დემოგრაფიული აღორძინების ფონდის დაფუძნების მიზანი არის ყველა გაერთიანდეს და თავისი წვლილი შეიტანოს დემოგრაფიული პრობლემების მოგვარებაში, - ამის შესახებ ჟურნალისტებს პარლამენტის ჯანდაცვის კომიტეტის თავმჯდომარე დიმიტრი ხუნდაძემ ეროვნულ ბიბლიოთეკაში, დემოგრაფიული აღორძინების ფონდის პრეზენტაციის დაწყებამდე განუცხადა.
მისი ინფორმაციით, გაერო-ს მონაცემებით, 2050 წლისთვის საქართველოს მოსახლეობა 28%-ით შემცირდება. ხუნდაძის თქმით, სამწუხაროა, რომ ეს 28% მოდის ქართველებზე და ქართულ გენოფონდს საშიშროება ექმნება.
"ქართულ გენოფონდს ამით ექმნება საშიშროება და ამიერკავკასიაში, წინასწარი მონაცემებით, მოსალოდნელია დაირღვეს ეს ბალანსი, იმიტომ, რომ სომხური მოსახლეობის რიცხოვნობა ამ წელს, გაეროს მონაცემებით, 6%-ით მოიმატებს, ხოლო აზერბაიჯანელების 31%-ით. ჩვენ მოხარული ვართ ნებისმიერი ერის სიმრავლით, მაგრამ ჩვენ უნდა გავითვალისწინოთ ეს წინასწარი არასასიამოვნო მონაცემები", - განაცხადა დიმიტრი ხუნდაძემ.
მისივე თქმით, ფონდის პოლიტიკა იქნება რეგიონული და მრავალმხრივი. ხუნდაძის განცხადებით, ფონდის ერთ-ერთი ინიციატივა არის ის, რომ წინასწარი გათვლებით მოხდეს ყოველი მესამე ბავშვის დაფინანსება. "ყოველი მესამე ბავშვი იმიტომ, რომ საერთოდ მოსახლეობის რიცხოვნობას მესამე და შემდეგი შვილი განსაზღვრავს", - განაცხადა დიმიტრი ხუნდაძემ.
მისივე თქმით, ფონდის დაფინანსების წყარო იქნება შემოწირულობებში. რაც შეეხება ბავშვების დაფინანსებას, როგორც ხუნდაძემ აღნიშნა, ეს, წინასწარი ინფორმაციით, იქნება ყოველთვიური დახმარება, თუმცა თანხის რაოდენობა დაზუსტდება.
