ელისო კილაძე: მთავარი პროკურატურა ერეკლე კოდუას სახლში იარაღის ჩადებას აპირებდა

არასამთავრობო ორგანიზაცია "ჩემი საქართველოს" თავმჯდომარე ელისო კილაძის ინფორმაციით, მთავარი პროკურატურა ერეკლე კოდუას სახლში იარაღის ჩადებას აპირებდა .

როგორც დღეს გამართულ პრესკონფერენციაზე კილაძემ განაცხადა, ამ მიზნით, მთავარი პროკურორის მოადგილე ლაშა ნაცვლიშვილის გადაწყვეტილებით, მომავალი კვირის ოთხშაბათს ან ხუთშაბათს ერეკლე კოდუას სახლში სპეცოპერაცია უნდა ჩატარებულიყო.

"ლაშა ნაცვლიშვილმა მიიღო დავალება და უნდა დაიწყოს გამოძიება ერეკლე კოდუას წინააღმდეგ. საქმე ეხება სპეციარაღის შეძენას. ამ გამოძიების ფარგლებში, მე როგორც გადმომცეს ინფორმაცია, ერეკლე კოდუას სახლში იარაღის ჩადება იგეგმება. ეს არის კატეგორიულად მიუღებელი ქმედება. ნაცვლიშვილს უნდა ესმოდეს, რომ გენერალ კოდუას სახლში იარაღის ჩადება ნიშნავს "სპეცოპერაცია გუნავა-2"-ს, რომელიც აუცილებლად ბუმერანგის წესით დაუბრუნდება უწყებას, სადაც ის მუშაობს და კოალიციასაც, მით უმეტეს მაშინ, როდესაც ერეკლე კოდუას სახლში რამდენიმე გაფორმებული იარაღი ექნება", - აღნიშნა ელისო კილაძემ.

ამასთან, კილაძემ ციხის სკანდალის გამოძიების საქმეზეც ისაუბრა და აღნიშნა, რომ მთავარ პროკურატურას საქმე სრულყოფილად არ გამოუძიებია. მისივე თქმით, დღემდე არ არიან დაკავებული ის ადამიანები, რომლებიც ჩანან კარანტინის კადრებში, თუ როგორც სცემენ პატიმრებს და ჩანიშნულ სასამართლო პროცესებზე ისინი მხოლოდ მოწმის სახით არიან დაბარებულნი.

"ჩვენ გვითხრეს, რომ ციხის სკანდალური ფაქტების საქმე დასრულდა. ფაქტობრივად ახლა უკვე უნდა წარიმართოს ის სასამართლოში. ბედუკაძის ბრალის წარდგენის დადგენილებას ხელს აწერს პროკურორი რეზო რადოი, სააკაშვილის რეჟიმის მოსამართლე, რომელიც 2006 წლიდან მუშაობდა საქალაქო სასამართლოში და ასამართლებდა ადამიანებს ყოველგვარი დასაბუთებისა და მტკიცებულების გარეშე. ჩემდა გასაკვირად, აღმოვაჩინე, რომ რეზო რადოი ახალი ხელისუფლების მთავარ პროკურატურაში მუშაობს და არის ერთ-ერთი წარმმართველი ამ ციხის კადრების გამოძიების", - განაცხადა ელისო კილაძემ.

მისივე ინფორმაციით, "ქართულ ოცნებას" და "მის მრჩეველ გია ხუხაშვილს" ყოფილი მაღალჩინოსნების შესახებ ინფორმაციებს აწვდის ზურაბ ადეიშვილის ყოფილი მოადგილე დავით შატარაშვილი. კილაძის თქმით, ეს ადამიანი უშუალოდ იყო კუდ-ის გახმაურებული სპეცოპერაციების დამგეგმავი.

"უკვე გახმაურებულია, რომ "ქართული ოცნების" ერთ-ერთი მთავარი მრჩევლის და რუხი კარდინალის გია ხუხაშვილის მეშვეობით გადაბირებულია ზურა ადეიშვილის მარჯვენა ხელი და მოადგილე დავით ჩხატარაშვილი. მან არა მარტო ჩვენება მისცა ადეიშვილის წინააღმდეგ, არამედ ბევრ ინფორმაციას აწვდის ძალოვან უწყებებს ყოფილი მაღალჩინოსნების საქმიანობის თაობაზე. მე დეტალური ინფორმაცია მაქვს, რომ ჩხატარაშვილი არა მხოლოდ ადეიშვილის უშუალო დავალებების შემსრულებელი იყო, არამედ ის კუდ-ის ზედამხედველიც იყო და მის მიერ არის დაგეგმილი ყველა ის გახმაურებული სპეცოპერაცია, რასაც იმ წლებში კუდ-ი ატარებდა, მათ შორის უკანონო სატელეფონო მოსმენები და კომპიუტერებში შესვლის ფაქტები. ამასთან, მას ეკუთვნის ვერსია, რომელიც გირგვლიანის საქმეზე ოფიციალურად არსებობდა. ეს არის ჩემთვის კატეგორიულად მიუღებელი. ეს ადამიანი უნდა დაისაჯოს, მით უმეტეს მაშინ, როდესაც ახალი ხელისუფლება ამბობს, რომ ქვეყანაში სამართლიანობა უნდა აღდგეს, თუმცა ის შენობაში ზის და გია ხუხაშვილს, რომელიც არის "რუხი კარდინალი", ინფორმაციებს აწვდის", - განაცხადა კილაძემ.

"ინტერპრესნიუსი"