6
ივნისიდღის ზოგადი ასტროლოგიური პროგნოზი
კეთილი ნების შემთხვევაში, თანხმობის მიღწევის ყველა წინაპირობა არსებობს, - ამის შესახებ ჟურნალსიტებს საპარლამენტო უმცირესობის წევრმა ლევან ბეჟაშვილმა განუცხადა, რომელიც ეროვნულ ბიბლიოთეკაში დემოგრაფიული აღორძინების ფონდის პრეზენტაციას ესწრება.
ბეჟაშვილი ამ კომენტარით ხვალ, ბიძინა ივანიშვილისა და მიხეილ სააკაშვილს შორის დაგეგმილ შეხვედრას გამოეხმაურა.
როგორც უმცირესობის წევრი დეპუტატი აცხადებს, შეხვედრაზე განხილვის თემა იქნება საკონსტიტუციო ცვლილებების განხორციელება და ის მნიშვნელოვანი საკითხები, რომელიც დღეს პოლიტიკურ ჭრილში აქტუალურია. "ეს ეხება საკონსტიტუციო რეფორმების განხორციელებას, პოლიტიკური ზეწოლების შეწყვეტას და ა.შ. ვფიქრობ, ხვალინდელი შეხვედრა უნდა შედგეს. განწყობა პოზიტიურია და ყველა წინაპირობა არსებობს, კეთილი ნების შემთხვევაში თანხმობის მიღწევის", - განაცხადა ლევან ბეჟაშვილმა.
ბეჟაშვილი მიხეილ სააკაშვილის განცხადებებთან დაკავშირებით აზერბაიჯანული მხარის განცხადებასაც გამოეხმაურა და აღნიშნა, რომ აზერბაიჯანში მოსალოდნელი საფრთხეების შესახებ მიხეილ სააკაშვილის განცხადება ერთ-ერთი აზერბაიჯანელი ოპოზიციონერი ლიდერის შეხედულებებს ეხებოდა.
ბეჟაშვილის თქმით, ეს ოპოზიციონერი ლიდერი ცნობილია, როგორც ФСБ-სთან მჭიდრო ურთიერთობაში მყოფი და მას თავისი პოლიტიკური გეგმები აქვს აზერბაიჯანში განსახორციელებელი, აქედან გამომდინარე, ბეჟაშვილის აზრით, მიხეილ სააკაშვილის განცხადება სწორედ ამ ადამიანის შეხედულებებს წარმოადგენდა.
"არავინ ეჭვქვეშ არ აყენებს საქართველოსა და აზერბაიჯანს შორის კეთილმეზობლურ ურთიერთობებს, რომელმაც ბოლო წლებში არნახულ მასშტაბებს მიაღწია. საფრთხეები, ბუნებრივია, არ არის რეალური, ჩემი აზრით, თუმცა, ვიღაცის თავებში ესეთი შეხედულებები რომ იხარშება, ჩვენგან განსაკუთრებით პრევენციული ღონისძიებების გატარებას ითხოვს", - განმარტა ლევან ბეჟაშვილმა.
