გურული პოლიციელების ქეიფს მარჩენალი ძროხა შეეწირა?

29 მარტს, გურიის პოლიციის მაღალჩინოსნები ოზურგეთის მუნიციპალიტეტის სოფელ მაკვანეთში, გურიის სამხარეო მთავარი სამმართველოს უფროსის გოჩა ფერსაშვილის დაბადების დღეს აღნიშნავდნენ. "გურია ნიუსის" წყაროს ინფორმაციით, შეზარხოშებული პოლიციელები სამსახურის ავტომანქანით, სოფელ მაკვანეთში ცენტრალურ გზაზე ქათამიძეების ძროხას დაეჯახნენ. ავტოსაგზაო შემთხვევის შემდეგ მოკლული პირუტყვი, პოლიციელებმა სოფელ მაკვანეთის მაჟორიტარი დეპუტატის ზურაბ ჭანუყვაძის სახლის წინ მიიტანეს და დაკლეს.

"გურია ნიუსმა" სწორედ იმ ადგილის ფოტოები გადაიღო, სადაც სისხლის ნაკვალევი ჩანს. "გურია ნიუსის" ინფორმაციით, ავტოსაგზაო შემთხვევა შსს გურიის სამხარეო მთავარი სამმართველოს უფროსის გოჩა ფერსაშვილის მოადგილეს, პაპუნა გობეჯიშვილს მოუვიდა, რომელიც ჩვენი წყაროს ინფორმაციით, საჭეს მთვრალი მართავდა. "იმის მაგივრად, რომ ყაჩაღები იპოვონ, თავგასულად ღრეობენ, მერე მთვრალები დანაშაულს სჩადიან, საწყალი გლეხის ერთადერთ მარჩენალ, მაკე ძროხას კლავენ. კი ბატონო, პატრონს გადაუხდიან თანხას, მაგრამ პასუხს თუ აგებს ამაზე ვინმე? მერე რა ხდება იცით, ამოიყვანეს მძღოლი, ვითომ ავტოავარიის დროს ის იჯდა საჭესთან. რადგან მანქანას მაღალჩინოსანი პოლიციელი მართავდა და მას არ უნდოდა მისი სახელი გაჟღერებულიყო", - აცხადებენ შემთხვევის ადგილას მყოფი მაკვანეთლები.

სრული ვერსია

”გურია ნიუსი”