ფოტორეპორტიორებმა არჩილ კბილაშვილის სახელზე განცხადება შეიტანეს

ფოტორეპორტიორებმა ირაკლი გედენიძემ, ნათია გედენიძემ, გიორგი აბდალაძემ და ზურაბ ქურციკიძემ მათი საქმის ხელახლა გამოძიების მოთხოვნით მთავარ პროკურატურაში არჩილ კბილაშვილის სახელზე განცხადება შეიტანეს.

ფოტორეპორტიორები საქმისთვის გრიფის "საიდუმლო" მოხსნას ითხოვენ. ამასთან, ისინი მზად არიან, რომ გამომძიებლის შეკითხვებს უპასუხონ.

ფოტორეპორტიორები მათ წინააღმდეგ საქმის აღძვრას 26 მაისს გადაღებულ ფოტოებს უკავშირებენ. ისინი ჟურნალისტებთან მათზე განხორციელებული ფსიქოლოგიური და ფიზიკური ზეწოლის შესახებ საუბრობენ.

"ფიზიკური ზეწოლა ისეთი არ იყო, რომლის გაძლებაც არ შეიძლებოდა. ადგილი ჰქონდა უფრო ფსიქოლოგიურ ზეწოლას - გვერდით საკანში იმყოფებოდა ჩემი მეუღლე, გარეთ კი, არასრულწლოვანი შვილები", - აღნიშნა ირაკლი გედენიძემ.

მის მიმართ განხორციელებულ ზეწოლაზე ისაუბრა ფოტორეპორტიორმა ზურაბ ქურციკიძემ და დასძინა, რომ ბრალდება, რომელიც აღიარებინეს, შეთითხნილი იყო.

ამასთან, ფოტორეპორტიორი გიორგი აბდალაძე მზად არის, რომ გამოძიებას გადასცეს ვიდეომასალა, სადაც ნაჩვენებია თუ როგორ გადიოდა რეპეტიციას ღამის ოთხს საათზე ჩვენების მისაცემად.

ფოტორეპორტიორების ადვოკატ მიხეილ ღოღაძის თქმით, მისი დაცვის ქვეშ მყოფი პირები პირობით მსჯავრდებულები არიან და აუცილებელია, რომ საქმე ხელახლა იყოს გამოძიებული, დადგეს გამამართლებელი განაჩენი, რადგან ფოტორეპორტიორებმა წამების შედეგად დაიბრალეს დანაშაული.

ამასთან, ადვოკატი ფოტორეპორტიორების მიმართ განხორციელებული ზეწოლის გამო საქმის აღძვრას მოითხოვს.

ამასთან, დღესვე გავრცელდა ფოტორეპორტიორების განცხადება, რომელშიც ნათქვამია: "ჩვენ ის ფოტორეპორტიორები ვარ, რომლებიც წინა ხელისუფლებამ სრულიად უსამართლოდ გაგვწირა და დაგვადანაშაულა საქართველოს სისხლის სამართლის კოდექსის 314-ე მუხლის პირველი ნაწილით გათვალისწინებული დანაშაულის ჩადენაში (ჯაშუშობა). ჩვენი სურვილის მიუხედავად, არ მოგვეცა საშუალება, დაგვემტკიცებინა ჩვენი უდანაშაულობა. დღეს დადგა დრო, სამართალმა იზეიმოს".

"ინტერპრესნიუსი"