მიხეილ სააკაშვილი - "ჩვენ დაინტერესებულნი ვართ, რომ დისკუსიამ გადაინაცვლოს პარლამენტის კედლებში და არა ქუჩებში"

პრეზიდენტი მიხეილ სააკაშვილი აცხადებს, რომ დისკუსიამ უნდა გადაინაცვლოს პარლამენტის კედლებში და არა ქუჩებში. მისი თქმით, ქუჩებში ჩხუბიდან ბევრად უფრო კატასტროფულ მოვლენებამდე ნახევარი ნაბიჯია .

აღნიშნული განცხადება პრეზიდენტმა სააკაშვილმა ავლაბრის რეზიდენციაში, პარლამენტის თავმჯდომარე დავით უსუფაშვილთან და უმცირესობის ლიდერ დავით ბაქრაძესთან მოლაპარაკებების შემდეგ გამართულ ბრიფინგზე გააკეთა.

"დღეს ჩვენ გვქონდა საქმიანი შეხვედრა პარლამენტის თავმჯდომარე დავით უსუფაშვილთან და უმცირესობის ლიდერთან. უკიდურესად შეშფოთებული ვარ, რაც მოხდა ეროვნული ბიბლიოთეკის მიმდებარე ტერიტორაზე, როცა ადგილი ჰქონდა მასობრივ ეგზეკუციას ციხიდან გამოსულ კრიმინალთა ბანდის მიერ და არა ხალხის მიერ ოპოზიციის მიმართ. ჩვენ ყველანი დაინტერესებულნი ვართ, რომ ეს აღარ განმეორდეს. ჩვენ დაინტერესებულნი ვართ, რომ დისკუსიამ გადაინაცვლოს პარლამენტის კედლებში და არა ქუჩებში. ქუჩებში ჩხუბიდან ბევრად უფრო კატასტროფულ მოვლენებამდე ნახევარი ნაბიჯია და ჩვენ აღარასდროს უნდა მივიდეთ ასეთ ზღვარზე, სადაც საქართველო 90-იან წლებში იყო. ეს იყო ჩვენი პრინციპული მოსაზრება და ბატონი დავითი იზიარებს ჩვენს შეშფოთებას", - აღნიშნა პრეზიდენტმა.

მისივე განმარტებით, "ვერ იტყვის, რომ ყველაფერზე ჩამოყალიბდნენ და შეთახმდნენ". "მას აქვს თავის პოზიცია, ჩვენ - ჩვენი და ვფიქრობთ, რომ გაგძელდება დისკუსია. მთავარია, რომ ასეთი დიალოგი უნდა გაგრძელდეს. განხილვები იქნება როგორც უმცირესობის შიგნით, ასევე უმრავლესობის შიგნით პრემიერ-მინისტრთან", - აღნიშნა მიხეილ სააკაშვილმა.

"ინტერპრესნიუსი"

ასევე იხილეთ:

"დახურულ კარს მიღმა ნაკლებს ვკამათობთ" - სააკაშვილის და უსუფაშვილის კოჰაბიტაციური დებატები

"ბატონო მიხეილ, ამისთვის შევიკრიბეთ აქ?" - რატომ შეაწყვეტინა პრეზიდენტს საუბარი უსუფაშვილმა