კონსტანტინე კუბლაშვილი - იუსტიციის უმაღლეს საბჭოზე ზემოქმედებას ვერავინ მოახდენს

საქართველოს უზენაესი სასამართლოს თავმჯდომარის, კონსტანტინე კუბლაშვილის განცხადებით, იუსტიციის უმაღლეს საბჭოზე ზემოქმედებას ვერავინ მოახდენს.

დღევანდელ პრესკონფერენციაზე კონსტანტინე კუბლაშვილი გამოეხმაურა პროკურატურის მიერ ორი მოსამართლის - მაია გიგაურისა და ბესარიონ ალავიძის პირადი საქმეების გამოთხოვას. უზენაესი სასამართლოს თავმჯდომარე აცხადებს, რომ საქმეების გამოთხოვაზე თანხმობა სასამართლომ გასცა, საქმე კი, ამ ორი მოსამარათლის დანიშვნის საკითხს ეხება.

როგორც კონსტანტინე კუბლაშვილმა განმარტა, დანიშვნაზე გადაწყვეტილება იუსტიციის უმაღლეს საბჭოს აქვს მიღებული, იუსტიციის უმაღლესი საბჭო არის კოლეგიური ორგანო და, კუბლაშვილის თქმით, კოლეგიური ორგანოს გადაწყვეტილებაზე სისხლის სამართლის საქმის აღძვრა იურიდიული ნონსენსია.

"ამ ქმედებით ვერავინ ვერაფერს მიაღწევს, თუკი მათ სურთ საბჭოზე ზემოქმედება, ვაძლევ გარანტიას, რომ ეს მცდელობები უნაყოფო იქნება. მე პირადად მაქვს ხმა მიცემული ამ ორი მოსამართლის დანიშვნაზე და ორივე მათგანი ერთ-ერთი საუკეთესოა ჩვენს სისტემაში", - განაცხადა კონსტანტინე კუბლაშვილმა.

მისივე თქმით, ორივე მოსამართლის დანიშვნის შესახებ დოკუმენტაცია კარგად არის შესწავლილი და ამის შემდეგ აქვს საბჭოს და პირადად მას გადაწყვეტილება მიღებული.

"თუ ვინემს რამის შეცვლა სურს, ერთადერთი გამოსავალი საბჭოს გადაწყვეტილების გასაჩივრებაა. ამასაც ვერ აკეთებენ, რადგან ამ საკითხებზე უკვე იმსჯელეს სააპელაციო და უზენაესმა სასამართლომ და მიიღო გადაწყვეტილება მათი დანიშვნის შესახებ", - განაცხადა კუბლაშვილმა.

მისივე თქმით, აქედან გამომდინარე ამ მოსამართლეებთან დაკავშირებით არანაირი შეკითხვა არ არსებობს.

უზენაესი სასამართლოს სამოქალაქო პალატის მოსამართლის, ბესარიონ ალავიძისა და რუსთავის საქალაქო სასამართლოს მოსამართლის, მაია გიგაურის პირადი საქმეების გამოთხოვის შესახებ პროკურატურამ შუამდგომლობით იუსტიციის უმაღლეს საბჭოს 22 თებერვალს მიმართა.

"ინტერპრესნიუსი"