9
ივლისიდღის ზოგადი ასტროლოგიური პროგნოზი
დუეტ "ჯორჯიას" შემდეგ საქართველოს ოფიციალურად იურმალაში, "ახალი ტალღის" კონკურსზე საკუთარი წარგზავნილი არ ჰყოლია. 2009 წელს კონკურსზე ლიკა ხანთაძე გამოვიდა, თუმცა ის რუსეთში ცხოვრობს და არა საქართველოში. თანაც, არც იმ წელს და არც შემდეგ წლებში არც ერთ ტელევიზიას არ შეუძენია კონკურსის ტრანსლირების უფლება, შესაბამისად, მხოლოდ ინტერნეტით თუ შეეძლო დაინტერესებულ მაყურებელს კონკურსის ხილვა. წელს პირველად, ამდენწლიანი პაუზის შემდეგ, იურმალაში კვლავ გაიჟღერებს ქართული ხმა. შესარჩევი ტური 2 აპრილს თბილისში გაიმართება, რომელსაც "ახალი ტალღის" რამდენიმე წარმომადგენელი, მათ შორის იგორ კრუტოი და ძმები მელაძეები დაესწრებიან. კონკურსის ტრანსლირების უფლება ტელეკომპანია "იმედმა" შეიძინა. საორგანიზაციო საკითხების მოგვარებაში დათო ოქიტაშვილია ჩართული, ტელეკომპანიის მუსიკალური პროდიუსერი რუსა მორჩილაძე კი შემოქმედებითი საკითხებით დაკავდება. გასულ კვირას მათ დუეტ "ჯორჯიასთან" ერთად პრესკონფერენცია მოაწყვეს და ჟურნალისტებს სიახლის შესახებ გვესაუბრნენ. როგორც აღმოჩნდა, "ჯორჯია", როგორც "ახალი ტალღის" გამარჯვებული, მოსამზადებელ პერიოდში აქტიურად ჩაერთვება. რატისა და მაკას რჩევები კონკურსანტს ნამდვილად გამოადგება, რადგან ამ დუეტმა "ახალ ტალღაზე" ფურორი მოახდინა.
როგორ შეარჩევენ კონკურსანტებს "ახალი ტალღისთვის"
უკვე ამოქმედდა საიტი newwavestars.com, სადაც მსურველებს დარეგისტრირება შეუძლიათ. როგორც რუსა მორჩილაძე ამბობს, შერჩევის კრიტერიუმები მარტივია - კარგი მუსიკალური გემოვნება და რეპერტუარი. სავალდებულოა ორი კომპოზიციის გაგზავნა, ერთი - ქართული და ერთიც მსოფლიო ჰიტის. მონაწილეების დარეგისტრირების შემდეგ საორგანიზაციო კომიტეტი საუკეთესოებს შეარჩევს, ხოლო აპრილის დასაწყისში გამარჯვებულს, რომელიც იურმალაში საქართველოს სახელით გაემგზავრება, ჟიური და რუსული მხარე შეარჩევენ.
პრესკონფერენციაზე იმითაც დავინტერესდით, ელოდებიან თუ არა საზოგადოების მხრიდან პროტესტს იურმალაში საქართველოს ოფიციალურად დაბრუნებასთან დაკავშირებით. ეს შეკითხვა იმიტომ გაგვიჩნდა, რომ "ახალი ტალღა", რაც უნდა ვთქვათ, მაინც რუსულ კონკურსად მიიჩნევა, რაზეც რუსა მორჩილაძემ გვიპასუხა, რომ ეს შეკითხვა დღეს აქტუალური აღარ არის და "ძველმოდურია". პრესკონფერენციის დასრულების შემდეგ დათო ოქიტაშვილს დავუსვით შეკითხვები. როგორც მან განაცხადა, საქართველოს იურმალაზე დაბრუნებაში უდიდესი წვლილი ძმებმა მელაძეებმა შეიტანეს.
- დათო, ძმები მელაძეები როგორ დაგეხმარნენ?
- რამდენადაც იცით, "ახალი ტალღის" ტრანსლაციის უფლება საკმაოდ ძვირი ღირს. კერძოდ, 400 ათასი დოლარი. მე ვერ გაგიმხელთ, ძმები მელაძეების ჩარევით რამდენი დააკლდა ამ თანხას, რადგან ეს ბიზნესსაიდუმლოებაა, მაგრამ მნიშვნელოვნად რომ დააკლდა, ამის თქმა დანამდვილებით შემიძლია. არ დაგიმალავთ, რომ როცა მოლაპარაკებები მიმდინარეობდა, მელაძეები ჩაერივნენ და სთხოვეს, რომ თანხა დაეკლოთ. ჩვენ, როგორც ჟიურიში მყოფ ორ ქართველს, მოგვეცით ამის უფლებაო. ვალერი მელაძეს მოგვიანებით ვკითხე, იურმალაში საქართველოს დაბრუნების რა ინტერესი გაქვს-მეთქი. თანაც, ჯერ სიტუაცია რუსეთსა და საქართველოს შორის არ არის დალაგებული და შეიძლება, საქართველოში ეს ორაზროვნად გაიგონ-მეთქი. ვალერიმ მიპასუხა, ჩვენ ერთადერთი მიზანი გვაქვს, "ახალ ტალღაზე" საქართველოდან კონკურსანტი ჩამოვიდეს, მე და ჩემმა ძმამ კი ხელი შევუწყოთ, რომ მან თავი ღირსეულად წარმოაჩინოს. ჩვენ გვინდა, მის გვერდით ვიყოთო. "იმედს" მისცეს ტრანსლირების საშუალება. ახლა უკვე ამ ტელეკომპანიაზეა დამოკიდებული, როგორ გააშუქებს კონკურსს.
- როგორ მონაწილეებს ელოდებით?
- მე ორგანიზაციულ საკითხებს ვკურირებ, მაგრამ ვიცი, რომ განაცხადი უკვე შემოიტანეს ნინი ცნობილაძემ, მარინა ბერიძემ გააკეთა ძალიან საინტერესო დუეტი, სალომე ქათამაძემაც შემოიტანა განაცხადი. არავის დავაჩაგვრინებთ ჩვენს წარგზავნილს. თანაც, ჟიურიში ორი "ლობი" გვყავს - ძმები მელაძეები. "ახალი ტალღა" ისეთი კონკურსია, რომელსაც ალა პუგაჩოვას კონკურსმაც ვერ გაუწია კონკურენცია. სხვათა შორის, თავად რუსეთს არ ჰყოლია გამარჯვებული შარშანდლამდე, მაშინ, როდესაც ჩვენგან ორი გამარჯვებული ჰყავს "ახალ ტალღას" - სოსო პავლიაშვილი და დუეტი "ჯორჯია".
- ანუ კონკურსზე პოლიტიკურ გავლენას გამორიცხავთ?
- ძმები მელაძეები ჩამოვლენ საქართველოში და მათ დაუსვით ეს შეკითხვა. მათი მთავარი მიზანი იყო, საქართველო დაებრუნებინათ იურმალაში. ვიცი, რომ როცა ვალერი აქ იყო ჩამოსული, ბევრმა მიაწოდა თავისი შვილის, ახლობლის დისკები მოსასმენად. ვალერი მივიდა დასკვნამდე, რომ "ახალ ტალღაზე" უკეთესი შანსი ქართველ ახალგაზრდა შემსრულებლებს ვერ მიეცემათ. შეიძლება, ვერ გაიმარჯვო, მაგრამ ვიღაცამ შეგამჩნიოს. ვმუშაობთ იმაზეც, რომ ქართული დელეგაციის გამგზავრება ძალიან ძვირი არ დაჯდეს. 200 ბილეთი უკვე დავჯავშნეთ, რომ თუკი სურვილი ექნება ხალხს, წამოვიდნენ და ქართველ კონკურსანტს უგულშემატკივრონ.
- თქვენ რა როლი გაქვთ?
- მე "ახალი ტალღის" წარმომადგენელი ვარ საქართველოში. 2 აპრილს, როდესაც შიდა შესარჩევი ტური გაიმართება, "ახალი ტალღის" რამდენიმე წარმომადგენელი ჩამოვა, მათ შორის იგორ კრუტოი, საშა რევზინი, ძმები მელაძეები, მუსიკალური პროდიუსერი ანასტასია მუხინა. ჩვენ ვთხოვეთ ჩამოსულიყვნენ, ქართველი წარგზავნილის შერჩევას საკუთარ თავზე ვერ ავიღებთ, მაგრამ ერთი, რაც გავაკეთეთ, ის არის, რომ აქ არ იქნება ესემესები. მესიჯებს ბოიკოტი გამოვუცხადეთ. მე ყოველთვის წინააღმდეგი ვიყავი მესიჯებით გამარჯვების. აღარ იქნება მამიკოების და ბიძაშვილების, ძმის წყალობით გამარჯვება. ეს არავის ეწყინოს!.. პრესისთვის შერჩევა აუცილებლად ღია იქნება, რადგან თუკი რაიმე შეცდომას დავუშვებთ, პრესა იმისთვის ხართ, რომ მიგვითითოთ და შემდეგი შეცდომა არ დავუშვათ. ისეთი კონკურსანტი უნდა წავიდეს, რომ სირცხვილი არ ვჭამოთ!..
- "ახალ ტალღაზე" და ზოგადად კონკურსებზე მუდმივად ვნებათაღელვა და გაწევ-გამოწევაა. წელს თუ ელით კრიტიკას?
- კრიტიკის გარეშე არაფერი ხდება, უშეცდომო არავინაა. კრიტიკა შესაძლოა უკავშირდებოდეს იმას, რაში გვჭირდება ისევ რუსული მუსიკალური კონკურსი და იქ მონაწილეობა... რამდენიმე დღის წინ ვნახე გამოკითხვა, რომელიც ერთ-ერთმა ტელევიზიამ ჩაატარა, აღმოჩნდა, რომ 80% ფიქრობს, რუსეთ-საქართველოს შორის ურთიერთობები უნდა დათბეს. ახალგაზრდა მომღერალმა რა დააშავა? პოლიტიკა არ არის ჩვენი საქმე, ეს პოლიტიკოსების საქმეა. ჩვენ კი ვცდილობთ, ურთიერთობების დათბობას ხელი შევუწყოთ. იგორ კრუტოი ამით ძალიან გახარებულია. ის თავად არასდროს ჩადის ასარჩევად, 2 აპრილს კი საქართველოში ჩამოვა. ყველა მათგანს ძალიან უყვარს საქართველო და სურთ, თავად ჩამოვიდნენ, რომ ღირსეული წარმომადგენელი აარჩიონ.
- სად გაიმართება შესარჩევი ტური?
- პავილიონში, ან რომელიმე თეატრის სივრცეში. უფრო მეტად სამუშაო პირობები იქნება, მაგრამ კიდევ ერთხელ ვამბობ, პრესა ამას დაესწრება. დახურული არაფერი ვარგა და ეს ბევრ ცუდ შეკითხვას გააჩენს. ჟიურიში შესაძლოა სიმბოლურად ვიყოთ მე, რუსა მორჩილაძე და კიდევ რამდენიმე ადამიანი, მაგრამ რუსული მხარე ბევრ რამეს გადაწყვეტს.
- უკვე შერჩეული გყავთ დიზაინერი ქართველი კონკურსანტისთვის? პრესკონფერენციას დათუნა სულიკაშვილი ესწრებოდა...
- დათუნა უბრალოდ ესწრებოდა ჩვენს პრესკონფერენციას. შემდეგ გადაწყდება, დიზაინერი დათუნა იქნება თუ ავთანდილი. ქართველი კონკურსანტი ქვეყნის სახე იქნება და გვინდა, მაქსიმალურად კარგად წარდგეს მაყურებლისა და ჟიურის წინაშე.
ნინო მურღულია
(გამოდის ორშაბათობით)
