ითამაშებს თუ არა "ჩემი ცოლის დაქალებში" დიმა ტატიშვილი

"შუა ქალაქის" ახალ სერიებში ბოლო რამდენიმე კვირაა მსახიობები დიმა ტატიშვილი და ქეთი გეგეშიძე გამოჩნდნენ. წყვილს ორი შვილი ჰყავს, ამბობენ, რომ ერთ-ერთი მალე გამოჩნდება "შუა ქალაქში". ამ ეტაპზე კი მხოლოდ შვილობილი, თუთიყუში "რეზიკო" ჩანს.

ქეთი ცნობილი რადიოწამყვანის მედეა გეგეშიძის ქალიშვილია. 32 წელია მარჯანიშვილის თეატრის მსახიობია. ტელემაყურებელმა ის გაიცნო სერიალიდან "გოგონა გარეუბნიდან", რომელშიც ექიმს, ქალბატონ თამარს ასახიერებდა. დიმა ტატიშვილი კი გასულ სეზონზე "ჩემი ცოლის დაქალებში" დემნას როლს თამაშობდა. მსახიობებს გადასაღებ პავილიონში ვესტუმრეთ.

- მსახიობებს მაინცდამაინც არ სიამოვნებთ, როცა მაყურებელი სერიალიდან იცნობს. თქვენ შემთხვევაში რა ხდება?

დიმა:

- სერიალს გააჩნია, ვიღაცამ ჰიუ ლორი თუ "ექიმი ჰაუსიდან" გაიცნო, ცუდია? თუ კარგი სერიალია, რატომაც არა. სერიალიც, ფილმიც და სპექტაკლიც ჩვენი პროფესიის ნაწილია. ხალხმა ცუდად შეიძლება სერიალიდანაც გაგიცნოს, ფილმიდანაც და სცენიდანაც.

ქეთი:

- მეც დაახლოებით ამ აზრზე ვარ. სერიალში "გოგონა გარეუბნიდან" რომ ვითამაშე, ზაფხულში რომ ვისვენებდი, ვიღაცები მცნობდნენ, მაგრამ არასოდეს მცნობდნენ, როცა სპექტაკლის მერე ქუჩაში გამოვდიოდი. ამას მიჩვეული ვიყავი. ჯერ ერთი, სცენიდან მეტი დისტანცია გაქვს მაყურებელთან, თან მაკიაჟი გაქვს, საკუთარ თავს არ ჰგავხარ. მახსოვს, ერთხელ ბიანკას ვთამაშობდი "ოტელოში", სპექტაკლის მერე გამოვიცვალე და სახლში წასვლას ვაპირებდი. ამ დროს მესმის, ერთი ქალი ეუბნება მეორეს, შეხედე, ეს ის არის, სპექტაკლში რომ თამაშობდაო. ის როგორ არის, ის ლამაზი იყო და ეს რას ჰგავსო, - უპასუხა მეორემ. ამაზე არც გავბრაზებულვარ, ბევრი ვიცინე...

- ქეთი, თქვენ მანამდეც თამაშობდით ამ სერიალში...

- ჰო, ერთ სერიაში ვიყავი ირაკლი ჩხეიძის დედა. მაშინ ისე ვინერვიულე, თავი დამანებეთ, აქ აღარ მოვალ-მეთქი, ვთქვი. ძალიან სანერვიულოა ეს სერიალი.

- რატომ?

- ზოგადად ძალიან ვნერვიულობ ხოლმე პრემიერის დროსაც, რომელიც მინიმუმ ორთვიანი რეპეტიციების შემდეგ იმართება. აქ ორდღიანი რეპეტიცია გვაქვს. ტექსტიც ორ დღეში უნდა დაიმახსოვრო და მაყურებელიც გყავს. მინდა გითხრათ, რომ უკვე ყოველ ოთხშაბათს მაქვს პრემიერა, ოთხი კილო დავიკელი.

- ეს კარგია თუ ცუდი?

- თუ ასე გავაგრძელებ, არა მგონია, რამე დარჩეს ჩემგან (იცინის).

- დიმა, თქვენც იკლებთ წონაში?

- არა, მე სტაბილური წონა მაქვს (იღიმის). ვეთანხმები ქეთის იმაში, რომ სხვა პასუხისმგებლობაა ისეთ სერიალში მონაწილეობა, სადაც მაყურებელიც გყავს. ვცდილობთ, არაფერი შეგვეშალოს და დუბლი არ დაგვჭირდეს. მაყურებლებს ვცემთ პატივს.

- როგორ დაგაწყვილეს სერიალში?

- კასტინგის შედეგად დაგვამტკიცეს ორივე, უბრალოდ, ჯერ მე გამოვჩნდი და შემდეგ ჩემი ცოლი, მარინა. ეს არის ერთი ჩვეულებრივი კარგი ოჯახი, ოღონდ, ისევე, როგორც ამ სერიალის ყველა გმირს, ჩვენც ჩვენი ოფოფები გვყავს.

ქეთი:

- მე რა ოფოფები მყავს?

დიმა:

- შენ თვითონ ოფოფი მყავხარ (იცინიან)... მარინას გადაჭარბებული ყურადღება ახასიათებს ადამიანების მიმართ. ამით არის შემაწუხებელი ოჯახის წევრებისთვის. ეს წაიღე, ის გააკეთე, მშიერი არ იყო, ძილის დრო გაქვს. ჩემს გმირს, გიას, შეიძლება კუჭზე არაფერიც არ სჭირს, მაგრამ მარინა მიიჩნევს, რომ სჭირს და თვითნებურად უნიშნავს დიეტას. ჩიხირთმას აჭმევს უხორცოდ, ქოლესტერინი აქვს ხორცსო, დაიჩემა.

ქეთი:

- სხვათა შორის, მეგობრები მეუბნებიან, სად მოგიძებნეს ასეთი როლი, როგორ გგავსო. მართლა ასეთი შემაწუხებელი ვარ ყველას მიმართ, ოჯახის წევრების, მეგობრების, ახლობლების. მზრუნველობითი ტონი მახასიათებს.

- დიმა, ცხოვრებაშიც ასეთი მზრუნველი მეუღლე შეგხვდათ?

- არა, ასეთი მზრუნველი რომ იყოს, გაგვიჭირდებოდა იდილიური თანაცხოვრება.

- ქეთი, შვილთან ურთიერთობაშიც ასეთივე ყურადღებიანი ხართ?

- ერთი ქალიშვილი მყავს, 27 წლის და ვაღიარებ, რომ ბევრს ვაშავებ ასეთი დამოკიდებულებით. შემაწუხებელი ვარ. ყოველდღე მსაყვედურობს ამის გამო. შვილიშვილიც მყავს, 6 წლის, მასთან დაკავშირებით უარესი მჭირს.

დიმა:

- ეჰ, საწყალი ბავშვი...

- თქვენი ოჯახის წევრები თუ უყურებენ სერიალს, შენიშვნები თუ აქვთ?

- ვუყურებთ, ოღონდ ოჯახში ასეთ რამეებზე არ ვლაპარაკობთ. შეიძლება, რამდენიმე ფრაზა უცხოურ ფილმებზე ვთქვათ, სამსახური სამსახურშიც მეყოფა.

- "ჩემი ცოლის დაქალებშიც" მონაწილეობთ. ორ კონკურენტ ტელევიზიაში მუშაობა უხერხულობას არ გიქმნით?

- არავითარი დისკომფორტი. არც კი ვიცი, სერიალის მესამე სეზონში ვიქნები თუ არა. დემნა და თინა ისე დააშორეს ერთმანეთს, რომ დემნას გმირი ფილმში "ჩემი ცოლის დაქალები" არ არის. შეიძლება, არც მესამე სეზონში იყოს, თუ იქნება, ეს დისკომფორტს ნამდვილად არ შემიქმნის, ნაკლებად ვიქნები სახლში.

- ე.ი. ოჯახს ექნება დისკომფორტი?

- სულაც არა. იმათ ურჩევნიათ, იშვიათად ვიყო შინ.

- რატომ, ასეთი შემაწუხებელი ხართ ოჯახში?

- ცუდი ხასიათი გაქვსო, მეუბნებიან. მარტო ეგენი მეუბნებიან. ვისთან ერთადაც ვმუშაობ, ისინი არ მეუბნებიან ამას და რაღა სახლში ვარ ცუდი?

ქეთი:

- რას ამბობთ, შინაგანად მშვიდი და გაწონასწორებული ადამიანია, იმავდროულად კარგი პარტნიორი, ფანტასტიკური მეხსიერება აქვს. თავისას კი არა, მგონი ჩემს ტექსტებსაც იმახსოვრებს.

ნინო მჭედლიშვილი

ჟურნალი "რეიტინგი"

(გამოდის ორშაბათობით)