30
მაისიდღის ზოგადი ასტროლოგიური პროგნოზი
მე ბევრი მიფიქრია იმის შესახებ, რა ნაკლი მაქვს. სამწუხაროდ, მე არ მაქვს დამთავრებული თბილისის სახელმწიფო უნივერსიტეტი, - ამის შესახებ საქართველოს კათოლიკოს-პატრიარქმა, უწმინდესმა და უნეტარესმა ილია მეორემ სამების ტაძარში ქადაგებისას ბრძანა.
პატრიარქმა ვრცლად ისაუბრა წმინდა მეფე დავით აღმაშენებლის ღვაწლზე. უწმინდესმა ბრძანა, რომ დავით აღმაშენებელი განსაკუთრებული მფარველია საქართველოსი, ღვთის განგებით მას დაედგა გვირგვინი და ჩაიბარა დარღვეული ქვეყანა. პატრიარქმა ბრძანა, რომ დავით აღმაშენებელი იყო ის პიროვნება, რომელმაც მოიწვია რუის-ურბნისის კრება და მოხდა ერისა და ეკლესიის სულიერი განწმენდა.
პატრიარქმა ისაუბრა წმინდა მეფის სულიერებაზე, წიგნიერებაზე და ბრძანა, რომ მან დააარსა გელათის აკადემია და ყოველი უმაღლესი სასწავლებელი მისი მსგავსი უნდა ყოფილიყო.
უწმინდესმა ასევე ისაუბრა თბილისის სახელმწიფო უნივერსიტეტზე და აღნიშნა, რომ შემთხვევითი არ არის, რომ საქართველოში პირველი უნივერსიტეტი წმინდა დავით მეფის ხსენების დღეს დაარსდა. მან დღევანდელი დღე მიულოცა თბილისის სახელმწიფო უნივერსიტეტის რექტორს, სტუდენტებს, პროფესორ-მასწავლებლებს და იქ მომუშავე ყველა ადამიანს.
"მე ბევრი მიფიქრია იმის შესახებ, რა ნაკლი მაქვს. მე არ მაქვს დამთავრებული თბილისის სახელმწიფო უნივერსიტეტი, სამწუხაროდ. ამდენად დიდია ჩემთვის ამ უნივერსიტეტის მნიშვნელობა. დღესაც კი დავიწყებდი სწავლას ამ უნივერსიტეტში, რომ შეიძლებოდეს. აქ მოღვაწეობდნენ დიდი პროფესორ-მასწავლებლები, ივანე ჯავახიშვილი, რომელმაც დიდი ტანჯვა გაიარა", - ბრძანა უწმინდესმა ქადაგებისას.
პატრიარქმა ბრძანა, რომ 8 თებერვალს ასევე დაარსდა პატრიარქის ფონდი, რომელიც ეხმარება გაჭირვებულებს. ამ ფონდის სახსრებით ბეჭდავენ წიგნებს და ბევრი კარგი რამ კეთდება.
უწმინდესმა მოუწოდა მრევლს, მიაქციონ ამ ფონდს ყურადღება, რადგან მისთვის გაღებული თანხა ხალხის დახმარება იქნება.
ასევე, პატრიარქმა აღნიშნა, რომ დღეს სასულიერო აკადემიაში, თეოლოგიაში სადისერტაციო საბჭო დაარსდა, რომელიც მაძიებლებს დოქტორის ხარისხს მიანიჭებს.
ქადაგების ბოლოს უწმინდესმა და უნეტარესმა ილია მეორემ ხელისუფლებას, პრემიერ-მინისტრს, მინისტრებსა და მთელ ქართველ ხალხს დღევანდელი დღე მიულოცა, შესთხოვა უფალს "წმინდა დავით მეფის ლოცვით ღმერთმა გააერთიანოს საქართველო".
"ყველაფერი გავაკეთოთ იმისთვის, რომ საქართველო გავიდეს სამშვიდობოს", - ბრძანა ქადაგების ბოლოს უწმინდესმა.
ქადაგების დასრულების შემდეგ ტაძარში ჯვრებით, ხატებით ლიტანიობა დაიწყო. ლიტანიას წინ თავად უწმინდესი მიუძღვებოდა. მასში ასევე მონაწილეობდნენ ტაძარში მყოფი პრემიერ-მინისტრი ბიძინა ივანიშვილი, შინაგან საქმეთა მინისტრი ირაკლი ღარიბაშვილი, თავდაცვის მინისტრი ირაკლი ალასანია, სოფლის მეურნეობის მინისტრი დავით კირვალიძე, ჯანდაცვის მინისტრი დავით სერგეენკო, განათლების მინისტრი გიორგი მარგველაშვილი და მთავრობის სხვა წევრები. ასევე, ტაძარში იმყოფებოდნენ ჯარისკაცები.
