5
ივნისიდღის ზოგადი ასტროლოგიური პროგნოზი
რამდენიმე დღის წინ კონტროლის პალატის ადგილობრივი ბიუჯეტის დეპარტამენტის უფროსის ყოფილი მოადგილე ნოდარ ლიპარტელიანი დაგვიკავშირდა და კონტროლის პალატის ყოფილ ხელმძღვანელ პირთა შესახებ დღემდე გაუხმაურებელ ფაქტებზე გვესაუბრა.
- ჩემი პოლიტიკური დევნა სააკაშვილის ხელისუფლებამ 2005 წელს დაიწყო. როდესაც განათლების სამინისტრომ აბიტურიენტებისთვის ეროვნული გამოცდები დააწესა და სამედიცინო კოლეჯის გამოცდაჩაბარებული სტუდენტები, სასწავლებლებიდან გამოყარეს, მათ შორის იყო ჩემი ერთადერთი შვილიც. მშობლებმა საპროტესტო აქცია გავმართეთ პარლამენტის წინ. სწორედ ამ საპროტესტო აქციაში მონაწილეობის გამო გამათავისუფლეს სამსახურიდან. გავასაჩივრე და სასამართლოს გადაწყვეტილების თანახმად, თანამდებობაზე აღმადგინა კონტროლის პალატის იმჟამინდელმა თავმჯდომარემ, აწ გარდაცვლილმა ზურაბ სოსელიამ. 2007 წელს კი ისევ პოლიტიკური ნიშნით გამათავისუფლა კონტროლის პალატის თავმჯდომარედ ძმები ბეჟუაშვილების პროტექციით დანიშნულმა არაკომპეტენტურმა ლევან ჭოლაძემ. თანამშრომლებისთვის უთქვამს, ლიპარტელიანი უნდა წავიდეს კონტროლის პალატიდან, ის ჩვენიანი არ არისო. მან სამსახურიდან წასვლაზე 600 კაცს დააწერინა განცხადება. თუმცა მე არ დავწერე და ამიტომაც გამათავისუფლეს. როცა ესეც გავასაჩივრე სასამართლოში, ლევან ჭოლაძემ მოსამართლეს დაურეკა, ნოდარ ლიპარტელიანი არ აღადგინოო. მოსამართლემ კი განუცხადა, კანონის ფარგლებში მივიღებ გადაწყვეტილებასო.
- შეგიძლიათ დაასახელოთ იმ მოსამართლის გვარი?
- ქალბატონი ლელა ცანავა. მან თვითონ მითხრა, ლევან ჭოლაძემ დამირეკა, მაგრამ კანონიერ გადაწყვეტილებას მივიღებო. ჭოლაძე ბეჟუაშვილების ზურგით იყო გათამამებული და ათას სისაძაგლეს სჩადიოდა უწყებაში. როცა კონტროლის პალატის ხელმძღვანელად დაინიშნა, კონტროლის პალატის მრავალსართულიან შენობას ფანჯრების ალუმინის ჩარჩოები ჩამოხსნა და ჯართში ჩააბარა, აღებული თანხა - 500 ათასი დოლარი - ჯიბეში ჩაიდო, თუმცა კონტროლის პალატის თავმჯდომარის მოადგილე გიორგი ლაცაბიძემ თანხა დააბრუნებინა და ლევან ჭოლაძემ მითვისებული თანხა პრეზიდენტის "ხაზინაში" ჩარიცხა. ხოლო როცა ჭოლაძემ შეამოწმა გურიის მხარეში გზების დეპარტამენტის მუშაობა და დარღვევები გამოავლინა, როგორც ამბობენ, მას ამ დეპარტამენტის ხელმძღვანელმა დალაქიშვილმა ქრთამად ერთი მილიონი დოლარი გადასცა. ამის შესახებ ინფორმაციამ გაჟონა და ქრთამის აღების ფაქტზე ვანო მერაბიშვილმა მას პატრული დააყენა თავზე, საბოლოოდ კი მილიონი დოლარი წაართვა. დაჭერას ბეჟუაშვილებმა გადაარჩინეს. ამის შემდეგ ჭოლაძემ შეამოწმა სასჯელაღსრულების დეპარტამენტი, სადაც ასევე დარღვევები აღმოჩნდა. კონკრეტულად კი, წყლის ტარიფი 10-ჯერ იყო გაზრდილი, კუბ.მ-ზე - 36 თეთრი იყო, ბაჩო ახალაიას კი 4 ლარად ჰქონდა გაფორმებული. დარღვევა ყოველწლიურად 8 მილიონ ლარს აღწევდა. ჭოლაძემ ახალაიას ამ ფაქტის დამალვის სანაცვლოდ დიდძალი თანხა მოსთხოვა. ახალაიები მიუვარდნენ ჭოლაძეს და აგინეს. თუმცა ჭოლაძე დაჟინებით ითხოვდა "კუთვნილ" ფულს. ამასობაში ახალაიებმა ნაცად მეთოდს მიმართეს ჭოლაძის ჩამოსაცილებლად. მიუგზავნეს მას ფარული კამერით აღჭურვილი საზოგადოებისთვის ცნობილი ქალბატონი, რომელსაც ჭოლაძე დაჰპირდა, დეპარტამენტის ხელმძღვანელად დაგნიშნავო. შემდეგ დაუწყო არშიყი და კაბინეტშივე მოუნდომა სექსი. ესეც, რასაკვირველია, ახალაიების გეგმის ნაწილი იყო. ახალაიების მიგზავნილმა ქალბატონმა ყველაფერი ისე წარმართა, თითქოს ჭოლაძე მას ძალას ატანდა, ჩაიწერა ეს ყველაფერი და ახალაიებს გადასცა. ახალაიებმა ჭოლაძე დააშანტაჟეს - ან სასწრაფოდ გადადგები, ანდა ამ ჩანაწერს პრეზიდენტთან მივიტანთო. ბეჟუაშვილებმა ჭოლაძეს ვეღარ უშველეს და ამ ამბიდან ორ კვირაში თანამდებობიდან გადადგა.
- რასაც ახლა ჰყვებით, რით შეგიძლიათ დაამტკიცოთ?
- მართალია, აღარ ვმუშაობ კონტროლის პალატაში, მაგრამ იქ ჩემი ბევრი მეგობარია და ყველაფერზე მაქვს დოკუმენტური მტკიცებულებები. თუ სამართალდამცავები დაინტერესდებიან ლევან ჭოლაძის დანაშაულებრივი საქმიანობით, მზად ვარ, მათთან ვითანამშრომლო... ჭოლაძის "ტრადიცია" კი ლევან ბეჟაშვილმა განაგრძო: შემოწმების აქტებს, სადაც საბიუჯეტო სახსრების გაფლანგვაა ასახული, გრიფი "საიდუმლო" დაადო. ბეჟაშვილმა ვითომ განიხილა სამსახურში ჩემი აღდგენის საკითხი და მხოლოდ ერთი თვის ხელფასის ანაზღაურებით შემოიფარგლა. მან არ შეასრულა სასამართლოს გადაწყვეტილება, რადგან მე სააკაშვილის ხელისუფლებისთვის მიუღებელი ვიყავი განსხვავებული პოლიტიკური თვალსაზრისის გამო. ბეჟაშვილმა დაწერა, რომ თითქოს ის დეპარტამენტი გააუქმა, სადაც მე ვმუშაობდი. ლევან ბეჟაშვილი ჭოლაძისგან არაფრით განსხვავდება. ის კონტროლის პალატის ამჟამინდელ ხელმძღვანელ ლაშა თორდიაზეც ახდენს გავლენას, სამსახურში რომ არ აღმადგინონ.
- მაინც რატომ გებრძვით ასე ლევან ბეჟაშვილი?
- იმიტომ, რომ მე მიმიწვდება ხელი ყველა იმ დოკუმენტზე, რომლებითაც მისი კრიმინალური საქმიანობა დასტურდება. გადავწყვიტე, სამართალდამცავებს წარვუდგინო ყველა ის მტკიცებულება, რომელიც ბეჟაშვილის კრიმინალურ საქმიანობაზე მაქვს. დავასახელებ მხოლოდ ერთ ფაქტს: არსებობს შპს "ნოვა", რომელიც სამშენებლო სამუშაოებს აწარმოებს და სასამართლოს ყველა შენობა "ნოვამ" გაარემონტა. ეს შპს დააფუძნეს ლევან ბეჟაშვილმა და კონსტანტინე კუბლაშვილმა, "ნოვას" მოწილე იყო ბეჟაშვილის მოადგილე თარხნიშვილი და დავით ბაქრაძის ნათესავი, ვინმე დევი ვეფხვაძე. როგორც ვიცი, ამ კონკრეტულ ფაქტს ფინანსური პოლიცია იძიებს. გარდა ამისა, ბეჟაშვილმა კონტროლის პალატის სარეზერვო ფონდიდან 500 ათასი ლარი ნაცმოძრაობის ანგარიშზე გადარიცხა.
სასჯელაღსრულების დეპარტამენტთან შეიქმნა "ინსტიტუციონალური განვითარების ფონდი" რომელიც 2010 წელს დააფუძნეს ნაციონალების წარმომადგენელმა ჩიორა თაქთაქიშვილმა, ქრისტიან-დემოკრატმა მაგდა ანიკაშვილმა და ვინმე ჭელიძემ. ლევან ჭოლაძემ ამ ფონდს გადაურიცხა მილიონი ლარი და ეს გრძელდებოდა ლევან ბეჟაშვილის მმართველობის პერიოდშიც. მთელი პასუხისმგებლობით ვაცხადებ, რომ ლევან ბეჟაშვილი დამნაშავეა და ამას დოკუმენტებით დავამტკიცებ.
- ლაშა თორდიას თუ შეხვდით?
- ლაშა თორდიას შევხვდი, მაგრამ არაპროფესიონალია და პასუხიც შესაბამისი გამცა. მას სამართალდამცველებისთვის გადასაცემი აქტები დღესაც უჯრაში უდევს, პარლამენტარმა თინა ხიდაშელმა კონტროლის პალატას ოფიციალურად მიმართა, განეხილათ ჩემი საკითხი, მაგრამ თორდიამ აბდაუბდა პასუხი გასცა. ვაპირებ ბრძოლას და ლევან ბეჟაშვილის გამოაშკარავებას. ყველა ინსტანციაში მაქვს შეტანილი საჩივარი და ველოდები სამართლიანობის აღდგენას.
კომენტარისთვის კონტროლის პალატის ყოფილ თავმჯდომარეს ლევან ბეჟაშვილს დავუკავშირდით, მაგრამ მან ჩვენს სატელეფონო ზარს არ უპასუხა, მოგვიანებით კი საერთოდ გამორთო ტელეფონი.
საპარლამენტო უმცირესობის წევრ ჩიორა თაქთაქიშვილთან კი ჩვენი საუბარი ასე წარიმართა:
- ქალბატონო ჩიორა, კონტროლის პალატის ერთ-ერთი დეპარტამენტის უფროსის ყოფილმა მოადგილე ნოდარ ლიპარტელიანმა მოგვაწოდა კონტროლის პალატის მასალები, სადაც ჩანს, რომ თქვენ 2010 წელს დააფუძნეთ "ინტიტუციონალური განვითარების ფონდი". იმხანად თქვენ პარლამენტის წევრი იყავით და ეს ფონდი სახელმწიფო სახსრებით ფინანსდებოდა - კონტროლის პალატის ანგარიშიდან ყოველწლიურად მილიონი ლარი ერიცხებოდა...
- ვერ გავიგე, რა ფონდზეა ლაპარაკი. კონტროლის პალატის ყოფილი თანამშრომლის ნათქვამზე მე რა კომენტარი უნდა გავაკეთო?
- ჩვენ ხელთ გვაქვს კონტროლის პალატის მასალები, დოკუმენტები...
- მე არ გავცნობივარ დოკუმენტს და აქედან გამომდინარე, კომენტარს არ გავაკეთებ.
- შეგხვდებით, წარმოგიდგენთ დოკუმენტს, გაეცანით და შემდეგ ისაუბრეთ...
- მე არ გავცნობივარ დოკუმენტს და კომენტარს ვერ გავაკეთებ...
ესაუბრა დარეჯან ლიპარტელიანი
ყოველკვირეული გაზეთი "ყველა სიახლე"
(გამოდის ოთხშაბათობით)
