15
ივნისიდღის ზოგადი ასტროლოგიური პროგნოზი
პრეზიდენტმა სააკაშვილმა 8 თებერვალს თავის ოფიციალურ მიმართვაში, "დაიცავი საქართველოს" ლიდერი კახა მიქაია "წვერმოშვებულ კრიმინალად" მოიხსენია. ამ მიმართვამდე ორი დღით ადრე კი სოციალურ ქსელებში გავრცელდა ასეთი ინფორმაცია: კახა მიქაიამ ერთი თვის წინ სამეგრელოში თეატრალიზებული პერფორმანსი, მიხეილ სააკაშვილის დაკრძალვის ცერემონია რომ მოაწყო, ამით სამეგრელოს რეპუტაცია შეილახა და მიქაიას სამეგრელოს ინტელიგენცია პასუხს მოსთხოვსო...
- ბატონო კახა, 8 თებერვალს პრეზიდენტმა "წვერმოშვებული კრიმინალი" გიწოდათ, როგორ ფიქრობთ, რით გააღიზიანეთ პრეზიდენტი?
- მიხეილ სააკაშვილისგან ეს არც მწყენია და არც გამკვირვებია. მე არც პირველი ვარ და არც უკანასკნელი - ის ყველას შეურაცხყოფს. 8 თებერვალს, მაშინ, როდესაც საზოგადოებას ტელეეკრანებიდან მიმართავდა და იქვე ისხდნენ დიპლომატებიც, პრეზიდენტს აშკარად ეტყობოდა, რომ რაღაც ნივთიერებით იყო გაბრუებული. ეს იცის ყველამ, მაგრამ საჯაროდ ლაპარაკს ერიდებიან. ასეთი ადამიანი 9 წლის განმავლობაში მართავდა საქართველოს. როგორ შეიძლება მან ვინმეს კრიმინალობაზე ილაპარაკოს, და მით უმეტეს კახა მიქაიას კრიმინალობა ვის გაუგონია?
- ხომ არ აპირებთ, პრეზიდენტს ამ სიტყვების გამო უჩივლოთ?
- რატომ უნდა ვუჩივლო, შეიძლება ასეთი ადამიანისგან დაწიხვლა გეწყინოს?
- გავრცელდა ინფორმაცია, რომ უახლოეს პერიოდში მიხეილ სააკაშვილი სამეგრელოში, პრეზიდენტის რეზიდენციაში გადავა და ნაციონალების დისლოკაციის ცენტრი ზუგდიდი იქნება.
- როგორც კი ეს ინფორმაცია გავრცელდა, სამეგრელოში პრეზიდენტის რეზიდენციასთან აქცია მოვაწყვეთ, რომელსაც შემოუერთდნენ დევნილები და სოციალურად დაუცველი ადამიანები. ჩვენი მოთხოვნაა, სასწრაფოდ გადადგეს ვადაგასული პრეზიდენტი და მისი რეზიდენცია, რომლის საბაზრო ღირებულებაც რამდენიმე მილიონია, გადაეცეს იქვე მდებარე ტექნიკუმის შენობაში მცხოვრებ დევნილებს, რომლებსაც ამქვეყნად არაფერი აბადიათ, ანდა გაიყიდოს და თანხა დევნილებსა და უსახლკაროებს მოხმარდეს. ასევე, შეიძლება პრეზიდენტის რეზიდენციაში გაიხსნას უსახლკაროთა, დევნილთა და სოციალურად დაუცველ ბავშვთათვის ბაგა-ბაღი. აქციები მიმდინარეობს და გაგრძელდება მანამ, სანამ არ დაკმაყოფილდება ჩვენი მოთხოვნა.
მას შემდეგ, რაც სამეგრელოში თავისუფლების სიომ დაჰბერა, სამეგრელოს მოსახლეობა გამოცოცხლდა, აღარ უშინდება აზრის გამოთქმას და საპროტესტო აქციის მოწყობას. არც სააკაშვილის ეშინიათ და არც ახალაიების კლანის, რომელიც დაუძლურდა და დაჩაჩანაკდა. სამეგრელოს მოსახლეობამ დაიწყო სააკაშვილის წინააღმდეგ სამოქალაქო მოძრაობა, რომელსაც შესწევს ძალა, ნებისმიერ უკანონო მოქმედებას გაუწიოს წინააღმდეგობა. ასე რომ, მიხეილ სააკაშვილი სამეგრელოში მიიღებს სამოქალაქო საზოგადოების წინააღმდეგობას, მხოლოდ კანონის ფარგლებში. კანონის დარღვევა, შევარდნა-შემოვარდნა და დარბევა სააკაშვილის რეჟიმის თანმდევი იყო.
- თუ იცით, მიხეილ სააკაშვილი თავდაპირველად ანაკლიაში დაბინავდება და ამის შემდეგ გადავა ზუგდიდის რეზიდენციაში?
- გულწრფელად გეტყვით, მიხეილ სააკაშვილს ანაკლიაში ბორდელ-ბორდელ ვერ დავუწყებ დევნას და თუ აქ ჩამობრძანდება, კი საკადრისად დავხვდებით!
- ბატონო კახა, სოციალურ ქსელში გავრცელდა ინფორმაცია, რომ თქვენ მეკუბოვეს არ გადაუხადეთ იმ კუბოს საფასური - 280 ლარი, რომელშიც მიხეილ სააკაშვილის ფიტული ჩაასვენეთ და თეატრალიზებული დაკრძალვა მოაწყვეთ...
- ეს ინფორმაცია გაავრცელეს ნაციონალებმა. კუბოს საფასური გადახდილია. ეს იყო პერფორმანსი - პროტესტი მიხეილ სააკაშვილის წინააღმდეგ. იმასთან შედარებით, რაც სააკაშვილმა სამეგრელოს და მთელ ქვეყანას დამართა, ფიტულის კუბოში ჩასვენება რა მოსატანია?!
დარეჯან ლიპარტელიანი
ყოველკვირეული გაზეთი "ყველა სიახლე"
(გამოდის ოთხშაბათობით)
