"ერისიონის" კონცერტი კრემლში და ერთი აქტივისტის პროტესტი ოკუპაციას

9 მარტს კრემლის სამთავრობო სასახლეში ანსამბლმა "ერისიონმა" კონცერტი გამართა. კონცერტის დაწყებამდე კრემლის მიმდებარე ტერიტორიაზე აფხაზეთში დაბადებული, წარმოშობით ქართველი აქტივისტი ლოლიტა ცარია მივიდა, რომელმაც ლოზუნგით: "ჯერ დეოკუპაცია, შემდეგ ნორმალიზაცია", საპროტესტო აქცია გამართა.

ერთი ადამიანის პროტესტი დიდხანს არ გაგრძელებულა. ლოლიტა ცარიას კრემლის სასახლის მიმდებარედ განლაგებულმა დაცვამ ტერიტორიის დატოვება მოსთხოვა. როგორც რუსული ბლოგები და საინფორმაციო სააგენტოები იუწყებიან, ცარია დააკავეს და რამდენიმე საათით პოლიციის განყოფილებაში გადაიყვანეს.

მოგვიანებით აქტივისტმა "ფეისბუქში" საკუთარ გვერდზე მადლობა გადაუხადა მხარდამჭერებს და მათ შთაბეჭდილებები გაუზიარა: "პიკეტის დროს, გავიგონე რამდენიმე ქართველის რეპლიკა, რომლებიც კონცერტზე მიემართებოდნენ. "მეტი საქმე არ აქვს", - ეს და მსგავსი უკმაყოფილო რეაქცია წამოვიდა ჩემს მიმართ. ისეთებიც იყვნენ, რომლებიც იზიარებდნენ ჩემს პოზიციას, თუმცა ეს ხმამაღლა არ გამოუთქვამთ", - დაწერა ლოლიტა ცარიამ.

იხილეთ ვიდეო