დავით საგანელიძე - ევრონესტის დელეგაციას პროცესებზე გაზვიადებული წარმოდგენა აქვს

მე იმ ქალაქში და ისეთ ეზოში გავიზარდე, საიდანაც კარგად ვიცი, მეზობლობა რა არის, რომ მეზობელთან კარგი ურთიერთობა უნდა გქონდეს, - ასეთი შედარება დავით საგანელიძემ ქვეყნის საგარეო კურსსა და საქართველოს ჩრდილოელ მეზობელთან ურთიერთობასთან დაკავშირებით ევრონესტის დელეგაციასთან შეხვედრის შემდეგ გააკეთა.

მისივე თქმით, შეხვედრის შედეგად დარჩა შთაბეჭდილება, რომ ევრონესტის დელეგაციას საქართველოში მიმდინარე პროცესებთან დაკავშირებით გაზვიადებული წარმოდგენა სააკაშვილის გუნდის პიარმანქანის გამო აქვს.

"ასეთი დელეგაციების მიღება ჩვენთვის დიდი პასუხისმგებლობაა. ყველაზე მთავარია მათთვის სწორი, ობიექტური და ზუსტი ინფორმაციის მიწოდება, რადგან მათი რეკომენდაციები საქართველოს ხელისუფლებისათვის ძალიან მნიშვნელოვანია. სამწუხაროდ, გამოვიტანე დასკვნა, რომ ზოგიერთ შემთხვევაში მიმდინარე პროცესების შესახებ, რაც დღეს ქვეყანაში ხდება, გაზვიადებული წარმოდგენა ჰქონდათ. ეს არ მიკვირს, რადგან ის პიარმანქანა, რომელიც სააკაშვილის ხელისუფლებას ჰქონდა და დღევანდელ უმცირესობას აქვს, საკმაოდ სერიოზულად მუშაობს. ამით უცხოეთში ჯერ კიდევ გარკვეული ილუზია იქმნება", - განუცხადა ჟურნალისტებს შეხვედრის შემდეგ დავით საგანელიძემ.

მისივე თქმით, "ევრონესტის" წევრთა კითხვები ძირითადად ეხებოდა იმას, თუ როგორ წარმოუდგენია ხელისუფლებას საპარლამენტო უმცირესობასთან ურთიერთობა.

"მე ვუპასუხე, რომ წლების განმავლობაში ოპოზიციაში ვიყავი და კარგად მესმის, ეს რამდენად რთულია. ამიტომ ყველაფერს გავაკეთებ იმისთვის, რომ ოპოზიციასთან საქმიანი და ქვეყნისთვის სასარგებლო ურთიერთობა გვქონდეს", - აცხადებს დავით საგანელიძე.

მისივე თქმით, ევროპელ სტუმრებს ასევე აინტერესებდათ, საქართველომ საგარეო კურსი ევროპიდან ჩრდილოეთისკენ შეცვალა თუ არა.

"არაერთხელ მითქვამს და შეხვედრაზეც გავიმეორე, რომ მათი ასეთი წარმოდგენა არასწორად მიწოდებული ინფორმაციის შედეგია. "ქართულმა ოცნებამ" არაერთხელ განაცხადა, რომ მისი ორიენტაცია არის ევროპასთან ინტეგრაცია, როდესაც ნატო-ში საქართველოს გაწევრიანების საკითხზე პლებისციტი გაიმართა, მე ხმა ნატო-ში ქვეყნის მომავალს მივეცი, რაც არ ნიშნავს იმას, რომ ჩვენ მეზობლებთან ურთიერთობა არ უნდა გვქონდეს. ის, რომ დღეს მეზობელთან არანაირი ურთიერთობა არ გვაქვს, ჩემი აზრით, დიდი შეცდომაა. მე იმ ქალაქში და ისეთ ეზოში გავიზარდე, საიდანაც კარგად ვიცი, მეზობლობა რა არის. აქედან გამომდინარე ვიცი, რომ მეზობელთან კარგი ურთიერთობა უნდა გქონდეს", - აცხადებს დავით საგანელიძე.

"ინტერპრესნიუსი"