26
მარტიდღის ზოგადი ასტროლოგიური პროგნოზი
მიხეილ თუმანიშვილის სახელობის კინომსახიობთა თეატრის მსახიობი ნინელი ჭანკვეტაძე ქვეყანაში მიმდინარე პოლიტიკურ პროცესებს ყოველთვის ადევნებდა თვალს და "ნაციონალურ მოძრაობას" საჯაროდ აკრიტიკებდა. საპარლამენტო არჩევნების წინ "ქართული ოცნების" რიგებს შეუერთდა. არჩევნებში გამარჯვების შემდეგ კი ყველა შემოთავაზებაზე უარი თქვა და თეატრს დაუბრუნდა. ქალბატონი ნინელი ჭანკვეტაძე დღეს ჩვენი სტუმარია.
- ნათქვამია, რასაც დათესავ, იმას მოიმკიო! სააკაშვილის ხელისუფლებამ 7 ნოემბერსა და 26 მაისს რომ ჩაატარა სადამსჯელო ოპერაცია, ხელებზე ბორკილდადებული მიცვალებულები სახურავზე რომ შემოდეს და ცინიკურად გამოგვიცხადეს, დენმა დაარტყათო, ეს საქმეები რატომ არ გამოიძიეს? სასაცილოა ამ ადამიანების ლაპარაკი ძალადობაზე, სასწრაფო გამოძიებასა და განსხვავებული აზრის დათრგუნვაზე. ვაჟბატონი გიგი უგულავა თავაწეული რომ შეიჭრა იმ ადამიანების ჯგუფში, რომლებსაც 9 წლის განმავლობაში სიცოცხლე გაუმწარეს, არ იცოდა, ამას რა მოჰყვებოდა? ციხის კადრებიც გვახსოვს, თუმცა უფრო ამაზრზენი კადრებიც არსებობს, რომლებიც საზოგადოებას არ უნახავს, რადგან ახალი ხელისუფლება ჩვენს ფსიქიკას უფრთხილდება... დარწმუნებული ვარ, რაც 8 თებერვალს მოხდა, ეს იყო პროვოკაცია. ნაცმოძრაობის წევრებს აღარაფერი დარჩენიათ უცხოელებტან კეკლუცობისა და საერთაშორისო ორგანიზაციებთან ყელყელაობის გარდა, - შეხედეთ, ოპოზიციას როგორ გვდევნიანო! ნაციონალები, იმის ნაცვლად, რომ ბოდიში მოუხადონ ქართველ ხალხს, დასცინიან. ამ წლების განმავლობაში, პირველად 8 თებერვალს მოვისმინე სააკაშვილისგან, რომ თურმე წუხს გირგვლიანის საქმის გამო. არადა, კარგად გვახსოვს ირინა ენუქიძის ბრძოლა ამ უსამართლობის წინააღმდეგ და ის სასამართლოც, ტელეფონის ზარის მიხედვით რომ მიიღო გადაწყვეტილება. ცრუობს სააკაშვილი, როდესაც ამბობს, რომ წუხს გირგვლიანის მკვლელობის გამო. პრეზიდენტმა ერთხელაც ვერ მოახერხა, ქართველი საზოგადოების წინაშე გულწრფელად ეღიარებინა საკუთარი დანაშაული. ასე რომ, ნაცმოძრაობა უნდა გასამართლდეს. გაკვირვებული და შეურაცხყოფილი დავრჩები, თუ ჩვენი ხელისუფლება საერთაშორისო ორგანიზაციების აზრს უფრო გაუწევს ანგარიშს, ვიდრე ქართველი ხალხისას. ნაცმოძრაობის წარმომადგენლები უნდა მიხვდნენ, რომ იმ ქვეყანაში, სადაც ამდენი დანაშაული აქვთ ჩადენილი, ქუჩაში თავისუფლად ვეღარ გაივლიან. დროა, ამ ყველაფერს წერტილი დაესვას და ხელისუფლებამ მათ მიმათ მეტი სიმკაცრე გამოიჩინოს. 9 წლის განმავლობაში საკმაოდ ვეწამეთ და უკვე აუტანელია კუბლაშვილების და სააკაშვილის ლაი-ლაის მოსმენა, რომ თურმე უნდა დასრულდეს სატელეფონო მოსმენები და ა.შ. ეს ცინიზმია! არც თბილისის მერის მიერ გამწარებული დევნილები დაგვვიწყებია, სახლებიდან რომ გამოყარეს და სატვირთო მანქანებში შეტენეს. ამ დროს კი გამოდის ცინიკოსი უგულავა და ამბობს, რომ არავის მისცემს თბილისელების დაჩაგვრის უფლებას. 8 თებერვალს სააკაშვილმა განაცხადა, ჩემი პრიორიტეტი ხალხის აზრის მოსმენააო. რატომ არ უსმენდა ამ ხნის განმავლობაში? რატომ წაართვა, რატომ ჩარეცხა, წაგლიჯა და დახოცა ახალგაზრდები?!
- ვანო მერაბიშვილმა თქვა, რომ 4 წელი ვერ დაიცდიან და გაცილებით ადრე მოვლენ ხელისუფლებაში...
- სიტყვების რახარუხის მეტი რაღა დარჩენიათ?! გემი იძირება და ვირთხები გარბიან, თუმცა გადარჩენის შანსი თითქმის არ აქვთ. ახლა გურამ დონაძე ჩამობრძანდა. რატომ? იმიტომ, რომ უცხოეთში საფრთხე ემუქრება და ახალაიას მსგავსად ისიც მიხვდა, რომ საქართველოს ციხეში მისი სიცოცხლე გაცილებით დაცული იქნება. ესეც ხომ ახალი ხელისუფლების დამსახურებაა?!
- ქალბატონო ნინელი, არჩევნებში "ქართული ოცნების" გამარჯვების შემდეგ განაცხადეთ, რომ თქვენი საქმე გააკეთეთ და ბრუნდებით თეატრში...
- ერთ საიდუმლოს გაგიმხელთ: როდესაც ბატონმა ბიძინამ შემომთავაზა მისი გუნდის საინიციატივო ჯგუფში შესვლა, უყოყმანოდ დავთანხმდი, რადგან ეს ადამიანი, მისი საქმიანობიდან გამომდინარე, ყველანაირად მისაღები იყო ჩემთვის. თუმცა მაშინვე ვუთხარი, ამის იქით ნაბიჯს ვეღარ გადავდგამ-მეთქი. უბრალოდ, არ ვიქნებოდი მართალი, ეს ტვირთი მეტარებინა. არჩევნების შემდეგაც მქონდა შემოთავაზება "ქართული ოცნების" არაერთი წევრის მხრიდან სხვადასხვა თანამდებობაზე, მაგრამ ბიძინა ივანიშვილმა თქვა, ნინელის მივეცი პირობა და თავი დაანებეთო (იღიმის). ეს შემოთავაზებები რომ მიმეღო, ყველაფერი უნდა გადამედო, მე კი მსახიობი ვარ და ჩემი საქმე უნდა ვაკეთო.
ნინო მაისურაძე
ყოველკვირეული გაზეთი "ყველა სიახლე"
(გამოდის ოთხშაბათობით)
