. ზაფხულში, სალომე ბაკურაძის დაბადების დღისთვის გოგონებს დაგეგმილი გვაქვს თურქეთში საშოპინგოდ გადასვლა, თან დავისვენებთ და თან ვიგიჟებთ, როგორც გვჩვევია. თუ ვიცი, რომ უახლოეს მომავალში უცხოეთში მომიწევს გამგზავრება, აქ აღარაფერს ვყიდულობ, მირჩევნია, ფული დავაგროვო და იქ დავხარჯო, იქ საქართველოსთან შედარებით ფასები დაბალია, ხარისხი კი - მაღალი და ყველა ვარიანტში მოგებული რჩები. გარდა ამისა, გარკვეულწილად დაზღვეული ხარ იმისგან, რომ შენნაირ სამოსს თბილისში ბევრ ადამიანზე ნახავ. ტრაპზონში მაქვს ისეთი "ტოჩკები", სადაც კარგი რაღაცები იყიდება და იქ მივდივარ ხოლმე (იღიმება). საშოპინგოდ ყველაზე კარგი ადგილი მაინც პარიზია, იქაც მაქვს ჩემი წერტილები, უკვე ვიცი, ამა თუ იმ მაღაზიაში რის საყიდლად უნდა წავიდე, რაც უნდა ვთქვათ, პარიზი ამ მხრივ შეუდარებელია. თბილისში ძირითადად ბიჟუტერიას ვიძენ, პეკინზე ძალიან კარგი მაღაზიებია, ბევრი ჭრელი სამკაული იყიდება, რაც ჩემს გემოვნებაში ჯდება. ჩემმა მეუღლემ იცის ჩემი დამოკიდებულება სამოსის მიმართ და როცა საზღვარგარეთ მიდის, ყოველთვის ჩამოაქვს საჩუქრები. ამ მხრივ გამორჩეული იყო მისი ესპანეთში მოგზაურობა, სადაც ერთი ჩემოდნით გავუშვი და უკან ორით დაბრუნდა - მეორე ჩემოდანი სულ ჩემი ტანსაცმლით იყო სავსე. მიყიდა ჯინსები, მაისურები, პიჯაკები, რითაც ძალიან გამახარა.

ცოლ-ქმრის ურთიერთობა

...ურთიერთობაში სიახლეები ყოვ­ელთვის აუცილებელია. იქიდან გამომდინარე, რომ მე სახლში უმოქმედოდ ჯდომა არ შემიძლია, სიახლეების ინიციატორი ყოველთვის მე ვარ, შედეგად კვირაში ერთი დღე მაინც მივდივართ ერთად გასართობად. ბავშვობიდან დედას ძალიან დატვირთული ვყავდი, ყველანაირ წრეზე დავდიოდი და დატვირთულ განრიგს მივეჩვიე, ამიტომაც ერთ ადგილზე გაჩერება მიჭირს. ჩემი მეუღლე შედარებით პასიურია, მაგრამ ჩემთან არ გასდის, უწევს აქტიურად სიარული. შვიდწლიანი თანაცხოვრების პერიოდში ერთმანეთი ძალიან კარგად გავიცანით და ვიცით, რა გვესიამოვნება. თავიდან, როგორც ყველა წყვილის ცხოვრებაში ხდება, ჩვენც ხშირად ვკამათობდით, მაშინ ბაჩოს ისეთი სამსახური ჰქონდა, ძირითადად ვერ ვნახულობდი. მოგეხსენებათ, ახალგათხოვილ გოგოს ყველაზე მეტად ქმრის გვერდით ყოფნა უნდა, ის კი სულ გასული იყო და ეს ხდებოდა კამათის მიზეზი. თუმცა შესარიგებლად პირველ ნაბიჯს ყოველთვის მე ვდგამდი, ძალიან რბილი ხასიათი მაქვს, წყენას მალე ვივიწყებ.ჩხუბის დროს მინდა რაღაცები გავიხსენო და ვუთხრა, შენ რომ ასე გამიკეთე, შენ რომ ასე მითხარი, მაგრამ არაფერი მახსენდება (იღიმება).

შვილი

...წელს დუდუ სკოლაში შედის, პირველი ექსპერიმენტული სკოლის მოსწავლე გახდება და ამ მეტად საპასუხისმგებლო პერიოდისთვის ვემზადებით. ახლა ბაღში დადის, ძალიან პატარა შევიყვანე და კარგად შეეგუა. აქტიურია, დედას ჰგავს და ყველანაირ სიტუაციას ერგება (იღიმის). როდესაც დაკავებული ვარ, ხან დედაჩემი იტოვებს, ხან - ჩემი დედამთილი, ხან კიდევ, თუ არის საშუალება, თან მიმყავს, მით უმეტეს, რომ ჩემთან ერთად კაფეებში სიარული უყვარს. რაც შეეხება მამა-შვილის ურთიერთობას, ხანდახან ჩხუბობენ კიდეც, ბაჩო ორი წლის ბავშვივით ეთამაშება, ეჩხუბება და ებუტება კიდეც, რაზეც ყოველთვის მეცინება.

ფართი ზღვის პროდუქტებით

...დიასახლისობაში ცოტა მოვიკოჭლებ, რადგან ჩემი მეუღლის მშობლებთან ვცხოვრობთ, ამ მხრივ ისინი მანებივრებენ. საჭმელს ჩემი დედამთილი აკეთებს, მაგრამ საჭიროების შემთხვევაში მეც შემიძლია, ყველაფრის კეთება ვიცი. ახლა გაგიმხელთ ჩემი და ჩემი მეგობრების საყვარელი ზღვის პროდუქტების სალათის რეცეპტს. სხვათა შორის, არაერთხელ გაგვიმართავს ზღვის პროდუქტების ფართი ჩვენს სახლში. ვხარშავ მიდიებს, კრივეტებს, მშრალად ვიღებ თეფშზე, ვაყრი შავ წიწაკას, ყვითელ ყვავილს და სვანურ მარილს, შემდეგ ვამატებ სალათის დაჭრილ ფურცლებს, ცალკე ვამზადებ გარნირს მაიონეზით, კეტჩუპითა და ცოტა ჩაჭყლეტილი ნივრით, ამ სოუსს ვასხამ მოხარშულ ზღვის პროდუქტებს და ზემოდან ვაფშვნი "სუხარიკებს", არაჩვეულებრივი გამოდის.

სასიმღერო კარიერა

...მე და თიკა მახალდიანი, როგორც მომღერლები, ანკარაში ერთ-ერთი წამყვანი ტელევიზიის რეიტინგულ გადაცემაში მიგვიწვიეს და საათნახევრიანი გადაცემა დაგვითმეს. სანამ ანკარაში ჩავიდოდით, გავუგზავნეთ ჩვენი სიმღერების ფონოგრამები, ბენდმა შეისწავლა ისინი და იქ ჩასულებმა უკვე ბენდის თანხლებით შევასრულეთ სიმღერები ინგლისურ, ფრანგულ და თურქულ ენებზე. მართალია, გაგვიჭირდა თურქულის სწავლა, მაგრამ ეს დაბრკოლებაც დავძლიეთ. ვმღეროდით როგორც სოლოსიმღერებს, ასევე დუეტსაც, რომელიც მე და თიკამ ჩავწერეთ. გადაცემის წამყვანი ცნობილი მომღერალი იყო, რომელთანაც აკაპელაში "სულიკო" და "თბილისო" შევასრულეთ. ამ გადაცემას ისეთი მაგარი სტუდია ჰქონდა, რომ ვერც ერთი ქართული შოუს სტუდიას ვერ შევადარებ, საქართველოში მსგავსი არ გვაქვს. შესვლისთანავე მე და თიკას მუხლები მოგვეკვეთა, მაგრამ სიმღერის დაწყებისთანავე ყველანაირი ნერვიულობა მოგვეხსნა. ძალიან წარმატებული იყო ჩვენი ვოიაჟი თურქეთში, მაგრამ გული მწყდება, რომ სათანადოდ ვერ გავახმაურეთ თბილისში, ეს ალბათ ჩვენი ბრალიც იყო. გარდა ამისა, კვირაში ერთხელ ვმღერი კლუბში, ასევე ვმონაწილეობ გიორგი ყორღანაშვილის დასახმარებლად გამართულ კონცერტებში, ვცდილობ, ჩემი წვლილი შევიტანო ამ კეთილ საქმეში. ძალიან მინდა კლიპის გადაღება, მაგრამ ეს ფინანსებთანაა დაკავშირებული, ამიტომ უახლოეს მომავალში ამ მხრივ ვერაფერს შეგპირდებით.

გიჟი მძღოლი

...ჩემი აზრით, არაჩვეულებრივი მძღოლი ვარ, მაგრამ გუშინ ირინა ონაშვილი მეუბნებოდა, აღარასდროს ჩაგიჯდები მანქანაში, როგორი გიჟიც ხარ ცხოვრებაში, ასევე მართავ მანქანასო. როცა საჭესთან ვზივარ, სისწრაფეს ვერ ვგრძნობ, თუმცა ყველა აღნიშნავს, რომ ჩქარა დავდივარ. მიუხედავად ამისა, პატრულთან მშვენიერი ურთიერთობა მაქვს, მხოლოდ ერთი ინციდენტი მახსენდება: "ჯეოსტარის" პირველ კონცერტზე, სადაც ჩემი ბედი უნდა გადაწყვეტილიყო, გავხდებოდი თუ არა მონაწილე, მივედი მანქანით, მაგრამ იმ პერიოდში არ მქონდა მართვის მოწმობა. ფილარმონიასთან ვაყენებდი ავტომობილს, ეტყობა, რაღაც დავარღვიე და გამაჩერა პატრულმა. რომ ნახა, "პრავა" არ მქონდა, დამაჯარიმა და უმანქანოდაც დამტოვა. ამის შემდეგ კარგად ვიმეცადინე და ერთ კვირაში მართვის მოწმობა ავიღე. ახლა ახალი მანქანა ვიყიდე, რომელიც ყველას მოსწონს. მანქანაში გარდერობიც მაქვს მოწყობილი, იქ ნახავთ ნაირ-ნაირ ფეხსაცმელს, ტანსაცმელს, პიჯაკს და დუდუს სათამაშოებს. მანქანაშიც კი მიყვარს სარკეში გაპრანჭვა, სხვათა შორის, ჩემმა მეგობარმა მასწავლა მანქანის მართვის დროს მესიჯობა და ტელეფონზე ლაპარაკი და მშვენივრად ავითვისე (იცინის).

ციცი ომანიძე

ჟურნალი "რეიტინგი"

(გამოდის ორშაბათობით)