21
ივნისიდღის ზოგადი ასტროლოგიური პროგნოზი
რეჟისორ გიორგი ოვაშვილის პროექტმა "სიმინდის კუნძული" ევრიმაჟის დაფინანსება მოიპოვა.
როგორც "ამბების.გე"-სთან საუბრისას ეროვნული კინოცენტრის წარმომადგენელმა ნინია ახვლედიანმა აღნიშნა, გერმანიის ქალაქ დრეზდენში ევროპის საბჭოს კინოს განვითარების ფონდის "ევრიმაჟის" მმართველი საბჭოს 129-ე სხდომაზე საბჭოს წევრებმა 25 კინოპროექტი დააფინანსეს, მათ შორის საერთაშორისო კოპროდუქცია (საქართველო/საფრანგეთი/გერმანია/ჩეხეთი) "სიმინდის კუნძულია", რომლის ავტორი, რეჟისორი გიორგი ოვაშვილია. ქართველი რეჟისორის პროექტის მხარდაჭერის გადაწყვეტილება წევრებმა ერთხმად მიიღეს.
ევრიმაჟის მმართველ საბჭოში საქართველოს მხარეს თამარ ტატიშვილი წარმოადგენს, რომელიც თავად წარადგენდა პროექტს.
- როდის დაიწყება გიორგი ოვაშვილის ფილმის გადაღება?
- პროექტმა 200 000 ევროს ოდენობის ფინანსური მხარდაჭერა მიიღო. მისი წარმოება 2013 წლის ბოლოდან იგეგმება. პროექტს მოპოვებული აქვს ეროვნული კინოცენტრის სუბსიდიაც.
- ცოტა რამ "სიმინდის კუნძულის" შესახებ...
- ფილმის ქრონომეტრაჟი 90 წუთი იქნება. ის 33 მილიმეტრიან, ფერად კინოფირზე იქნება გადაღებული. სცენარის ავტორები ნუგზარ შატაიძე, გიორგი ოვაშვილი, რულოფ იან მინებო არიან. რეჟისორი - გიორგი ოვაშვილი; დამდგმელი ოპერატორი ფრედ კელემენი იქნება; დამდგმელი მხატვარი - არიუნსაიხან დავაახუ. კომპოზიტორი - იოსებ ბარდანაშვილი; მთავარი პროდიუსერი ნინო დევდარიანი, პროდიუსერები გიიომ დესეი, აიკე გორეშკა კარლა სტოიაკოვა და კრისტოფ კუკულა იქნებიან. მმართველი დირექტორი სტელიოს ზიანისი იქნება.
- მსახიობები თუ არიან უკვე შერჩეული?
- ამ ეტაპზე მოსამზადებელი სამუშაოები მიმდინარეობს და მსახიობებს ვარჩევთ. ამის შესახებ ინფორმაცია მოგვიანებით იქნება ცნობილი. ფილმის მწარმოებელი კომპანია კი "ალამდარი ფილმია".
- ფილმის შინაარსის შესახებ რას გვეტყვი?
- "სიმინდის კუნძული" ფსიქოლოგიური დრამაა. ფილმში მოქმედება ქართულ-აფხაზური კონფლიქტის ბუნებრივ საზღვარზე - მდინარე ენგურზე ვითარდება. მდინარეში წყალდიდობის დროს წარმოქმნილ კუნძულზე მოხუც გლეხს სიმინდი მოჰყავს. მოგვიანებით კუნძულზე ქართველი მესაზღვრე ჩნდება, რომელიც მოხუცის და მისი 16 წლის შვილიშვილი გოგონას ერთი შეხედვით იდილიურ ცხოვრებას არღვევს.
გიორგი ბერიძე
