რა წერილი მისწერა გრიგოლ ვაშაძემ რუსეთის საგარეო საქმეთა მინისტრს აგვისტოს ომიდან 3 თვეში

ექსპერტ გია ხუხაშვილის ინფორმაციით, 2008 წელს, რუსეთ-საქართველოს ომიდან სამი თვის შემდეგ, საქართველოს იმდროინდელი კულტურის მინისტრი, გრიგოლ ვაშაძე რუსეთის კულტურის მინისტრს, ალექსანდრ ავდეევს ქართველი ხელოვანების მონაწილეობით რუსეთში კონცერტების გამართვას სთავაზობდა.

როგორც ხუხაშვილმა დღეს გამართულ პრესკონფერენციაზე განაცხადა, ანსამბლ "ერისიონის" რუსეთში ვიზიტს რამდენიმე კვირის წინ დიდი ხმაური მოჰყვა, რაც "ნაციონალური მოძრაობის" ფარისევლობაზე მიუთითებს. ხუხაშვილის თქმით, 2008 წელს, რუსეთ-საქართველოს ომიდან 3 თვის შემდეგ კულტურის მინისტრმა გრიგოლ ვაშაძემ ყოვლად ამაზრზენი რიტორიკის შემცველი მონური მორჩილებით რუსეთის კულტურის მინისტრს წერილი გაუგზავნა, სადაც აღფრთოვანებასა და მადლობას გამოხატავდა მისი კულტურის მინისტრად დანიშვნის თაობაზე რუსეთის კულტურის სამინისტროს მილოცვით.

"გრიგოლ ვაშაძე ლამის მუხლებს უკოცნის რუსეთის კულტურის მინისტრს და შენი მუხლების ჭირიმეო, ამ ტონით ელაპარაკება. გარდა ამისა, იქვე სთავაზობს და შეიძლება ითქვას, ეხვეწება კონცერტების ჩატარებას რუსეთში, მათ შორის "ერისიონის" მონაწილეობით. ეს ხდება მაშინ, როცა ქართველი მეომრების გვამები ჯერაც გაციებული არ იყო", - აღნიშნა ხუხაშვილმა.

ამასთან, ექსპერტის განცხადებით, აღნიშნული წერილი ოფიციალურია და იგი კულტურის სამინისტროშია რეგისტრირებული. გია ხუხაშვილმა წერილის ასლები ჟურნალისტებს პრესკონფერენციაზე დაურიგა. გრიგოლ ვაშაძის მიერ რუსეთის კულტურის მინისტრისადმი გაგზავნილი წერილი რუსულენოვანია და იგი 2008 წლის 27 ნოემბრით არის დათარიღებული.

ოფიციალურ წერილში საგარეო საქმეთა ყოფილი მინისტრი გრიგოლ ვაშაძე რუსეთის ფედერაციის კულტურის მინისტრს მადლობას უხდის თბილი სიტყვებისთვის და საქართველოსა და რუსეთს შორის "კულტურული ხიდის" აღდგენისკენ კონკრეტული ნაბიჯების გადადგმას მოუწოდებს.

დოკუმენტში ვაშაძე აღნიშნავს, რომ მისი და ადვეევის ერთ-ერთი მთავარი ვალდებულება, ამ ორი ქვეყნის ტრადიციული კულტურული კავშირების გამყარება და განვითარებაა, განსაკუთრებით ასეთ მძიმე დროს.

წერილში ვაშაძე ადვეევს 2009 წელს მოსკოვში ზოგიერთი ქართული კოლექტივების, მათ შორის "ერისიონის" ან "რუსთავის" ანსამბლების გასტროლების ჩატარებას სთავაზობს.

დოკუმენტში ასევე საუბარია კლასიკური და ჯაზის მუსიკის კონცერტების ჩატარებაზე და ქართველი მხატვრების გამოფენების მოწყობაზე.

წერილში ვაშაძე აღნიშნავს, რომ საგასტროლო ხარჯებს მთლიანად ქართული მხარე დაფარავს.