მნიშვნელოვანი ინფორმაცია
6
ივნისიდღის ზოგადი ასტროლოგიური პროგნოზი
პარასკევი, მთვარის მეთერთმეტე დღე დაიწყება 17:02-ზე, მთვარე სასწორშია – ერთ-ერთი ყველაზე ენერგიული, წარმატებული და ძლიერი დღეა. ნებისმიერი დავალების შესრულებისას საჭიროა სიფრთხილე და ყურადღება. იმოქმედეთ გადამწყვეტად, ბიზნესში თუ სამსახურში. განხორციელდეთ ის, რაც ჩაფიქრებული გქონდათ. გააფორმეთ კონტრაქტები, დაიკავეთ ახალი პოზიცია. დაასრულეთ რაც დაიწყეთ. დღის საუკეთესო საკვებად ითვლება წვენები და ხილი. გამოიჩინეთ მზრუნველობა და სიყვარული საყვარელი ადამიანის მიმართ, მიართვათ საჩუქარი.
მნიშვნელოვანი ინფორმაცია
მკითხველის რჩევით
კვირის კითხვადი სტატიები
თვის კითხვადი სტატიები
ასევე დაგაინტერესებთ
კოტე თოლორდავა - "ლელა კატოს გმირს თავისებურ ხასიათს შესძენს და ვფიქრობ, მაყურებელიც მალე შეიყვარებს"
23:15 / 09-03-2013
წლებია, მოზარდ მაყურებელთა თეატრის სცენაზე თამაშობს, საზოგადოების დიდმა ნაწილმა კი სერიალიდან - "ჩემი ცოლის დაქალები" გაიცნო. სახასიათო ხმის ტემბრით, მანერით, ყოვლისშემძლეობით, მსახიობმა კოტე თოლორდავამ ბევრი გოგოსთვის სასურველი მამაკაცის ტიპაჟი შექმნა. სერიალის ახალი სეზონის გადაღებები უკვე დაიწყო.
პრეამბულის მაგიერ
- კოტე, სერიალში ახალი ცოლი გყავს. ამ ამბავს როგორ ეგუები?
- ჰო, ახალი კატო მყავს. გადაღებები უკვე დავიწყეთ, მაგრამ მე და ლელა მებურიშვილს საერთო სცენა ჯერ არ გვქონია. ჩვენთვის ეს პირველი შეხვედრა არ არის. ერთად სპექტაკლში - "გიულიჰ" გვაქვს ნათამაშები. ლელა კარგი პარტნიორია, ნიჭიერი გოგოა. როგორც ვიცი, "ჩემი ცოლის დაქალების" ახალი სეზონის სერიები ეთერში 9 მარტიდან უნდა გავიდეს.
- ნინო გაჩეჩილაძის წასვლამ გული არ დაგწყვიტა?
- რა თქმა უნდა, ჩვენ უკვე შეთამაშებულები ვიყავით.
- შენი აზრით, მთავარი გმირის წასვლას მაყურებელი როგორ მიიღებს? ასეთი ცვლილება ხშირად არ მოსწონთ, არ მეთანხმები?
- არ ვიცი. ლელას თავისი ხიბლი აქვს. ის ისეთივე კატო არ იქნება, როგორიც ნინომ შექმნა. ლელა გმირს თავისებურ ხასიათს შესძენს და ვფიქრობ, მაყურებელიც მალე შეიყვარებს.
- წლებია, თეატრში თამაშობ, საზოგადოების დიდმა ნაწილმა სერიალიდან გაგიცნო. ამის გამო გული არ გწყდება?
- თეატრი ძალიან მიყვარს, სცენაზე მუშაობას, მაყურებელთან ცოცხალ ურთიერთობას სხვა განცდები მოაქვს, მაგრამ გადასაღებ მოედანზე ყოფნასაც თავისებური ხიბლი აქვს, კამერის წინ მუშაობაც შემიყვარდა.
- ვიცი, ძალიან დაკავებული ხარ, ყოველდღე რეპეტიცია გაქვს, ხან - გადაღებები, ფილმების გახმოვანება... წიგნების წასაკითხად დროის გამონახვას ახერხებ?
- რას ჰქვია, ვახერხებ? ეს აუცილებელია. საბედნიეროდ, ჩემი პროფესიიდან გამომდინარე, კითხვა ისედაც მიწევს. როცა პიესას ვეცნობი, ვინტერესდები დრამატურგის ცხოვრებით, შემოქმედებით... არ დავმალავ, ბოლო რამდენიმე თვეა, სქელტანიანი მხატვრული ლიტერატურა არ წამიკითხავს. ამაში საკუთარ თავს ვადანაშაულებ.
- რომელი ჟანრის ლიტერატურა გიზიდავს?
- ბავშვობიდან დღემდე, დეტექტივებზე ვგიჟდები. ამ ჟანრის ძალიან ბევრი ლიტერატურა მაქვს წაკითხული.
- წიგნის კითხვისას დროის შეგრძნება დაგიკარგავს?
- როგორ არ დამიკარგავს. ზოგადად, ემოციური ადამიანი ვარ. როცა წაკითხული ძლიერ ემოციას იწვევს, ტანზე ჭიანჭველები იწყებენ "სიარულს", მოცოცავენ, მოცოცავენ და დიდი ჟრიამული აქვთ. უჰ! ეს კარგი განცდაა. წიგნის მუღამიც ამაშია.
- მეგობრად რომელ ლიტერატურულ პერსონაჟს აირჩევ?
- ერთს ვერ დავასახელებ. ჩემზე რომ იყოს დამოკიდებული, ბევრ პერსონაჟს გავიცნობდი. დავმეგობრდებოდით თუ არა, ეს სხვა საქმეა. ვერ ვიტყვი, რომ ცხოვრებაში ძალიან ბევრი მეგობარი მყავს (ბევრი ნაცნობი მყავს). მაგრამ იმ ადამიანებმა, რომლებსაც მეგობრებად ვთვლი, იციან და მათთან ერთად მეც ვიცი, რომ ერთმანეთის იმედი ყოველთვის უნდა გვქონდეს.
- მარკ ტვენი ამ პროფესიის წარმომადგენლებს ასე ახასიათებდა: "ეს არის ადამიანი, რომელიც გათხოვებს ქოლგას კარგ ამინდში და წაგართმევს მაშინ, როცა წვიმს". რომელი პროფესიის ადამიანები ჰყავდა მას მხედველობაში?
- ასეთი კატეგორიის ადამიანებს ვიცნობ, მათ პროფესიის მიხედვით არ დავყოფდი.
- მარკ ტვენი ბანკირებს გულისხმობდა.
- ასეთი ადამიანები არა მხოლოდ ბანკში, ცხოვრებაშიც ხშირად გვხვდებიან.
- სირბილში გაუსწარი მორბენალს, რომელიც მეორე პოზიციაზე იმყოფებოდა. რომელ პოზიციას დაიკავებ?
- პირველს.
- დარწმუნებული ხარ?
- ასე არ იქნება? მეორე პოზიციაზე მყოფს თუ გავუსწარი, პირველი არ ვიქნები?
- კოტე, მგონი, დაიბენი, დაფიქრდი.
- არ დავბნეულვარ, რაზე უნდა დავფიქრდე?
- მეორე პოზიციაზე მყოფს რომ გაუსწარი, მის წინ...
- (მაწყვეტინებს) მართალი ხარ, ეს რა უკუღმართი კითხვა იყო. მეორე პოზიციას დავიკავებ.
- ამ ცნობილ მოდელიერთან ერთ-ერთ მოდელად გალაკტიონის მუზას - მერი...
- (მაწყვეტინებს) მერი შერვაშიძე კოკო შანელთან მუშაობდა.
- ვინ იყო დიდი ბრიტანეთისა და ჩრდილოეთ ირლანდიის გაერთიანებული სამეფოს ისტორიაში პირველი ქალი პრემიერ-მინისტრი?
- მარგარეტ ტეტჩერი.
- დაასრულე ბენიტო მუსოლინის ცნობილი ფრაზა: "ნამდვილი მამაკაცი უნდა იყოს ქმარი, მამა და..."
- "...ჯარისკაცი". ეს ჩემი აზრია. არ ვიცი, მუსოლინი როგორ ფიქრობდა.
- ამ შემთხვევაში, შენი აზრი მისას დაემთხვა. პოეზია გიყვარს?
- მიყვარს, მაგრამ ვერ ვიტყვი, რომ ზეპირად ბევრი ლექსი ვიცი.
- საყვარელი ქალისთვის ლექსი არასდროს წაგიკითხავს?
- ლექსი არასდროს წამიკითხავს, ზღაპრები და მოთხრობები კი ხშირად მიამბია. მაგალითად, გორკის ერთ მოთხრობას გავიხსენებ. ეს არის ადამიანზე, რომელიც წყვდიადში მოყოლილ ხალხს ეხმარება, გულს იღებს და სინათლისკენ მიმავალ გზას საკუთარი გულით უნათებს.
- "მე დაბრუნებით ტკივილებს წავშლი,/ ოღონდ მოსვლამდის, ოღონდ ბოლომდის,/ როგორც გაზაფხულს ელიან მთაში, -/ შენი ლამაზი გული მელოდეს./ შევყრი მეგობრებს მაღალ მაყრიონს,/ ორღობეებში გასროლას დოღის,/ ზეცის ჩამოხსნას, მთების შერყევას ჯილდოდ მოვუტან ბრწყინვალე ლოდინს".... ვინ არის ამ სტროფის ავტორი?
- მირზა გელოვანი.
- ამ სასმელს ბერძენი ჰიპოკრატე მედიკამენტის სახით, არაერთი დაავადების სამკურნალოდ იყენებდა. რომელ სასმელზეა ლაპარაკი?
- ბორჯომი არ იქნებოდა.
- ჰიპოკრატეს ბორჯომის შესახებ რამე ეცოდინებოდა?
- უი! ჰიპოკრატე თქვი? აზრი გამეფანტა, კარგად ვერ მოგისმინე. არ არის გამორიცხული, ღვინო გამოეყენებინა.
- გამოიცანი. ალკოჰოლთან როგორი დამოკიდებულება გაქვს?
- ერთმანეთთან "შენობით" ვართ, მაგრამ ზომიერების ფარგლებში. უპირატესობას მაგარ სასმელებს ვანიჭებ. ალბათ, ეს გენეტიკურიც არის. მამაჩემი მეზღვაურია, გემის კაპიტანი. წლების მანძილზე ვისკის კოლექციას აგროვებდა. მსოფლიოს სხვადასხვა ქვეყნიდან უამრავი ბოთლი ჰქონდა ჩამოტანილი. მის კოლექციას შევუჩნდი, ვისკი სხვა ბოთლში გადმომქონდა და მის ნაცვლად ჩაის ფოთლებით შეფერილ წყალს ვასხამდი.
- მამამ ეს ამავი რომ გაიგო, არ ეწყინა?
- ძალიან ეწყინა.
- რას უწოდებენ დაუძველებლად გამოშვებულ ღვინოს?
- ვერ გეტყვი.
- ორდინარულს. "მომეცით ცარიელი გალერეა და მე გავავსებ მას". რომელი ცნობილი მხატვარია ამ სიტყვების ავტორი?
- მოდილიანი ხომ არა? საფრანგეთში, მის საფლავზე ნამყოფი ვარ.
- ეს მხატვარი მოდილიანის თანამედროვე იყო, წარმოშობით ესპანეთიდან.
- პაბლო პიკასო.
- რისი შიშია პელადოფობია?
- არ ვიცი.
- მელოტი ხალხის.
- რაღაც შიშები მეც მაქვს, მაგრამ არ ვუღრმავდები.
- რას უწოდებენ იმ გამოჩენილ ადამიანებს, რომლებიც გაეროს, მსოფლიოში მშვიდობის დამყარებაში ეხმარებიან?
- კეთილი ნების ელჩებს. სწორად ვამბობ?
- დიახ. ვინ იყო საქართველოს კათოლიკოს-პატრიარქი ილია II-მდე?
- დავით V დევდარიანი.
- თურქეთში მდებარე რომელი ქართული ტაძარი მდებარეობს მდინარე თორთუმისწყლის ნაპირზე?
- ოშკი.
- ამ ქალაქის ერთ-ერთი მთავარი მოედანი თბილისის მოედანია. თბილისშიც არსებობს იმ ქალაქის სახელობის მოედანი. დაასახელე, რომელ მოედანზეა ლაპარაკი?
- ზაარბრიუკენის მოედანი იქნება.
- ერთხელ, ჩერჩილს ჰკითხეს: "რით განსხვავდება სტალინი ჰიტლერისგან?" მისი პასუხი ერთსიტყვიანი იყო.
- ერთსიტყვიანი?
- ეს სიტყვა 9 ასოსგან შედგება და მათ ვიზუალურ მხარეს უკავშირდება.
- (ფიქრობს) ულვაშებით.
- რომელმა სახელმწიფომ აღიარა სამხრეთი ოსეთი და აფხაზეთი დამოუკიდებელ სახელმწიფოებად, რუსეთის შემდეგ?
- ნიკარაგუამ და ნაურუმ.
- ქამელეონს ენა უფრო გრძელი აქვს თუ სხეული?
- ალბათ ენა, ისე არ მკითხავდი.
- რა მეტალისგან არის დამზადებული "თავისუფლების ქანდაკება"?
- ბრინჯაოსგან, არა?
- ცდები.
- სპილენძისგან იქნება.
- რომელი ქვეყნის ტერიტორიაზე გადის მდინარე მტკვრის ყველაზე დიდი მონაკვეთი?
- აზერბაიჯანის.
- დაბოლოს, დაასრულე სპინოზას ცნობილი გამონათქვამი: "თუ გინდათ, ცხოვრებამ გაგიღიმოთ, აჩუქეთ მანამდე მას თქვენი კარგი..."
- "...თქვენი კარგი განწყობა".
თამუნა კვინიკაძე
(გამოდის ხუთშაბათობით)
გააკეთეთ კომენტარი
sponsored by
ContentRoom
რუბრიკის სხვა სიახლეები
დღის ვიდეო
00:00 / 00:00
კადრები კიევიდან - რუსებმა ქალაქს დრონებით და რაკეტებით დაარტყეს
კვირის კითხვადი სტატიები
მნიშვნელოვანი ინფორმაცია
მკითხველის რჩევით
