28
ივნისიდღის ზოგადი ასტროლოგიური პროგნოზი
საყოველთაო დაზღვევის ამოქმედებამ შეიძლება რამდენიმე სადაზღვევო კომპანია შეიწიროს. კომპანიის წარმომადგენლებს მოსალოდნელი რისკები აშინებთ, თუმცა ამ რისკებზე ღიად საუბარს სიფრთხილით ეკიდებიან. სადაზღვევო პროდუქტებს შორის ყველაზე პოპულარული სამედიცინო დაზღვევაა, ამ მომენტში კი დიდი წილი სახელმწიფო დაზღვევას უჭირავს. გარდა ამისა, მზღვეველები წინა ხელისუფლებამ ჰოსპიტალურ პროგრამაში ჩართო და საავადმყოფოების აშენების სანაცვლოდ გარანტირებულ სახელმწიფო პროგრამებს შეპირდა. აქედან გამომდინარე, კომპანიების ხელმძღვანელთა თავის ტკივილი გასაგებია.
გამორიცხული არ არის, სადაზღვევო კომპანია "აისი ჯგუფმა" ჯანდაცვის მიმართულებაზე უარი თქვას. კომპანიის გენერალურმა დირექტორმა თენგიზ მეზურნიშვილმა "კომერსანტ.გე"-სთან საუბრისას აღნიშნა, რომ საბიუჯეტო სამედიცინო პროგრამებს "აისი ჯგუფის" საქმიანობის 70% უჭირავს, შესაბამისად, სახელმწიფო სადაზღვევო ფონდის დაანონსებული სახით ამოქმედების შემთხვევაში კომპანია პირდაპირ-პროპორციულად 70%-ით შემცირდება.
თენგიზ მეზურნიშვილმა "რეზონანსთან" საუბარში კი აღნიშნა, რომ კომპანია ჯანდაცვის მიმართულებაზე უარის თქმას არ აპირებს და ჟურნალისტმა მისი ნათქვამის თავისებური ინტერპრეტირება მოახდინა. "ჩვეულებრივ რეჟიმში ვაგრძელებთ ყველა მომსახურებას. კონსულტაციები მიმდინარეობს ჯანდაცვის სამინისტროსთან და ჯერ ვარკვევთ კონკრეტულად რა სახის პროდუქტი გამოაქვს სახელმწიფოს", - ამბობს მეზურნიშვილი. მისი თქმით, "აისი ჯგუფის" სამედიცინო დაზღვევის სეგმენტში სახელმწიფო დაზღვევის წილი 50%-ზე მეტია.
როგორ იმოქმედებს სახელმწიფო დაზღვევა სხვა სადაზღვევო კომპანიებზე და რას აპირებენ ისინი? "ჯიპიაი ჰოლდინგის" საზოგადოებასთან ურთიერთობის განყოფილების მოსაზრებით, საყოველთაო დაზღვევის ამოქმედებით პრობლემები უფრო მეტად იმ კომპანიებს შეექმნებათ, რომლებსაც ჯანდაცვის სეგმენტში სახელმწიფო სამედიცინო დაზღვევის დიდი წილი აქვთ.
"ჩვენ ვავითარებდით სხვა სადაზღვევო პროდუქტებსაც, "ჯიპიაი ჰოლდინგში" სახელმწიფო სამედიცინო დაზღვევის წილი მხოლოდ 30%-ია. მთავარი საკითხი არის ის, რომ ჩვენ 2010-11 წლებში მნიშვნელოვანი პროექტი განვახორციელეთ და "ვენის სადაზღვევო ჯგუფთან" ერთად რაიონებში 16 საავადმყოფო ავაშენეთ. პროექტში 30 მილიონი ლარის ინვესტიცია ჩაიდო.
შესაბამისად, ამ პროცესში ყველაზე მნიშვნელოვანი ინვესტორების ინტერესების დაცვაა. ისინი დაზარალებულები არ უნდა აღმოჩნდნენ. ბაზრის გაჯანსაღებისთვის მეორე ძალიან მნიშვნელოვანი საკითხია ის, რომ არ შეფერხდეს კორპორაციული დაზღვევა. გვინდა, ეს მიმართულება წინ წავიდეს", - ამბობს თინათინ სტამბოლიშვილი.
"არქიმედეს გლობალ ჯორჯიას" ხელმძღვანელის, ნიკა რამიშვილის თქმით, არსებულ პირობებთან ადაპტაცია მათთვის საკმაოდ რთული აღმოჩნდა, ვინაიდან სადაზღვევო კომპანიები ჰოსპიტალურ სექტორსაც ფლობენ და დღეს არაერთი პასუხგაუცემელი კითხვაა ამ თემის ირგვლივ.
"არ ვიცით, რა იქნება საყოველთაო დაზღვევის ამოქმედების შემდეგ, როგორი იქნება იგივე სადაზღვევო კომპანიების მფლობელობაში მყოფი ჰოსპიტალების როლი. ახლა ჯანდაცვის სამინისტროს წარმომადგენლებთან ერთად გავდივართ ამ საკითხს და ვცდილობთ პასუხების მიღებას", - აცხადებს რამიშვილი.
"ალდაგი ბისიაის" საზოგადოებასთან ურთიერთობის ხელმძღვანელმა მაია ივჩენკომ კი აღნიშნა, რომ ამ საკითხზე კონსულტაციები გრძელდება ჯანდაცვის სამინისტროსთან და კომპანია პროდუქტების განვითარებას ჩვეული რეჟიმით აგრძელებს.
"კონსულტაციები მიდის ამ თემაზე, კონკრეტულად რა ტიპის პროდუქტს გამოიტანს სამინისტრო. კომპანია კი სამედიცინო დაზღვევის პროდუქტს მომხმარებელს იგივე ტემპში, აქტიურად სთავაზობს", - ამბობს მაია ივჩენკო.
სადაზღვევო ასოციაციის ხელმძღვანელის, დევი ხეჩინაშვილის განმარტებით, სადაზღვევო სექტორი გაურკვევლობაშია. ეს საკითხი მხოლოდ კომპანიებს არ ეხება და გასათვალისწინებელია ინვესტორების და კომპანიებში ათასობით დასაქმებულის ინტერესებიც.
მისი თქმით, 2008 წლიდან სადაზღვევო სექტორში დიდი ცვლილებები განხორციელდა, სადაზღვევო სერვისებზე ხელმისაწვდომობა 2 მილიონზე მეტ ადამიანს აქვს. ამასთანავე, შეიქმნა დიდი სამედიცინო ინფრასტრუქტურა. "2012 წელს სადაზღვევო კომპანიებმა ყურადღება გაამახვილეს ინდივიდუალურ დაზღვევაზეც და მინდა გითხრათ, რომ ბოლო წელს დაახლოებით 60 000 დაეზღვია ინდივიდუალური პროგრამებით. კიდევ ერთხელ ვაცხადებ - ჩვენ საყოველთაო დაზღვევამდე ფრთხილად უნდა მივიდეთ", - აღნიშნა დევი ხეჩინაშვილმა.
ჯერჯერობით ჯანდაცვის სამინისტროშიც ვერ აკონკრეტებენ რა სახის იქნება სახელმწიფო სადაზღვევო კომპანია. საყოველთაო დაზღვევა თებერვლის ბოლოდან უკვე უნდა დაიწყოს. სამინისტროს ინფორმაციით, საყოველთაო დაზღვევის ფორტმაში გადაუდებელი სამედიცინო შემთხვევისას საავადმყოფოები პაციენტებს სადაზღვევო პოლისის გარეშე მოემსახურებიან. კონკრეტულად, რომელი საავადმყოფო ჩაერთვება ამ პროგრამაში სამინისტროში ჯერჯერობით ამ დეტალებზე კონკრეტულად ვერ საუბრობენ, მაგრამ რამდენიმე დღეში გარკვეული მონახაზი ექნებათ.
ამ ეტაპზე ცნობილია მხოლოდ ის, რომ გადაუდებელი შემთხვევისას, პაციენტი, მექანიკურად მოხვდება საყოველთაო დაზღვევის პროგრამაში, მიიღებს უფასო ამბულატორიულ და სტაციონალურ მომსახურებას. ამას დაემატება ის დიაგნოსტიკური კვლევები, რომელიც საჭიროა ამბულატორიული პირველადი შეფასებისთვის.
1-ლი ივლისიდან კი სახელმწიფო პროგრამით დაზღვეულებს სახელმწიფო სადაზღვევო კომპანია მოემსახურება. ამ პერიოდიდან ამოქმედდება, დაზღვევის საბაზისო პაკეტები, ანუ არსებულ პაკეტს გეგმიური სერვისი დაემატება, როგორც ამბულატორიულ, ისე სტაციონალურ დონეზე. ასევე გაფართოვდება ამბულატორიული და დიაგნოსტიკური კვლევების ჩამონათვალი. დაფინანსდება ორსულობა-მშობიარობის ხარჯები. მიმდინარეობს მუშაობა მონაცემთა ბაზის დაზუსტებაზეც.
სახელმწიფო სადაზღვევო კომპანია იქნება არამომგებიანი ინსტიტუტი, რომელიც თანხის ადმინისტრირებას, მიმწოდებლების (სამედიცინო პერსონალი, საავადმყოფოები) შერჩევასა და დაფინანსებას უზრუნველყოფს. მისი საბჭო დაკომპლექტდება სახელმწიფოს, პაციენტების, სამედიცინო პერსონალის, სადაზღვევო და არასამთავრობო ორგანიზაციების (მათ შორის, პროფკავშირების) წარმომადგენლებისაგან.
მაკა ხარაზიშვილი
