"ნაციონალებისა" და "მეოცნებეების" დაპირისპირების საგანი ამჯერად პრემიერის ჩაბარებული და პრეზიდენტის ჩაუბარებელი ანგარიში გახდა. ამ თემასთან დაკავშირებით შიდა ქართლის რწმუნებულ-გუბერნატორი ანდრო ბარნოვი და საპარლამენტო უმრავლესობის წარმომადგენელი - გია ცაგარეიშვილი თავიანთ აზრს გამოთქვამენ.
- როგორ შეაფასებთ ბიძინა ივანიშვილის მიერ ხალხისათვის ჩაბარებულ ასი დღის ანგარიშს?
ანდრო ბარნოვი:
- ბიძინა ივანიშვილის ანგარიში რომ მოვისმინე, სიცარიელის განცდა დამრჩა. რეალურად არაფერი შეცვლილა. ის ამბობდა, რომ ფასებმა დაიკლო საწვავზე, წამლებზე, სურსათზე. მართლა ვერ მივხვდი, რაზე ლაპარაკობდა პრემიერი, რადგან მე დაკლებული ფასები რეალურად არსად მინახავს. საერთოდაც, რა უნდა დაუჯერო და როგორ უნდა ირწმუნო იმ ადამიანის, რომელიც საკუთარი გუნდის წევრებს შეურაცხყოფს? ალბათ ხვდებით, რომ ირაკლი ალასანიას ვგულისხმობ. სხვათა შორის, მე თავდაცვის მინისტრის ურეაქციობაც ძალზე მაოცებს...
გია ცაგარეიშვილი:
- ივანიშვილის კი არა, საპარლამენტო უმრავლესობის მიერ დაკომპლექტებული მთავრობის ასი დღის ანგარიში იყო. "ნაცებისგან" განსხვავებით, ჩვენ ბელადი არ გვყავს. ე.ი. ძალიან საინტერესო, ფათერაკებით აღსავსე სამი თვე გავიარეთ. საქმის კეთების პარალელურად, სააკაშვილის ინტრიგებთან გამკლავებაც გვიწევდა. სირთულეების მიუხედავად, ფარდა ავხადეთ უამრავ სკანდალურ საქმეს, შევიწყალეთ 190 პოლიტპატიმარი, გამოვაცხადეთ ამნისტია, ქვეყანა გავათავისუფლეთ მონოპოლისტებისგან და შევქმენით გამჭვირვალე, ხალხის კეთილდღეობაზე ორიენტირებული ბიუჯეტი.
- რატომ არ მისცა პარლამენტმა პრეზიდენტ სააკაშვილს ყოველწლიური მოხსენების გაკეთების საშუალება?
ანდრო ბარნოვი:
- მგონია, რომ საპარლამენტო უმრავლესობის მიერ პრეზიდენტის მოსმენაზე უარის თქმა ძალიან სამწუხარო და ცუდი რამ არის. ჩემი აზრით, კოალიცია "ქართული ოცნების" წარმომადგენლებმა პარლამენტში ძალა იგრძნეს და ახლა ამ ძალის დემონსტრირებას ცდილობენ. ასეთი ქმედება პოლიტიკური კულტურისგან ძალიან შორს დგას. ვწუხვარ, რომ ჩემი ქვეყნის საპარლამენტო უმრავლესობამ ასეთი უკულტურობა გამოიჩინა.
- პარლამენტის თავმჯდომარემ განაცხადა, რომ მათ პრეზიდენტის მოსმენაზე უარი არ უთქვამთ. უბრალოდ, სააკაშვილს ამ პროცესის მცირე დროით გადადება შესთავაზეს, რაზეც მისგან უარი მიიღეს...
- მათ თქვეს, - როცა ჩვენ ვეტყვით, პრეზიდენტი პარლამენტში მაშინ მოვიდესო. რა გამოდის? ე.ი. "ქართულმა ოცნებამ" თქვა, მოდი, ჯერ ყველა აწეწილ საქმეს "დავაუთოებთ", ყველა საჭირო ადამიანს გადავიბირებთ, საკონსტიტუციო ცვლილებებს მივიღებთ, მერე მოდი და რაც გინდა, ილაპარაკეო. ამაზე, რა თქმა უნდა, პრეზიდენტი უარს იტყოდა. ჩვენ აშკარად ვხედავთ, რომ საპარლამენტო უმრავლესობა ცდილობს, ზეწოლითა და მუქარით გადაიბიროს უმცირესობის დეპუტატები. ასევე ყველაფერს აკეთებენ იმისთვის, რომ საკონსტიტუციო ცვლილებები განახორციელონ. პრეზიდენტს კი ეუბნებიან, ამ ყველაფერს შენ მშვიდად უყურე, მერე კი, როცა გეტყვით, მობრძანდი და ან მოგისმენთ, ან - არაო.
გია ცაგარეიშვილი:
- სააკაშვილს რომ ხალხისთვის მიცემული პირობა შეესრულებინა და პარლამენტისთვის წართმეული თუ მოპარული უფლებები დაებრუნებინა, მისი პარლამენტში გამოსვლის ვადა არ გადაიწევდა. ის ხომ გვარწმუნებს, რომ დემოკრატი მმართველია და ევროატლანტიკურ სტრუქტურებში უნდა საქართველოს ხილვა. იმასაც ამბობს, რომ ხელისუფლების მთავარი წყარო, ხალხია. თუ სააკაშვილი გულწრფელია და არ იტყუება, მაშინ ადგეს და ხალხის არჩეულ პარლამენტს წართმეული უფლებები დაუბრუნოს. ქვეყნის საკანონმდებლო ორგანოს გამუდმებით აკლდებოდა უფლებები, აღმასრულებელ ხელისუფლებას (კონკრეტულად პრეზიდენტს) კი - ემატებოდა. 2012 წლის ოქტომბრამდე მთელი ქვეყანა ერთი ადამიანის ნება-სურვილზე ვიყავით დამოკიდებული. ახლა საქართველოს პარლამენტი სააკაშვილის მონათა თავშეყრის ადგილი აღარ არის, აქ უკვე უმრავლესობას თავმოყვარე ადამიანები შეადგენენ, რომლებიც სააკაშვილს საქართველოს ფეხქვეშ გაგდების უფლებას აღარ მისცემენ. ჩვენ სააკაშვილს საკმაოდ მკაფიოდ მივანიშნეთ, - ვიდრე პარლამენტისთვის მოპარულ უფლებებს არ დააბრუნებს, ამ შენობაში ვერ შემოვა. თუ გაიგებს ჩვენს გზავნილს, საშუალება ექნება, მობრძანდეს და გედის სიმღერა შეასრულოს.
- თქვენი აზრით, ვის აძლევდა ხელს საჯარო ბიბლიოთეკასთან მომხდარი დაპირისპირება?
ანდრო ბარნოვი:
- იმედი მაქვს, ქართველმა საზოგადოებამ ყველაფერი ობიექტურად შეაფასა. "ქართულ ოცნებას" ძალიან გაუჭირდება, რომ ყველაფერი "ნაციონალებს" დააბრალოს. "ქართულ ოცნებას" ძალიან კარგად შეეძლო სიტუაციის დალაგება - მხოლოდ პოლიციის მობილიზება იყო საჭირო, მაგრამ მათ ეს სპეციალურად არ გააკეთეს. მინდა გითხრათ, რომ საბოლოოდ, ეს ამბავი "ქართულ ოცნებას" ხეირს არ დააყრის.
გია ცაგარეიშვილი:
- საჯარო ბიბლიოთეკასთან განვითარებული მოვლენები ცალსახად, ხელს აძლევდა "ნაციონალებს". რისთვის? იმისთვის, რომ მსოფლიოსთვის თავი შეეცოდებინათ და "ქართული ოცნების" დისკრედიტაცია მოეხდინათ. იმის მაგივრად, რომ წარსულში დაშვებული შეცდომების გამო სინდისმა შეაწუხოთ და შემრიგებლური ტონით ისაუბრონ, კიდევ აქეთ აწყობენ პროვოკაციებს. როგორც ჩანს, არ ნანობენ ახალგაზრდების ქუჩაში ჩახოცვას, პატიმრების ცოცხებით გაუპატიურებასა და ხალხის ხარჯზე გალაღებულ ცხოვრებას.
- რატომ არ ისარგებლეს "ნაციონალებმა" ირაკლი ღარიბაშვილის მიერ შეთავაზებული ალტერნატიული გზით?
ანდრო ბარნოვი:
- ღარიბაშვილი იტყუება, ამას რომ ამბობს. იქ ვიყავი და შემიძლია დაზუსტებით ვთქვა, რომ პოლიციას საჯარო ბიბლიოთეკასთან მისასვლელად არანაირი ალტერნატიული დერეფნები არ გაუკეთებია. შესასვლელში მხოლოდ რამდენიმე პოლიციელი იდგა. ისინიც თავს უფრო იცავდნენ, ვიდრე - ჩვენ. აბობოქრებული მასა ყველას საფრთხეს უქმნიდა.
გია ცაგარეიშვილი:
- საპატრულო პოლიციის ბრიფინგზე ყველაფერს ნათელი მოეფინა. კორიდორები იყო, მაგრამ "ნაციონალებმა" სპეციალურად არ ისარგებლეს, რადგან მათ არეულობა აძლევდათ ხელს. ყველამ ნახა, როგორ დაეშვა რუსთაველის გამზირიდან ფურცელაძის ქუჩისკენ "გმირი" უგულავა და მომიტინგეების რიგებში შეიჭრა. ქალაქის მერი საკუთარ მოსახლეობას გავეშებული ურტყამდა და აგინებდა. ეს მსოფლიო დონის სკანდალია.
- თქვენი აზრით, ფიზიკური და სიტყვიერი შეურაცხყოფისთვის მხოლოდ აქციის მონაწილეები უნდა დაისაჯონ თუ მათთან ერთად "ნაციონალებმაც" უნდა აგონ პასუხი?
ანდრო ბარნოვი:
- თქვენ თუ იმის თქმა გინდათ, რომ ჩიორა თაქთაქიშვილი მომიტინგეებს თავს დაესხა, არ ვიცი, ვერაფერს ვიტყვი. 8 თებერვლის ჩანაწერებს მთელი დღის განმავლობაში ვუყურებდი, მაგრამ ვერაფერი დავინახე ისეთი, რომ ვთქვა, რომელიმე "ნაციონალი" პროვოკაციას აწყობდა და ხალხს აღიზიანებდა. მე კადრებში მხოლოდ უკიდურესად აგრესიული მასა ვიხილე. ბევრი აქციისთვის მიმიდევნებია თვალყური, მაგრამ ასეთი რამ ჯერ არასდროს მინახავს. ე.ი. აქციის ყველა მონაწილე წარმოუდგენლად აგრესიული, გაშმაგებული იყო. მათ ერთადერთ მიზანს ადამიანებისთვის ფიზიკური და სიტყვიერი შეურაცხყოფის მიყენება წარმოადგენდა.
გია ცაგარეიშვილი:
- ძალიან მიკვირს, თუ ვინმემ უგულავას "გმირობები" ვერ ნახა, ღვინიაშვილი და ბეჟაშვილი საკმაოდ მკაფიოდ გამოთქვამდნენ უცენზურო სიტყვებს. ჩიორა თაქთაქიშვილმაც კარგად უძახა აქციის მონაწილეებს რუსეთის აგენტები და არაკაცები. ალბათ იცით, რომ აქციაზე ძირითადად პოლიტპატიმრები და მათი ოჯახის წევრები იყვნენ. რა გამოდის? "ნაციონალებმა" ჯერ მთელი 9 წლის მანძილზე აწამეს ხალხი, შემდეგ კი აქციაზე აგინეს და ლანძღეს. ჩემი აზრით, მართლმსაჯულების წინაშე უნდა წარდგეს ყველა, ვინც პროვოკაცია მოაწყო და ხალხი სიტყვიერი შეურაცხყოფით გააღიზიანა ან ფიზიკური შეურაცხყოფა მიაყენა. ამ ქვეყანაში კანონის უზენაესობა ერთხელ და სამუდამოდ უნდა დამყარდეს.
- ვანო მერაბიშვილმა განაცხადა, რომ 8 თებერვლის ინციდენტის დროს ღარიბაშვილი დაბნეული, შეშინებული და გაფითრებული იყო. თქვენ რამდენად იზიარებთ მის ამ მოსაზრებას?
ანდრო ბარნოვი:
- ირაკლი ღარიბაშვილი მოვიდა საჯარო ბიბლიოთეკასთან და იმის მაგივრად, რომ გარეთ გასულიყო და ხალხს დალაპარაკებოდა, შენობაში, კამერების საშუალებით მოუწოდა მათ დაშლისკენ. ე.ი. მას ხალხში გასვლისა და მათთან დალაპარაკების პრობლემა ჰქონდა. ამის შემდეგ რამდენიმე წუთით გაუჩინარდა. შემდეგ დაბრუნდა და თქვა, რომ ნახა კადრები და თურმე "ნაციონალური მოძრაობა" ახდენდა პროვოკაციას. შს მინისტრის ეს განცხადება რამდენად ადეკვატურია, თავად განსაჯეთ. ღარიბაშვილმა სპექტაკლი დადგა - გაითამაშა, ვითომ აქციაზე მოვიდა და რაღაც გააკეთა. სინამდვილეში მას არაფერი გაუკეთებია. აყალმაყალი და ჭიდაობა მისი მოსვლისა და წასვლის შემდეგაც გაგრძელდა.
- ტელევიზიითა და ინტერნეტით გავრცელდა კადრები, სადაც ჩანს, რომ მინისტრი ღარიბაშვილი აქციაზეა და ხალხს პირადად ესაუბრება.
- არა, მერწმუნეთ, მან მხოლოდ ეროვნული ბიბლიოთეკიდან გააკეთა მიმართვა.
გია ცაგარეიშვილი:
- ვანო მერაბიშვილი ვის შიშზე ლაპარაკობს? დღეს უკვე ყველამ ვიცით, რომ ლეგენდები მერაბიშვილის უძლეველობაზე, სააკაშვილის შექმნილი იყო. ასე სჭირდებოდა და იმიტომ. მერაბიშვილი ერთი ჩვეულებრივი კრიმინალია, რომლის მითითებითაც არაერთი ადამიანის სიცოცხლე ჩაიფერფლა. ახლა ის ყველანაირად ცდილობს, შეტევაზე გადმოვიდეს, აქეთ დაგვდოს ბრალი რაღაც-რაღაცებში და ამით გაიხანგრძლივოს პოლიტიკური კარიერა და ასცდეს ციხეს. მას მართლა არაფერი აქვს სათქმელი ირაკლი ღარიბაშვილსა და მის პოლიციელებზე, რომლებიც დღეს აბსოლუტურად დეპოლიტიზებულნი არიან. მერაბიშვილის პოლიციელებისგან განსხვავებით, ესენი თავიანთი ლიდერის სახელის ბღავილით არ დადიან ქუჩებში. დღეს პოლიცია მხოლოდ საზოგადოებას ემსახურება და დაკისრებულ მოვალეობას პირნათლად ასრულებს. ღარიბაშვილი მერაბიშვილისგან განსხვავებით, კბილებამდე შეიარაღებული სპეცრაზმით არ მიდის თავის ხალხთან. სხვათა შორის, ის სპეცრაზმი არსად გამქრალა. ისევ ყაზარმაშია და ისევ ბრძანებას ელოდება.
- როგორ გგონიათ - ქვეყანაში სამოქალაქო დაპირისპირების საფრთხე არსებობს?
ანდრო ბარნოვი:
- საფრთხე არსებობს და ყოველთვის იარსებებს, სანამ ქვეყანაში უპასუხისმგებლო პოლიტიკოსები იქნებიან.
გია ცაგარეიშვილი:
- არავითარი სამოქალაქო დაპირისპირების საფრთხე არ არსებობს. დაპირისპირებას ორი მხარე სჭირდება. ერთ მხარეს "ქართული ოცნება" და ხალხია, მეორე მხარეს კი - "ნაცების" მცირერიცხოვანი ხროვა.
- მიხეილ სააკაშვილმა საკუთარ რეზიდენციაში მოხსენების დროს თქვა, რომ მას ძალიან ხშირად აწუხებს სინდისის ქენჯნა. თქვენი აზრით, მაინც რის გამო ქენჯნის პრეზიდენტს სინდისი?
ანდრო ბარნოვი:
- არ გინდათ ამ სიტყვების ხელზე დახვევა. სინდისის ქენჯნა ნებისმიერ პოლიტიკოსს უნდა აწუხებდეს.
გია ცაგარეიშვილი:
- მაგას რა მოთვლის, უამრავი ცოდვა აქვს ჩადენილი და რომლის გამო "ქენჯნის" სინდისი.
- რამდენად შედეგიანი შეიძლება იყოს პრეზიდენტ სააკაშვილსა და ახალ ხელისუფლებას შორის სულ ახლახან დაწყებული დიალოგი?
ანდრო ბარნოვი:
- ძალიან კარგია, რომ დიალოგი დაიწყო. ვფიქრობ, შედეგსაც მივიღებთ, თუ ახალი ხელისუფლება უფრო კონსტრუქციული იქნება და საკუთარი ძალაუფლების დემონსტრირებას ისევ არ შეეცდება.
გია ცაგარეიშვილი:
- მივესალმები დიალოგის დაწყებას. პირადად მე მზად ვარ, ყველა ის შეურაცხყოფა დავივიწყო, რაც სააკაშვილმა და მისმა გუნდმა მე და ჩემს ქვეყანას მოგვაყენეს. სავარაუდო შედეგებზე საუბარი მართლა მიჭირს, რადგან ეჭვი მეპარება, რომ "ნაციონალებმა" პროვოკატორობას თავი დაანებონ.
ხათუნა ბახტურიძე
(გამოდის ხუთშაბათობით)